პანდემიამ მსოფლიოს ბევრი ქვეყანა მოიცვა და საქმიანობის უამრავ სფეროზე იმოქმედა. „კოვიდ-19“-თან ბრძოლაში მოდის ბრენდებიც აქტიურად ჩაერთნენ. უფრო და უფრო მეტი კომპანია ცვლის თავის ქარხნებს, რათა სამედიცინო ინვენტარი შეკეროს.
LVMH – „კრისტიან დიორი“, Guerlain, BVLGARI და „ჟივანში“ სადეზინფექციო ხსნარებს დიდი რაოდენობით აწარმოებენ. შემდეგ მათ უფასოდ გადასცემენ ბევრ ფრანგულ საავადმყოფოს. „ხელების სისუფთავე ვირუსის პროფილაქტიკისთვის უმთავრესი მოთხოვნაა. ჩვენ მას იქამდე გამოვუშვებთ, სანამ ადამიანების უსაფრთხოებისთვის საჭირო იქნება. ერთად გავიმარჯვებთ“, − წერს BVLGARI-ის გენერალური დირექტორი ჟან კრისტოფ ბაბენი.

Chanel − ბრენდმა 1.2 მილიონი ევრო გამოყო კლინიკების ინფრასტრუქტურისა და სერვისების გაუმჯობესებისთვის. მათ ასევე გადასცეს 50 000 ნიღაბი საავადმყოფოების თანამშრომლებს.

Gucci − იტალიურმა მოდის სახლმა კი ვირუსის კვლევისთვის 2 მილიონი ევრო გაიღო. სხვა დაჯგუფებებთან თანამშრომლობით, ისინი ზრდიან ფონდებს, რათა ვაქცინაზე და მედიკამენტებზე მომუშავე მეცნიერები საჭირო მასალებით მოამარაგონ. „ამ კრიზისს ერთმანეთის დახმარება და მხარდაჭერა გადაგვატანინებს“, − წერს ალესანდრო მიკელე ოფიციალურ წერილში. ასევე, ბრენდი საკუთარი სოციალური ქსელებით პანდემიასთან დაკავშირებით მნიშვნელოვან ინფორმაციას აქტიურად ავრცელებს.

Prada − ვირუსთან საბრძოლველად, ბრენდის კრეატიულმა დირექტორმა მიუჩია პრადამ და მისმა ქმარმა პატრისიო ბერტელიმ შემოწირულობა მილანის 3 საავადმყოფოს გადასცეს. ასევე, გამოვიდნენ ინიციატივით, მათ ქარხანაში მხოლოდ სამედიცინო დანიშნულების კოსტიუმები და ნიღბები შეკერილიყო, რომლებსაც ტოსკანას საავადმყოფოებს გადასცემენ.

Moncler – ამ იტალიურმა ბრენდმა კი 10 მილიონი გაიღო იტალიაში საავადმყოფოს მშენებლობისთვის. „ეს ყველას მოვალეობაა − დაუბრუნოს ქალაქს ის, რასაც ის ამდენი ხნის განმავლობაში გვაძლევდა“, − ამბობს რემო რაფინი, Moncler-ის დირექტორი.

Nike − პანდემიის წინააღმდეგ „ნაიკის“ გუნდიც გაერთიანდა. ფონდების ლიდერებმა ამ მიზნით 15 მილიონზე მეტი შეაგროვეს. კომპანია იყენებს მასალებსა და ტექნოლოგიებს, რომლებიც მათი სპორტული ფეხსაცმლის, Air Max-ისთვის შემუშავდა. ასე ქმნიან რესპირატორული აპარატებისთვის ჰაერის გამწმენდ ლინზებს და დამცავ ფარებს. მათი ნაწარმი კორონავირუსით ინფიცირებულ პაციენტებთან მომუშავე ექიმებს გადაეცემათ.

Giorgio Armani − კოვიდ-19-ისგან დაზარალებულებისთვის ჯორჯო არმანიმ იტალიურ საავადმყოფოებს 1.25 მილიონი ევრო გადასცა. ბრენდის ქარხნებში სამედიცინო თავდაცვის საშუალებების წარმოებაც დაიწყო.

