არავინ იცის თუ როგორ დასრულდება მორიგი სასიყვარულო გატაცება. საზაფხულო კურორტი ხშირად უდებს საფუძველს დასამახსოვრებელ რომანს. აღსანიშნავია, რომ მსგავსი ისტორიები შესაძლოა ხანმოკლე იყოს, თუმცა ისეთი, რომ მთელი ცხოვრება გაგყვეს.

1. დრეიფი
ტამი ოლდჰემი ახალგაზრდა გოგონაა, რომელსაც მოგზაურობა ძალიან უყვარს. ტაიტიზე ის შემთხვევით რიჩარდ შაპს გაიცნობს და მათ შორის ნამდვილი საკურორტო რომანი ჩაღდება. სიუჟეტის განვითარება ნამდვილად გაოცებულს დაგტოვებთ. რიჩარდი ამერიკის სანაპიროებზე იახტით მოგზაურობას თანხმდება, რომლის დროსაც ძლიერი შტორმი იჩენს თავს. შეყვარებულები გადარჩენისთვის თავდაუზოგავად იბრძვიან. მთავარ როლებს ახალგაზრდა, თუმცა უკვე ცნობილი მსახიობები შეილინ ვუდლი და სემ კლაფლინი განასახიერებენ.

2. ექვსი დღე, შვიდი ღამე
ჰარისონ ფორდის და ენ რეჩის პერსონაჟები ვერტმფრენით მგზავრობისას დაუსახლებელ კუნძულზე აღმოჩნდებიან. მფრინავს და ახალგაზრდა ჟურნალისტს რთულ პირობებში ყოფნისას ერთმანეთთან კომპრომისის გამონახვა უჭირთ, თუმცა ბრაზი მალე რომანტიკულ გრძნობაში გადაიზრდება.

3. დიდი შხეფი
როგორც წესი, საკურორტო რომანი ორ უცნობ ადამიანს შორის ჩაღდება, თუმცა აქ სხვა შემთხვევასთან გვაქვს საქმე. იტალიის სამხრეთით, სადაც როკ-ვარსკვლავი საყვარელთან ერთად ისვენებს, მისი ყოფილი ქმარი ქალიშვილთან ერთად ჩადის. ცნობილი ვარსკვლავის შეყვარებულს ახალგაზრდა მომხიბვლელი გოგონა უყვარდება, ხოლო მამამისი ქალბატონის დაბრუნებას ცდილობს. ტილდა სუინტონი და რეიფ ფაინსი მაყურებელს საოცარი თამაშით მოხიბლავენ.

4. ჭამე, ილოცე, შეიყვარე
ელიზაბეტ გილბერტის პოპულარული წიგნის ეკრანიზაცია ნამდვილად საკულტო გამოდგა. ფილმი მსახიობთა საოცარი შემადგენლობით გამოირჩევა: ჯულია რობერტსი, ხავიერ ბარდემი, ვაიოლა დევისი, სოფი ტომპსონი, ჯეიმს ფრანკო - რეჟისორის სკამი კი თანამედროვე კინოს უდავო პროფესიონალმა რაიან მერფიმ დაიკავა. მთავარი გმირი საკუთარი ცხოვრებით უკმაყოფილოა, ამიტომაც მოგზაურობას გეგმავს, აქ კი სხვა ყველაფერთან ერთად, რომანტიკული სიუჟეტიც ვითარდება.

5. შენი სახელით მომმართე
კლასიკური საკურორტო რომანის მოულოდნელი ინტერპრეტაცია - ლუკა გუადანინოს უახლესი ფილმი ნამდვილი შედევრი გახდა. ტიმოთი შალამემ და არმი ჰამერმა მთელი მსოფლიოს გული მოიგეს. 17 წლის ელიო მშობლების აგარაკზე ისვენებს და თავის მეგობარ გოგონასთან ფლირტითაა გართული, თუმცა თინეიჯერული სიყვარულის ისტორია მნიშვნელოვნად იცვლება, როცა სტუმრად ელიოს მამის ასისტენტი, ამერიკელი მეცნიერი ოლივერი ჩამოდის.

6. ტოსკანის მზის ქვეშ
კვლავ დავუბრუნდეთ იტალიას: ამჯერად ტოსკანაში მიემართება მწერალი, რომელმაც ქმართან განშორება მძიმედ გადაიტანა და შემოქმედებით კრიზისს განიცდის. ფრენსის მეისი ადგილობრივი პეიზაჟებით დიდ ინსპირაციას იღებს და მზადაა სამუდამოდ თქვას უარი ყოფილ ქმარზე და ახალ ურთიერთობას შეეგებოს.

7. წერილები ჯულიეტას
შთამბეჭდავი ისტორია იმის შესახებ, რომ ვერონამ, სადაც რომეო და ჯულიეტა ცხოვრობდნენ, შესაძლოა სიყვარულის მაძიებელი ადამიანის ცხოვრება სამუდამოდ შეცვალოს. ახალგაზრდა ამერიკელი სოფია მოხალისეობრივ საქმიანობაში ჩაერთვება, რომლის წევრებიც „ჯულიეტას წერილებს“ პასუხობენ. წერილებში ადამიანები საკუთარი სასიყვარულო ისტორიების შესახებ მოგვითხრობენ. ერთ-ერთი მათგანი, რომელიც ჯერ კიდევ 1960 წელსაა გამოგზავნილი, გოგონას შთაგონებას აძლევს და მისი ავტორის პოვნა სურს. სოფია მოხუც ბრიტანელს იტალიაში შეხვედრისთვის ითანხმებს, რათა ყოფილი შეყვარებული აპოვნინოს, რომელზეც წერილში საუბრობს. მას მოგზაურობაში შვილიშვილი, ახალგაზრდა მამაკაციც მიყვება, რომელსაც რომანტიკის საერთოდ არ სჯერა.