ჯასტინ ბიბერმა ცოტა ხნის წინ საკუთარი სკანდალური რეპუტაციის გამოსწორებაზე დაიწყო ზრუნვა - მომღერალი ეკლესიასაც კი სტუმრობს ხშირად, თუმცა ბიბერის გულშემატკივრებმა მისი გადაწყვეტილების გამო გახარება ვერ მოასწრეს, რომ ახალგაზრდა გოგონების გულთამპყრობელი ისევ სკანდალში გაეხვა.
ამჯერად ბიბერს მერილინ მენსონთან მოუვიდა უთანხმოება. საქმე იმაშია, რომ ჯასტინმა მაისურების ახალი კოლექცია გამოუშვა, სადაც წინა მხარეს თავისი, უკანა მხარეს კი მენსონის ფოტოები განათავსა.
პირადად შეხვედრისას ჯასტინმა განაცხადა, რომ საკუთარი დიზაინერული მიგნებით როკერს აქტუალობა დაუბრუნა. მერილინმა ეს შეურაცხყოფად მიიღო და სათანადო პასუხიც გასცა ახალგაზრდა მომღერალს:
„მე ჯასტინს ერთ-ერთ რესტორანში შევხვდი, სადაც ძალიან ბევრი ცნობილი სახე იყო თავმოყრილი. უცებ ვარდისფერ პერანგში გამოწყობილი ქერა გოგონა დავინახე, რომელიც ჯასტინ ბიბერი აღმოჩნდა. მე მივედი მასთან და ვუთხარი: ესე იგი შენ ჩემს გამოსახულებიან მაისურს იცვამ სცენაზე, რაზეც ჯასტინი წყობიდან გამოვიდა და დაიწყო ყვირილი, რომ ამ ნაბიჯით ის კვლავ მაბრუნებდა მე დიდების კვარცხლბეკზე.“ - იხსენებს მენსონი.
ცოტა ხნის წინ მიცემულ ერთ-ერთ ინტერვიუში მენსონმა შექმნილ სიტუაციაზე გააკეთა კომენტარი. მისი სიტყვებით ჯასტინი არ იმსახურებს, რომ როკერმა საქმე მასთან კაცურად გაარჩიოს: „მე არ ვიცი რისთვის გააკეთა ეს ყველაფერი ბიბერმა, მართალი გითხრათ საერთოდაც ვერ ვხვდები მის საქციელს, რადგან არ შემიძლია ჯასტინის მსგავსად ციყვივით აზროვნება. მე არ ვჩხუბობ გოგონებთან. ამიტომ არც ჯასტინ ბიბერთან ვაპირებ ჩხუბს“.