Versace − დონატელა ვერსაჩემ ქალიშვილთან ერთად მილანის საავადმყოფოს 200 000 ევრო გადასცა. „ამ პერიოდში მნიშვნელოვანია გავერთიანდეთ, რათა აღმოვუჩინოთ დახმარება მათ, ვისაც ეს სჭირდება და ვიბრძოლოთ ყოველდღე სხვისი სიცოცხლის გადასარჩენად. ჩვენი გულები იკუმშება კლინიკებში მომუშავე პერსონალზე ფიქრით, რომლებიც დაუღალავად და გმირულად შრომობენ ამდენი კვირის განმავლობაში მათ დასაცავად, ვინც გვიყვარს“, − ეწერა ოფიციალურ განცხადებაში.

Dolce & Gabbana − ამ იტალიურმა ბრენდმა კვლევითი პროექტი დააფინანსა, რომლის მიზანიც დიაგნოსტიკური და თერაპიული ხელსაწყოების განვითარების უზრუნველყოფაა. „მეცნიერული კვლევის მხარდაჭერა ჩვენი მორალური ვალდებულებაა და ვიმედოვნებთ, ჩვენი წვლილი ამ დრამატული პრობლემის გადაჭრას დაეხმარება“, − აცხადებენ დომენიკო და სტეფანო.

Ralph Lauren − ბრენდის ფონდმა $10 მილიონი გადასცა მათ, ვისაც პანდემია შეეხო. კორპორაციამ 250 000 ნიღაბი და საიზოლაციო ხალათი შექმნა. „გვჯერა, რომ არ აქვს მნიშვნელობა, ვინ ხარ ან საიდან ხარ. ჩვენ ერთი ოჯახი ვართ. ვდგამთ მნიშვნელოვან ნაბიჯებს, რათა დავეხმაროთ ჩვენს გუნდს და საზოგადოებას კრიზისის დაძლევაში“, − განაცხადა რალფ ლორენმა.

Burberry − ინგლისურმა ბრენდმაც მოახდინა სათანადო მობილიზება. მოდის სახლის მიზანია, საზოგადოების საჭიროებები დააკმაყოფილოს და პრობლემის გადაჭრის გზებს მხარი დაუჭიროს. ისინი აწარმოებენ და აწვდიან სამედიცინო აღჭურვილობას (ნიღბებს, ხალათებს და სხვ.) მათ, ვისაც ეს სჭირდება. მაგალითად, 100 000-ზე მეტი ნიღაბი დიდი ბრიტანეთის საერთაშორისო ჯანდაცვის სერვისებს გადაეცა. აფინანსებენ ოქსფორდის უნივერსიტეტის კვლევას ვაქცინის მიღების თაობაზე. ასევე გასცემენ დახმარებას საქველმოქმედო ორგანიზაციებისთვის.

Levi Strauss & Co. − ამერიკულმა კომპანიამ $3 მილიონი გაიღო, რათა დახმარებოდა ადამიანებს, რომლებიც ქსოვილის ინდუსტრიაში, მიწოდებისა და დისტრიბუციის ქსელში მუშაობენ. ასევე მხარს უჭერენ ბევრ ორგანიზაციას, აწარმოებენ თანამშრომელთა დასახმარებელ კამპანიას და აგზავნიან ნიღბებს მსოფლიოს სხვადასხვა ქვეყანაში. „ჩვენ ასევე ვცდილობთ აღმოვაჩინოთ პრობლემის გადაჭრის გზები, რათა მონაწილეობა მივიღოთ ნიღბების მიწოდებაში და შევისწავლოთ შესაძლებლობები, როგორც წარმოების, ასევე ინოვაციის კუთხით“, − ნათქვამია განცხადებაში.

