“სიყვარული - ეს მთავარი ღირებულებაა“, „სიყვარული ყოველთვის იმარჯვებს“, „გულწრფელი სიყვარული არ ქრება“ - ბავშვობიდან გვესმის ეს და მსგავსი ტიპის ფრაზები და ჩვენც ვითავისებთ, რომ სიყვარულია ის ერთადერთი გრძნობა, რომელიც ყველა პრობლემას მოგვიგვარებს - გულწრფელი კოცნა გააცოცხლებს ფიფქიას, გააღვიძებს მძინარე მზეთუნახავს, „მონობიდან“ იხსნის კონკიას და ა.შ... თუმცა გადის დრო, ვიზრდებით და ცხოვრება სულ სხვანაირ რეალობას გვთავაზობს - ხშირად გვიცრუვდება იმედი, ხშირად სწორედ ამ მრავალჯერ გაგებული ფრაზების გამო გვგონია, რომ ჩვენი მეორე ნახევარი ვიპოვეთ და არ აქვს მნიშვნელობა როგორია ჩვენი ურთიერთობა მთავარი ხომ სიყვარულია, რომელიც ჩვენს მიერ შექმნილ პრობლემებს თავისით მოაგვარებს... თუმცა განგება დაგვცინის და ასე არ ხდება, ჩვენ კი ისევ გრძნობას ვაბრალებთ ყველაფერს. ურთიერთობები მთავრდება და ყოველი მეორე ქალი სვამს კითხვას: „რატომ მოხდა ასე? ყველაფერი ხომ იდეალურად იყო, რამდენ ენერგიას ვხარჯავდით ურთიერთობის შესანარჩუნებალად და უცებ - ბააახხ!! - და ყველაფერი დამთავრდა“
რატომ მთავრდება სიყვარული? ამ კითხვაზე შვიდი ძირითადი პასუხი არსებობს:
1. ის ვერ გრძნობს, რომ თქვენ მას აფასებთ
თუ თქვენ ცხოვრებაში ერთხელ მაინც დაინტერესებულხართ კაცის ფსიქოლოგიით გეცოდინებათ, რომ კაცებს არა მხოლოდ სურთ, არამედ ითხოვენ კიდეც აღიარებას. თუ ისინი ამ აღიარებას ვერ იღებენ მათი არსებობა უინტერესო ხდება, სული კი უბრალოდ უკვდებათ. იმის შეგრძნება რომ ისინი თქვენთის სასიცოცხლოდ აუცილებელნი არიან აძლევთ მათ სტიმულს მუდამ თქვენს გვერდით იყვნენ. თუ მამაკაცი გრძნობს, რომ ქალი მას სათანადოდ ვერ აფასებს ის დაანგრევს ურთიერთობას და არ აქვს მნიშვნელობა რამდენად ძლიერია თქვენი სიყვარული.
მხოლოდ მადლობის თქმა საკმარისი არ არის, აუცილებელია, რომ მამაკაცი გრძნობდეს თუ რამდენად მნიშვნელოვანია ის თქვენთვის და ყველაფერში ხედავდეს ქალის მხარდაჭერას. იმ კაცების უმეტესობა, რომლებმაც მიატოვეს საყვარელი ქალი ამტკიცებენ, რომ ისინი უბრალოდ ვეღარ გრძნობდნენ საკუთარ საჭიროებას ურთიერთობაში.
2. თქვენ შეიცვალეთ
ურთიერთობის დასაწყის ეტაპზე ორივე მხარე ცდილობს მოერგოს მეორეს, აკვირდება თითოეულ თავის საქციელს და ცდილობს მოაწონოს თავი მეორე მხარეს. თუმცა ეს არ ნიშნავს, რომ თქვენ ან თქვენი პარტნიორი სხვა ადამიანს თამაშობთ, არა! უბრალოდ ორივე თქვენგანი ცდილობთ ზედაპირზე გამოიტანოთ საკუთარი ყველაზე დადებითი მხარეები. თუმცა რაღაც პერიოდის შემდეგ წყვილები ყურადღებას ადუნებენ და ფიქრობენ, რომ უფლება აქვთ შეიცვალონ, რადგან მათი სიყვარული უკვე გამყარდა. თუმცა ეს სწორი შეხედულება არ არის - თქვენმა მამაკაცმა თქვენ შეგიყვარათ ისეთი, როგორიც გაგიცნოთ და რაღაც პერიოდის შემდეგ სავსებით სხვა ადამიანი შერჩა ხელში. დაფიქრდით, თუ თქვენი ამჟამინდელი ურთიერთობა რადიკალურად განსხვავდება იმისგან, საიდანაც დაიწყეთ, ესე იგი პრობლემა არსებობს.
