პარიზში მოხვედრას უკვე თბილისიდან გაუსვლელადაც შეძლებთ, ეს კი ცნობილი ფრანგი კონდიტერის, კრისტოფ ადამის დამსახურებაა. 46 წლის წინ, საფრანგეთის ჩრდილო-დასავლეთში, ისტორიულ ბრეტანის მხარეში დაიბადა და ადრეულ ასაკში კონდიტერობასა თუ ზოგადად, მზარეულობაზე არც კი უფიქრია. სკოლის მაღალ კლასებში გააანალიზა, რომ განსხვავებული საქმისთვის უნდა მოეკიდა ხელი და ფრანგული რეგიონით შთაგონებულმა ბედი საკონდიტრო საქმიანობაში გამოსცადა.

გულუბრყვილო ცდამ საოცარი შედეგი გამოიღო – კრისტოფმა საკუთარ ნიჭს ფართო გზა გაუხსნა და მომავალი ცხოვრება სწორედ ამ სფეროს დაუკავშირა. საქმიანობა საფრანგეთის ცნობილ რესტორნებში განავითარა და საბოლოოდ საკუთარი ნიშაც შექმნა. დღეს, პარიზში ეკლერის ხსენებაზე სწორედ მისი შემოქმედება და კაფეთა საოცარი ქსელი L’Eclair de Genie ახსენდებათ. მრავალფეროვანი დიზაინის ნუგბარი ტკბილეულის მოყვარულებს დახვეწილი სინატიფითა და შეუდარებელი გემოთი ხიბლავს. თითქოს იკარგება ზღვარი ნამცხვრის სხვადასხვა ფენას შორის და დაკვირვებით შერჩეული ინგრედიენტები ერთმანეთში ჰაეროვნად ირევა.

2014 წელს, საფრანგეთმა კრისტოფ ადამს წლის საუკეთესო კონდიტერის წოდება მიანიჭა. რამდენიმე საავტორო წიგნში ნიჭიერი მზარეული საკუთარ რეცეპტებს გვიზიარებს და თამამად დასძენს, რომ საიდუმლო რეცეპტი არ აქვს – ყველაფერი ჯადოსნური ხელებისა და საქმისადმი თვითშეწირვის შედეგია!

როდის გაგიჩნდათ მიდრეკილება, საკუთარი ცხოვრება სამზარეულოსთვის მიგეძღვნათ?
ეს შემთხვევით მოხდა. ვაღიარებ, რომ სკოლაში ცუდი მოსწავლე ვიყავი. საკონდიტრო ხელობა 15 წლის ასაკში დავიწყე, ძალიან მძიმე სამუშაო იყო და თავიდან საერთოდ არ მომწონდა. დროთა განმავლობაში მივხვდი, რომ ეს გახლდათ საქმე, რომელიც მთელი ცხოვრება უნდა მეკეთებინა. იმის მაგივრად, რომ კონდიტერობაზე ცუდად მესაუბრა, გადავწყვიტე შემეყვარებინა და ნელ-ნელა იგი ჩემს პროფესიად იქცა.

პირველ პროფესიულ წარმატებად რა გახსენდებათ?
18 წლის ასაკში პირველ კონკურსში მივიღე მონაწილეობა, ბაბუაჩემი ჩემით ძალიან ამაყობდა. როცა მიყურებდა, თვალები უციმციმებდა. ამან არანორმალური ენერგია მომცა და დამაჯერა, რომ ყველაფერი შემეძლო!
რამდენად მნიშვნელოვანია მიიღო საუკეთესო კონდიტერის წოდება ტკბილეულით განთქმულ ქვეყანაში?
ეს ჩემთვის მართლაც ძალიან მნიშვნელოვანი და სასიამოვნო შეგრძნება იყო. უკვე 20 წელია, რაც პარიზში ვმუშაობ. საფრანგეთის საკონდიტრო აღორძინება გასული საუკუნის 80-იან წლებში პირველი თაობის კონდიტერებით დაიწყო. მე მეორე თაობას წარმოვადგენ. ახლა უკვე მესამე თაობის კონდიტერები საქმიანობენ, ჩვენ კი ვაკვირდებით მათ განვითარებას და სადავეები ხელთ გვიპყრია.

თქვენი კაფეები იაპონიაშიცაა წარმოდგენილი. რამდენად წარმატებულია იქ ფრანგული ტკბილეული?
როცა ცნობილი ფრანგული საკონდიტროს, Fauchon-ის წამყვანი კონდიტერი ვიყავი, იაპონიაში მოგზაურობა ხშირად მიწევდა, რადგანაც Fauchon-ი იქ ბევრ ჩემს პროდუქციას ყიდდა. შეიძლება ითქვას, რომ იაპონელებს დესერტები არ ჰქონდათ და ფრანგული ტკბილეული წარმატებით მიიღეს. დღეს, მსოფლიოში ორადორი ლიდერი ქვეყანაა ისეთი, სადაც მხოლოდ საკონდიტროს შეუძლია იარსებოს – იაპონია და საფრანგეთი.

ინტერვიუ უფრო ვრცლად წაიკითხეთ OK!-ის აგვისტოს ნომერში...