H&M − H&M-ის ჯგუფმა შექმნა ტრანსპორტირების ჯაჭვი, რათა პერსონალური დამცავი აღჭურვილობა საავადმყოფოებისა და ჯანდაცვის სფეროში მომუშავე ადამიანებისათვის მიეწოდებინა. ეს მოიცავს ნიღბებს, ხელთათმანებსა და ხალათებს. ბრენდმა ასევე გაიღო $500 000 მსოფლიო ჯანდაცვის ორგანიზაციის ფონდისათვის.

Mango – „მანგომ“ ესპანურ საავადმყოფოებს ორი მილიონი ნიღაბი გადასცა. „ბრენდი მადლობას უხდის 15 000-ზე მეტ თანამშრომელს იმ უდიდესი შრომისთვის, რომელსაც ესპანეთში დაუღალავად სწევენ“.

Calzedonia − იტალიურმა ბრენდმა საკუთარი ქსოვილის ქარხნები ნიღბებისა და ხალათების წარმოებისთვის დათმო. სწრაფი ცვლილება მოხერხდა სპეციალური დანადგარების შეძენით და თანამშრომლების დატრენინგებით. იქ დღეში 10 000 ნიღაბი იწარმოება.

Louis Vuitton − ამ კომპანიამაც, კოლეგების მსგავსად, ქარხანა ნეიროქირურგიული ნიღბების წარმოებისთვის შეცვალა. „ჩვენ, როგორც ფრანგული მოდის სახლი, ვცდილობთ საკუთარი წვლილი შევიტანოთ ათასობით ნიღბის შექმნაში, რომლებიც რეგიონში უფასოდ გავრცელდება, რათა დავიცვათ ისინი, ვისაც საფრთხე ემუქრება“, − წერს ბრენდის დირექტორი მაიკლ ბურკი.

კორონავირუსი ფუნდამენტურად შეცვლის მოდის სამყაროს?
„დრო იცვლება და შინიდან მუშაობა ახალ დატვირთვას იძენს“, − დაწერა სოციალურ ქსელში სუპერმოდელმა ბელა ჰადიდმა და დაურთო ფოტომასალა, რომელზეც იტალიური „ვოგისთვის“ გადაღება დისტანციურ რეჟიმში, FaceTime-ით მიმდინარეობს. მან შემოქმედებითი გუნდისთვის ტელეფონის წინ იპოზირა, პირდაპირ რეჟიმში მათთან, ვინც ასევე საკუთარი სახლებიდან მუშაობენ.
მოდის სამყარომ გადადო ყველა უახლოესი მოდის კვირეული, ივლისის ჩათვლით. მოდის ბრენდები ცდილობენ გაუმკლავდნენ პანდემიის პროცესსა და შედეგებს. ბევრი იძულებულია შეაჩეროს წარმოება. მათ შეაჩერეს ახალ კოლექციებზე მუშაობაც. ჩვენებები უნდა გაგრძელდეს, მაგრამ როგორ? რა არის მოდის მომავალი?

მოდის კვირეულების წრე ოთხ ჯგუფად იყოფა: ბრენდები, წარმოება, მყიდველები და პრესა. რას ნიშნავს მოდის კვირეულების ტრანსფორმაცია ამ სექტორში მომუშავე ადამიანებისთვის?

ერთ-ერთი ყველაზე პრესტიჟული ბრენდის კრეატიული ხელმძღვანელი, ჯორჯო არმანი პირველი დიზაინერი იყო, რომელმაც თებერვალში, მილანის მოდის კვირეულზე საკუთარი შოუ პანდემიურ საფრთხედ გადაიაზრა. მან აიღო პასუხისმგებლობა და სტუმრებს სთხოვა ჩვენებას არ დასწრებოდნენ. ამის მაგივრად, მისთვის ონლაინ, Live-რეჟიმში ეყურებინათ. თუ ინდუსტრიას ფორმატის შეცვლა მოუწევს, არმანის იდეა ყველაზე ადვილად წარმოსადგენი გადაწყვეტილებაა. კოლექციების წარმოდგენა ამ მხრივ მოდის ფილმების იერს მიიღებს.

