ახალგაზრდა თაობა მას „ჰარი პოტერის“ ფილმებში, პროფესორ სევერუს სნეიპის როლით იცნობს, სხვა კი „რასპუტინითა“ და „რეალური სიყვარულით“. OK! კიდევ ერთხელ შეგახსენებთ თეატრისა და კინოს იმ იშვიათ მოვლენას, რომლის ნათამაშევი როლები მსოფლიოს საუკეთესო სიებშია მოხვედრილი. ბრწყინვალე ბრიტანელ მსახიობ ალან რიკმანზე, დღეს, სამწუხაროდ, უკვე წარსულ დროში უნდა ვისაუბროთ.

პროფესორი სნეიპი, ანუ იგივე ალან სიდნი პატრიკ რიკმანი 1946 წლის 21 თებერვალს დაიბადა ლონდონში. მომავალი მსახიობი ბავშვობიდან გატაცებული იყო ხელოვნებით: კარგად ხატავდა და სკოლის თეატრის სპექტაკლებშიც მონაწილეობდა. მიუხედავად იმისა, რომ ალანი გატაცებული იყო თეატრით, სკოლის დამთავრების შემდეგ, პროფესიად გრაფიკული დიზაინი აირჩია. ალანმა მისაღები გამოცდები ხელოვნების სამეფო კოლეჯში ჩააბარა და საკუთარი დიზაინერული კომპანიაც დააარსა.

კოლეჯში სწავლისას, ალან რიკმანმა, მომავალი მეუღლე რიმა ჰორტონი გაიცნო. წყვილი 2012 წელს ოფიციალურად დაქორწინდა, თუმცა ამის შესახებ ფართო საზოგადოებას, მსახიობმა, მხოლოდ 2015 წელს შეატყობინა. „დიახ, ჩვენ 3 წლის წინ დავქორწინდით. ეს იყო არაჩვეულებრივი. მხოლოდ მე და რიმა ვიყავით. ოფიციალური ნაწილის შემდეგ, ჩვენ ბრუკლინის ხიდზე გავისეირნეთ, ხოლო მოგვიანებით ვივახშმეთ. მე რიმას 200-დოლარიანი ბეჭედიც კი ვაჩუქე, მაგრამ არ უკეთია“, – ყვება რიკმანი ერთ-ერთ გამოცემასთან ინტერვიუში.

26 წლის ასაკში, ალან რიკმანმა გადაწყვიტა ყველაფერი თავიდან დაეწყო. დიახ, ის მიხვდა, რომ თეატრია მისი ცხოვრება, ამიტომ გამოცდები დრამატული ხელოვნების სამეფო აკადემიაში ჩააბარა. მსახიობმა სწავლის პერიოდშივე მოახერხა, რომ არაერთი პრესტიჟული თეატრალური ჯილდოს მფლობელი გამხდარიყო. აკადემიის დასრულებისთანავე, ალანი ლონდონის სცენის ერთ-ერთ წამყვან მსახიობად იქცა. სპექტაკლ „სახიფათო კავშირებში“ შესრულებული როლი, სადაც რიკმანი მთელი ბრწყინვალებით წარსდგა, სენსაციად იქცა. 1986 წელს, წარმოდგენა ბროდვეიზე მიიწვიეს, სადაც რიკმანი პროდიუსერმა ჯოელ სილვერმა შეამჩნია და განთქმულ ბლოკბასტერში „კერკეტი კაკალი“ მთავარი ბოროტმოქმედის როლი შესთავაზა.

„კერკეტი კაკალის“ შემდეგ, ჰოლივუდი რიკმანში სრულყოფილ ბოროტმოქმედს ხედავდა. მომდევნო რამდენიმე წელი, ის, ძირითადად, ნეგატიურ როლებს ასრულებდა. თუმცა ბრიტანულ ფილმებში რიკმანი მეტად პოზიტიური ხასიათის პერსონაჟებს განასახიერებდა.

რიკმანის პოპულარობა დღითი დღე იზრდებოდა. ფილმისთვის „რობინ ჰუდი: ქურდების უფლისწული“ მას მიენიჭა BAFTA – ნომინაციაში „საუკეთესო მსახიობი მამაკაცი მეორეხარისხოვან როლში“.