ურთიერთობის დაწყებისას ქალი ცდილობს მუდამ იყოს ფორმაში, უვლის საკუთარ თავს და ეპრანჭება თავის პარტნიორს, მაგრამ გარკვეული დროის შემდეგ ყურადღებას ადუნებს, რადგან თვლის, რომ მათი სიყვარული ისედაც მყარია და დროა ნამდვილი სახე წარმოაჩინოს. ეს მამაკაცებს არ მოსწონთ. რა თქმა უნდა არავინ გთხოვთ, რომ ყოველთვის თვალისმომჭრელად გამოიყურებოდეთ, მაგრამ აუცილებელია იზრუნოთ საკუთარ გარეგნობაზე, ეს თქვენს თვითშეფასებაზეც იმოქმედებს, რაც უფრო დაგამშვიდებთ და ეჭვიანობის ნაკლებ საბაბს მოგცემთ.
ის, რომ რაღაც პერიოდის შემდეგ თქვენ შეიცვლებით ეს ფაქტია და აუცილებელიცაა, თუმცა ეცადეთ ყოველთვის გაავლოთ პარალელი ამჟამინდელ და ახლად დაწყებულ ურთიერთობებს შორის და ეცადეთ ამჟამინდელი ურთიერთობა რამდენიმე ნაბიჯით უსწრებდეს დასაწყისის ბედნიერებას.
3. ის გრძნობს, რომ თქვენ არ ხართ მასთან ბედნიერი
ეს პუნქტი პირდაპირ კავშირშია პირველ პუნქტთან - თუ მამაკაცი იფიქრებს, რომ თქვენ არ ხართ მასთან ბედნიერი, ჩათვლის, რომ არ გჭირდებათ და წავა. თქვენთვისაც ხომ გამაღიზიანებელია, როდესაც თვლით, რომ რაღაც ღირებული გააკეთეთ და სხვები ამას არ გიფასებენ, თუნდაც სამსახურში თქვენს შრომას არ აფასებს უფროსი და თქვენ გიჩნდებათ, სურვილი რომ მიატოვოთ სამსახური. იგივე ხდება კაცის შემთხვევაშიც - თუ კაცი ფიქრობს, რომ ის თქვენთვის აკეთებს რაღაცას, თქვენ კი ამის სანაცვლოდ უკმაყოფილებას გამოხატავთ და ეს ცუდ ხასიათზე გაყენებთ, კაცი ფიქრობს, რომ თქვენ უსამართლოდ ექცევით. ასე, რომ როგორც კარგ თანამშრომელს, ასევე მამაკაცსაც სჭირდება წახალისება, იმისთვის, რომ „საქმე“ კიდევ უფრო კარგად გააკეთოს. გახსოვდეთ, რომ როგორც კარგ სამსახურში უფროსისა და თანამშრომლის, ასევე კარგ ურთიერთობაში ქალისა და მამაკაცის ქმედებები ერთმანეთთან ურთიერთპროპორციულია.
4. ერთმანეთთან საუბარი მუდამ უარყოფითად გმუხტავთ
თუ წყვილის საუბარში უფრო მეტი უარყოფითია, ვიდრე დადებითი, ურთიერთობა ერთ დიდ ტვირთად აღიქმება. როგორც წესი, ეს მაშინ ხდება, როდესაც ორივე პარტნიორი ურთიერთობას განიხილავს, როგორც ბედნიერების ერთადერთ შესაძლებლობას, იმის მაგივრად, რომ სხვაგანაც დაიმუხტონ პოზიტივით და გაუზიარონ ის ერთმანეთს.