„ეს შესაძლოა იყოს ერთგვარი ფაზა იქამდე, სანამ ისევ ტრადიციულ შოუებს დავუბრუნდებით“, − აცხადებს მიშელ გობერი, ინდუსტრიის ცნობილი ხმის რეჟისორი, „შანელის“, „დიორისა“ და „ვალენტინოს“ ჩვენებების მუსიკალური არანჟირების ავტორი. „ფილმებით ჩანაცვლებული შოუები შესაძლოა ძალიან შთამაგონებელი და ძლიერი ეფექტის მომხდენი იყოს, მაგრამ ზემოქმედება არ იქნება ისეთივე, როგორც სამოსის რეალურ რეჟიმში, პოდიუმზე ხილვა“, − ამატებს ის. მართლაც, თუ ერთხელ მაინც ყოფილხართ მოდის ჩვენებაზე, მიხვდებით განსხვავებას ადგილზე დანახვასა და შემდეგ კოლექციის სურათებზე ხილვას შორის.

ტანისამოსს სულიერება არ გააჩნია. გარემო და მოძრაობა აცოცხლებს მას. ანიჭებს ხასიათს და მნიშვნელობას. შეუძლია ლაივსტრიმს ეს ასახოს? მოდის კვირეულების თვეს, რომელიც ლაივსტრიმებით იქნება გაშუქებული, აქვს პერსპექტივა? „ეს ბევრ დაგეგმვას მოითხოვს და მგონი ბრენდები არ არიან მზად სრულყოფილი ჩვენებები მხოლოდ ლაივისთვის გამართონ. კასტინგის წარმართვა კოშმარი იქნება − როგორ უნდა შეკრიბო 20 მოდელი ერთად და ყველაფერი ერთ ლოკაციაზე გააკეთო?“ − აღნიშნავს გობერი.

მოდას პოდიუმის ალტერნატივად ბევრი კარგი მაგალითი ახსოვს. მაგალითად, სტივენ მეიზელის ვიდეოები „ბალენსიაგას“ გადაღებისთვის, „შანელის“ ვიდეოები, რომელიც სოფია კოპოლას ანდეს და ა.შ. ეს ყველაფერი მოწმობს, რომ შესაძლებელია შოუ ფოტოსესიით ჩანაცვლდეს, ნაკლები ტანისამოსით და ნაკლები მოდელით. ეს ყველაფერი უფრო რთულადაა მყიდველების შემთხვევაში, რომლებმაც ქსოვილი ადგილზე უნდა დაათვალიერონ, რათა შესყიდვის გადაწყვეტილება მიიღონ. კლიენტის იმიჯის გასაუმჯობესებლად, მათ უფრო მჭიდრო კავშირი სჭირდებათ.

ლაივსტრიმის მეთოდი ინოვაციური და ხელსაყრელია, მაგრამ მოდის კვირეული თავის თავში ურთიერთობებს და საუბრებსაც მოიცავს, ინფორმაციულ გაცვლა-გამოცვლას, რაც სოციალური დისტანცირების პერიოდში შეუძლებელი ხდება. ამ გიგანტურ სფეროში მომუშავე ყველა სფეროს წარმომადგენელი აღნიშნავს, რომ მოდის კვირეული ძალიან სასარგებლოა ინდუსტრიისთვის. შოუების გაუქმებას ასევე უარყოფითი გავლენა აქვს გარშემო არსებულ მიკროინდუსტრიებზე: მაგალითად, ქუჩის სტილის ფოტოგრაფიაზე, რომელიც დიდი ბიზნესი გახდა; ფრილანსერებზე, რომლებიც შოუს ორგანიზებაში იღებენ მონაწილეობას. იზოლაციის კვირეებმა გვასწავლა, რომ ბევრი შეხვედრა შესაძლოა მხოლოდ და მხოლოდ mail-მიმოწერა ყოფილიყო, მაგრამ უზარმაზარი ინდუსტრიის კონფერენცია, რომელსაც მოდის კვირეული ჰქვია, შეუძლებელია Zoom-ის ზარში მოთავსდეს. დიზაინერები ყოველთვის მიმართავენ ინოვაციებს რთულ პერიოდებში და ვიმედოვნებთ, ამჯერადაც მივლენ კრეატიულ გადაწყვეტილებამდე.

