იმ ადამიანებისთვის, რომლებსაც დილით ადრე ადგომა უჭირთ და სახლიდან დროულად გასვლა შეუძლებლად ეჩვენებათ: როგორ მოვასწროთ შხაპის მიღება, მაკიაჟის გაკეთება და საუზმე 40 წუთში? ამ ყველაფრის დროულად გაკეთება ალბათ ერთ-ერთი ყველაზე რთული საქმეა და შეიძლება ძალიან სტრესულიც იყოს, განსაკუთრებით კი ქალბატონებისთვის. შესაბამისად ჩვენ უნდა ვეცადოთ, რომ დღის ან კვირის მსგავსი სტრესითა და ნეგატიური განწყობით დაწყება თავიდან ავირიდოთ. ამისთვის OK!-ს გუნდი შემოგთავაზებთ 5 მარტივ გზას, რომლებიც დილის ეფექტურად და მშვიდად გატარებაში დაგეხმარებათ.
პირველი რაც აუცილებლად უნდა გააკეთოთ - გააკონტროლეთ დრო და წყლის ტემპერატურა შხაპის მიღებისას. დააყენეთ წამზომი აბაზანაში შესვლამდე, ისე რომ 15 წუთში შეგატყობინოთ, რომ დრო ამოგეწურათ. ამ 15 წუთიდან 5 წუთი კი სასურველია დაუთმოთ "კონტრასტულ შხაპს" , რომელიც თქვენს ორგანიზმს გამოფხიზლებაში დაეხმარება და თქვენი დღის დასაწყისს აუცილებლად გააუმჯობესებს.
მიუხედავად იმისა, რომ 21-ე საუკუნეში ეს შეიძლება შეუძლებლად მოგეჩვენოთ, შეწყვიტეთ ტელეფონის შემოწმება და ღამით მიღებულ ყველა შეტყობინებაზე პასუხის დილიდან გაცემა. აუკრძალეთ თავს ტელეფონის აღება სახლიდან გამოსვლამდე, რადგან ყოველი დამატებითი 2 ან 3 წუთი, რომელსაც თქვენი Instagram-ისა თუ Facebook-ის აპლიკაციაში გაატარებთ, წაიღებს თქვენს ძვირფას დროს, რის შედეგადაც გაიზრდება თქვენი დილის სტრესი.
ისეთი გადაწყვეტილებები, რომელთა მიღებასაც დიდ დროს მოანდომებთ, ეცადეთ მიიღოთ წინა ღამით. ასეთ გადაწყვეტილებებში შეიძლება შედიოდეს სასურველი სამოსის არჩევაც, თუკი თქვენ ამ პროცესს დიდ დროს უთმობთ.
არსებობს კიდევ ერთი დეტალი, რომელიც შეიძლება უმნიშვნელოდ მოგეჩვენოთ. აუცილებლად იქონიეთ ყველა ის ნივთი, რომლებსაც დილით მზადებისთვის იყენებთ, ისეთ ადგილას სადაც მათ მარტივად იპოვით. რათა ძებნის პროცესში დრო არ დაკარგოთ. ხშირად დილაობით, განსაკუთრებით მაშინ, როდესაც ჩვენს ორგანიზმს ჯერ კიდევ ნახევრად სძინავს, ძალიან გვიჭირს სავარცხლის, საყვარელი ტუჩის საცხისა თუ ტელეფონის დამტენის პოვნა. მიუხედავად იმისა, რომ ამაში ტრაგიკული არაფერია, სწორედ ასეთმა დეტალმა შეიძლება გამოიწვიოს თქვენი სტრესი, ამიტომ ვეცადოთ მსგავსი მომენტები თავიდან ავირიდოთ.
და ბოლოს, იმ ქალბატონების საყურადღებოთ, რომლებიც მაკიაჟის გაკეთებას ძალიან დიდ დროს ანდომებთ. ისევე როგორც შხაპის მიღებისთვის, მაკიაჟის გაკეთებისთვისაც უნდა გამოყოთ მაქსიმუმ 15 წუთი. გარდა ამისა ეცადეთ ყოველ დილით ყველა სახის მოვლისა თუ გალამაზების საჭირო პროდუქტი იქონიოთ გამზადებულ მდგომარეობაში, რათა მათ ძებნასა თუ მომზადებაში აღარ დაგეკარგოთ ზედმეტი 5 წუთიც კი, რადგან დილით, როდესაც სამსახურში, უნივერსიტეტსა თუ სკოლაში გაგვიანდებათ 5 წუთსაც გადამწყვეტი მნიშვნელობა აქვს!