მიუსია პრადა 67 წლის გახდა. ის ბოლო დროის ყველაზე გავლენიანი დიზაინერია. ცოტა ხნის წინ, მისმა საკრუიზო კოლექციამ ყველა მოხიბლა.

„ვაკეთებ ყველაფერს, რასაც სწორად მივიჩნევ“
დიზაინერს არაერთხელ უთქვამს, რომ თავის საქმეში ქალის სილამაზის კანონების დეკონსტრუქცია უყვარს. მის მთავარ შემოქმედებით მიღწევად თვლის იმას, რომ „უშნო- სილამაზედ აქცია“. მართლაც, ყველა მისი კოლექცია განსაკუთრებული ხასიათით გამოირჩევა და ახალ მწვერვალებს აღწევს.

შეიძლება ითქვას, რომ პრადა ტანისამოსს ინტელექტუალებისთვის ქმნის, მისი ყოველი კოლექცია ხომ დიდ აზრს ატარებს და ნოვატორულ ფორმებში იკვეთება, რომელიც ადამიანებს დეტალებით ამახსოვრდებათ.

ბრენდებთან კოლაბორაციის კატეგორიული წინააღმდეგია, რადგანაც არ სურს „მასობრივი ტანისამოსის“ შექმნა. ამით, კომერციულ გათვლებზე მეტად, ბრენდის სპეციფიკას აქცევს ყურადღებას.

შვილებთან ერთად

„იყურე პირდაპირ, არ დაუბრუნდე წარსულს“
პრადას კიდევ ერთი დევიზი წინსვლაა. სწორედ მან აქცია ბაბუისგან დატოვებული წარმოება აყვავებულ ბიზნესად. თუმცა, მიუსიას ქმარი პატრიციო ბერტელი მნიშვნელოვნად დაეხმარა, რომ „პრადა“ მოდის სამყაროს ცენტრში ექცია. სწორედ ორი ძლიერი პიროვნების ტანდემმა შეძლო ბრენდის იმპერიის სტაბილური წარმატება.

თუმცა, მიუსიას წარსულიც შესანიშნავად ახსოვს: გრძელი კარიერის განმავლობაში არასდროს ივიწყებდა წინაპრების შესახებ: „ადამიანის კულტურას მისი წარსული განაპირობებს, ისტორია შემთხვევითი არაა.“ 2014-15 წლის შემოდგომა-ზამთრის კოლექციაში დაუბრუნდა კიდეც ბრენდის ისტორიას.

„არასოდეს დაკმაყოფილდეთ მიღწეულით“
პრადას აზრით მიღწეულზე არ უნდა გაჩერდე. 1992 წელს Miu Miu გამოუშვა, 1995 წელს Prada Men, 19970ში კი Prada Sport. 10 წელზე მეტია სუნამოებსაც უშვებს, 2006 წლიდან კი მზის სათვალეებს. რთული გეომეტრიული სილუეტები, ფერები და ქსოვილთა გამაოცებელი შეხამება-ეს ყველაფერი ბანალურობის წინააღმდეგ საბრძოლველი ინსტრუმენტებია.

„გინდა რაიმე კარგი შექმნა? გააკეთე!“
„ბევრი იმუშავე!“-ამის შესახებ მიუსია ყველა თავის ინტერვიუში საუბრობს. მას არანაირი სირთულის არ ეშინია თავის საქმეში. თავდაჯერებული ქალბატონი სტერეოტიპებს მუდამ ებრძვის.