განსაკუთრებული ყურადღება უნდა მიექცეთ პატარა ბრენდებს, რომლებსაც არ აქვთ ლაივსტრიმის ან მოძრავი ფოტოსესიის წარმოების საშუალება ისე, როგორც დიდ ბრენდებს. ამ პროცესში თუ ყველა სფეროს წარმომადგენელი ჩაერთვება, შესაძლოა ჩამოვაყალიბოთ უფრო მეტად მორგებადი ინდუსტრია, როგორც ორგანიზაციებისთვის, ასევე გარემოსთვის.

ერა – „ძალიან ბევრი არასდროსაა საკმარისი“ – დასრულდა, მაგრამ ეს იმას არ ნიშნავს, რომ დასრულდა მოდის შოუებიც მასთან ერთად. ისინი უბრალოდ ნაკლებად ხმაურიანი იქნება. თავშეკავებული შოუები უკვე წარმოგვიდგინეს „ვალენტინომ“ და „მარკ ჯეიკობსმა“. მათ გამოიყენეს არსებული გარემო სპეციალური მოწყობის გარეშე. მოდა თვითგანახლებისკენ მიისწრაფვის და ის ამას მოახერხებს. მაგრამ, ის ასევე ძალიან სოციალურია და შოუების „დაპატიმრება“ მას გაანადგურებს.

იტალიელ დიზაინერ ჯორჯო არმანის მიაჩნია, რომ „კოვიდ-19“-ის დასრულების შემდეგ სამყარო უწინდელი აღარ იქნება და მოდასაც მოუწევს ახალ რეალობაზე მორგება. პირველი, რასაც დიზაინერი ახსენებს, წარმოების მასშტაბების შემცირებაა. ის ფიქრობს, რომ საჭიროა მოდის შოუების რაოდენობა მინიმუმამდე დავიყვანოთ. ზაფხულისა და ზამთრის კოლექციების გაყიდვა კი წლის სეზონების მიხედვით დავიწყოთ. უარი ვთქვათ შუა-სეზონურ კოლექციებზე. თავად ჯორჯო არ გეგმავს Pre-Fall კოლექციები გამოუშვას: „მიმაჩნია, რომ საკმარისია ვაჩვენო ერთი კოლექცია, რომელიც თავის თავში მოიცავს მის წინა კოლექციასაც. თუ დავფიქრდებით, ძირითადი კოლექციისა და მისი წინა კოლექციის ჩვენებებს შორის ერთადერთი განსხვავება მხოლოდ მიწოდების თარიღებში მდგომარეობს“, − ამბობს არმანი.

ამასთან, მისი აზრით, ყურადღების ცენტრში უნდა მოექცეს სამოსი და არა სპეცეფექტები ან უჩვეულო კოლექციები, რომელთა გაფორმებაზეც კოლოსალური ბიუჯეტი იხარჯება. არმანი მოუწოდებს კოლეგებს, ზომით პატარა კოლექციები გამოუშვან და მოდის ჩვენებების რაოდენობა შეამცირონ. ის ფიქრობს, რომ უფრო მეტი ყურადღება უნდა გავამახვილოთ კლიენტთან პირად კომუნიკაციაზე, სადაც დიდ როლს თამაშობს ონლაინდასწრება.

ვნახოთ, დაუჯერებენ თუ არა იტალიელ ლეგენდარულ ფიგურას კოლეგები სამშობლოში და მის ფარგლებს მიღმა, მანამდე კი სუპერმოდელები სატელეფონო ზარით ჩაწერილი ფოტოსესიებით გაგვანებივრებენ, ხოლო მოდის ჟურნალები თეთრი ყდით – როგორც ეს იტალიურმა „ვოგმა“ გააკეთა.