„ვიცე-მის საქართველო“ – ვიქტორია კოჩეროვა გვიამბობს იმის შესახებ, თუ როგორია მისი დღის გრაფიკი, რა დროს უთმობს ფიზიკურ მომზადებას, სპორტის რომელი სახეობით არის გატაცებული, როგორ მოვუაროთ კანსა და სახეს და ა.შ.

ზოგადად, რამდენად აქცევთ ყურადღებას ცხოვრების ჯანსაღ წესს?
ვფიქრობ ამისთვის არ არის აუცილებელი, იყო მოდელი. ყველა ადამიანისთვის სასარგებლოა მუდმივ რეჟიმში ყოფნა. რაც შემეხება მე, ხშირად ვვარჯიშობ, ვცდილობ სისტემატურად ვიარო სპორტდარბაზში, მაგრამ ეს დამოკიდებულია დღის გრაფიკზე. საშუალოდ, კვირაში ოთხჯერ მაინც ვახერხებ აქტიურად დავიტვირთო. დავდივარ კრივზე. ამასთან ერთად, კვება ძალიან მნიშვნელოვანი ფაქტორია, ცილოვანი და სხვა სახის ბალანსის რეგულირება საკუთარ ორგანიზმში. არის შემთხვევები, როცა ვერ ვამბობ უარს ნოყიერ და არაჯანსაღ პროდუქტზეც. ძალიან მიყვარს ბიგ მაკი, სხვადასხვა სახის ტკბილეული, გემრიელი კერძები. მაგრამ მათ დაგემოვნებას იშვიათად ვახერხებ.

სპორტის რომელი სახეობით ხართ გატაცებული?
ბავშვობიდან მიყვარდა ფიგურული სრიალი. შემდეგ სავარჯიშო დარბაზი დაიხურა. როცა ზამთრის კურორტებს ვესტუმრები, ყოველთვის ვცდილობ გავიხსენო თხილამურებით სრიალი. ძალიან მიყვარს და მენატრება. რაც შეეხება სპორტის სხვა სახეობებს, შიში ნაკლებად მაქვს. ბავშვობიდან ვცურავდი. მახსოვს როგორ ვხტებოდი სარფის დიდი კლდიდან თავით. სპორტული ცხოვრება ყოველთვის დიდ როლს იკავებდა ჩემს ცხოვრებაში და უკვე ბუნებრივ მდგომარეობად გადაიქცა.

რას ურჩევდით მკითხველს კანისა და სახის მოვლის შესახებ?
კანისა და სახის მოვლას დიდ ყურადღებას ვუთმობ. ნიღბები და სხვადასხვა სახის დამატენიანებლები აუცილებელი პირობაა სიჯანსაღისთვის. წყლის მიღება ძალიან მნიშვნელოვანია და ნამდვილად აქვს შედეგი – კანი უფრო დამშვიდებული და რბილია. კანის დასამშვიდებლად დღე-ღამის განმავლობაში
8 საათამდე ძილი აუცილებელია. შეშუპებული თვალები და დამღლელი რეჟიმი ნაადრევი ნაოჭების გაჩენას იწვევს.