მიუხედავად წარმატებული კინოკარიერისა, ალან რიკმანს არაერთხელ უთქვამს უარი როლებზე ფილმებში, თეატრის გამო. თეატრი ხომ მისი ცხოვრება იყო, და ოცნებაც, ჰქონოდა საკუთარი თეატრი.

1990-იან წლებში, ალან რიკმანმა რამდენიმე წარმატებულ ფილმში ითამაშა, ხოლო 1997 წელს, პოტენციალი რეჟისურაშიც მოსინჯა. მან საკმაოდ გულისამაჩუყებელი ფილმი – „ზამთრის სტუმარი“ გადაიღო, სადაც მთავარ როლს ემა ტომპსონი ასრულებს. ფილმმა ვენეციის კინოფესტივალის ჯილდოს გარდა, არაერთი პრემია მიიღო.

2000 წელს კი, ახალი ერა იწყება, და არამხოლოდ მსახიობის ცხოვრებაში. დაიწყეს „ჰარი პოტერის“ პირველი ფილმის გადაღება. ალანი ერთ-ერთია იმ მსახიობთაგან, რომელსაც დაჟინებით ითხოვდა ჰარი პოტერზე შექმნილი წიგნების სერიის ავტორი, ინგლისელი მწერალი ჯოან როულინგი. რიკმანს პროფესორ სევერუს სნეიპის როლი ერგო, რომელიც ერთ-ერთ ყველაზე მნიშვნელოვან როლად იქცა მის კინოკარიერაში. ძნელია ისე ზუსტად შეარჩიო მსახიობი როლზე, როგორც ამ შემთხვევაში მოხდა. ალან რიკმანი წიგნში აღწერილი პერსონაჟის, თითქმის ზუსტი ანალოგია. მისი სახელი და გვარი ქართველი პოტერომანებისთვის კარგად არის ნაცნობი – ის ხომ საქართველოში რამდენჯერმე იყო.

ალან რიკმანი 2016 წლის 14 იანვარს, 69 წლის ასაკში, ლონდონში გარდაიცვალა. გარდაცვალების მიზეზი კი, ონკოლოგიური დაავადება გახდა.

ალან რიკმანის 5 ყველაზე გენიალური როლი:

„პარფიუმერი: ერთი მკვლელის ისტორია“ / PERFUME: THE STORY OF A MURDERER
მხოლოდ ერთი კადრი, რამდენიმე წამი, და ეს გენიალური მსახიობი ახერხებს გადმოსცეს მთელი სულიერი თუ ფიზიკური ტკივილი, რომელსაც შვილის დაკარგვისგან განიცდის. შეუძლებელია ამ კადრის ყურებისას მაყურებელმაც არ იგრძნოს ტკივილი. ეს ერთეულებს შეუძლიათ – როდესაც პერსონაჟი რეალობად იქცევა და მისი ტკივილის თუ სიხარულის თანაზიარი ხდები.

„თოვლის ნამცხვარი“ / SNOW CAKE
ემოციური და მომაჯადოებელი ფილმი, რომელშიც ალან რიკმანი მაყურებლის წინაშე წარდგება, როგორც კეთილი და მგრძნობიარე ადამიანი. ამ როლით, მან თითქოს საკუთარი თავი ითამაშა – წარმოუდგენლად თბილი და კომფორტული ალანი.

„სუინი თოდი“ / SWEENEY TODD
ნიჭიერი ადამიანი ყველაფერში ნიჭიერია. ამ მიუზიკლით, რიკმანმა გვაჩვენა, რომ იგი არა მხოლოდ გენიალური მსახიობია, არამედ არანაკლებ ფლობს ხმას და სიმღერაც შესანიშნავად შეძლებია. შესანიშნავი როლი, რომელიც თითქოს სპეციალურად რიკმანისთვის შეიქმნა.

„გამბიტი“ / GAMBIT
ამ ფილმით, ალან რიკმანმა თაყვანისმცემლების გაკვირვება ნამდვილად შეძლო. ვფიქრობ, ასეთი არაორდინარული პერსონაჟი, მისი როლების კოლექციაში, ნამდვილი მონაპოვარია.

„ჰარი პოტერი“ / HARRY POTTER
რიკმანის ლეგენდარული როლი – სევერიუს სნეიპი, რომელიც სწორედ ისეთია, როგორიც ჩვენს წარმოსახვაში, წიგნის კითხვისას.