დღეს სამყაროში ყველაზე განხილვადი თემა ახალი კორონა ვირუსია, რომლის გარშემოც უამრავი კითხვა გროვდება. რადგანაც სიტუაცია ყოველდღიურად იცვლება, მნიშვნელოვანია ვიცოდეთ როგორ ვრცელდება ის ადამიანებს შორის და რა გამოწვევების წინაშე ვდგავართ.

კორონავირუსის ყველაზე მეტი შემთხვევა რესპირატორულ გადაცემასთანაა დაკავშირებული. ეს ნიშნავს, რომ ვირუსი ვრცელდება მაშინ, თუ დაავადებული დაახველებს ან დააცემინებს, ან თუნდაც ისაუბრებს. კოვიდ-19-ის შემცველი წვეთები შემდეგ ახლოს მყოფი ადამიანების პირზე ან ცხვირზე ეცემიან - დაახლოებით ორი მეტრის რადიუსში.

შესაძლებელია ადამიანმა ვირუსი სხვადასხვა ზედაპირზე შეხებით აიკიდოს და შემდეგ ვირუსიანი ხელი სახეს შეახოს, მაგრამ მსგავსი შემთხვევები უფრო ნაკლებად ფიქსირდება. ახალი კორონავირუსი ზედაპირებზე რამდენიმე საათით და ხანდახან რამდენიმე დღით ცოცხლობს - რკინის ზედაპირებზე 4 საათი, დაფაზე 24 საათი, პლასტიკურ ნივთებზე 4 დღე.

ეპიდემიოლოგები აცხადებენ რომ ის ადამიანებიც გადასცემენ სხვებს კორონავირუსს, რომლებსაც, ჯერ სიმპტომები არ გამოვლენიათ. სიმპტომები ვირუსის ორგანიზმზე მოხვედრიდან გარკვეული პერიოდის შემდეგ იჩენს თავს და ისინი ვინც ვერაფერს გრძნობენ ან უბრალოდ დაღლილობას და ჩვეულებრივ გაციებას, სხვებისთვის შესაძლოა საფრთხეს წარმოადგენდნენ.

ამიტომაც მნიშვნელოვანია შევამციროთ კონტაქტი იმ ადამიანებთან, რომლებსაც გრიპის სიმპტომები აქვთ ან ჰქონდათ კავშირი მათთან, ვინც თავს მსგავსად გრძნობდა.

როგორ შევამციროთ კორონავირუსის გავრცელება?
1. სოციალური დისტანცია
რადგანაც ვირუსი ადამიანიდან ადამიანს გადაეცება, შევამციროთ ხალხთან კონტაქტი და საზოგადოებრივი თავშეყრა.
2. არ ვიმოგზაუროთ
ეს ეხება როგორც საერთაშორისო მიმოსვლას, ასევე ქვეყნის შიგნით, საქალაქთაშორისო მგზავრობას. ყველა სახის ტრანსპორტში ადამიანებთან ახლოს გვიწევს ყოფნა, რაც ვირუსის გავრცელებას ძალიან ადვილს ხდის.
3. დაიბანეთ ხელები და არ შეეხოთ სახეს
თუ სრულ იზოლაციაში ვერ ვართ და სოციალური დისტანცია ხანდახან მაინც გვერღვევა, რეგულარული ხელების დაბანა საპნითა და წყლით უმნიშვნელოვანესია. დაიბანეთ ხშირად, განსაკუთრებით ჭამის და სახეზე ხელების შეხების წინ. თუ წყალი ახლოს არ გაქვთ, გამოიყენეთ სადეზინფექციო საშუალება.