დამერწმუნეთ, ქალი, რომელიც ჯიუტად ელოდება, რომ ის გააბედნიერონ მამაკაცისთვის მხოლოდ და მხოლოდ ტვირთად იქცევა.
ძალიან იშვიათია ურთიერთობაში ზედმეტად მომთხოვნი და ისტერიკის მოყვარული მამაკაცი, რადგან მათი ლოგიკა ძალიან მარტივია: საჭიროა გავექცეთ ნეგატივს და დავიტვირთოთ პოზიტივით. რა თქმა უნდა, ცხოვრებაში ყველას აქვს მძიმე პერიოდები და არასწორია იმაზე ფიქრი, რომ თქვენი წყვილი ამ პრობლემებს არასდროს არ შეეჯახება. მაგრამ თუ ნეგატივი თქვენი ურთიერთობის მუდმივ თანმდევად იქცა, გადამწყვეტი ზომების მიღება ხდება აუცილებელი, წინააღმდეგ შემთხვევაში თქვენი წყვილი ძალიან მალე დაიშლება.
5. თქვენ განსხვავებული ინტერესები გაქვთ
ამ ფაქტორის გაუთვალისწინებლობა ნამდვილად არ ღირს. ჩვენ ხშირად ვფიქრობთ, რომ „სიყვარული ყველა სიძნელეს გადალახავს“ - სიყვარული, რომ ცალკე პიროვნება ყოფილიყო შეიძლება გადაელახა კიდეც, თუმცა არ დაგავიწყდეთ, რომ სიყვარული თქვენი გრძნობაა, რომელსაც ორ ადამიანს შორის ურთიერთგაგება ქმნის. საერთო ინტერესების გარეშე ნებისმიერ ადამიანთან საუბარიც კი რთულია და წარმოიდგინეთ რამდენად დიდი მნიშვნელობა აქვს ამ ფაქტორს, მაშინ, როდესაც საქმე თანაცხოვრებას და ყოველ დღე ერთი და იგივე ადამიანთან კონტაქტს ეხება.
დაფიქრდით რამდენჯერ გიკამათიათ დედასთან, მამასთან ან ოჯახის სხვა წევრთან იმიტომ, რომ თქვენი ინტერესები არ დამთხვევია ერთმანეთს. ალბათ გსემენიათ ფრაზა: „მშობლებს არ ირჩევენ“, რაც ნიშნავს იმას, რომ ნებისმიერი კონფლიქტის შემთხვევაში მშობელი მაინც მშობლად დარჩება, თუმცა ჩვენ თავად ვირჩევთ ჩვენს პარტნიორს, შესაბამისად ამ მხრივ საკუთარი თავის გარდა სხვა შეზღუდვები არ გვაქვს. ჩვენი ინტერესები არის ერთ-ერთი მთავარი შემადგენელი ნაწილი ჩვენი პიროვნების შესაქმენლად. ჩვენ ასეთებად ვიბადებით და თუ გვიყვარს საღამოს მშვიდად გატარება, ჩვენს პარტნიორს კი პირიქით ხმაურიანი საღამოები იზიდავს ერთ-ერთის დათმობის გარეშე საღამოს თითქმის ვერასდროს გავატარებთ ერთად. რა თქმა უნდა დათმობაზე წასვლა აუცილებელია, თუმცა ეს მოჩვენებითი იქნება და თავს ბედნიერად ვერ გვაგრძნობინებს. თუ ურთიერთობაში ინტერესების მსგავსი კონფლიქტები ძალიან ხშირია, შესაბამისად კი თავს ვერ გრძნობს რომელიმე მხარე ბედნიერად, წყვილიდან ერთ-ერთი აუცილებლად იღებს გადამჭრელ ზომებს, ძირითადად კი ასეთი გამბედაობით მამაკაცები გამოირჩევიან.
6. მის შეცვლას ცდილობთ
„მე მას შევცვლი“ - ეს არის ყველაზე დიდი შეცდომა, რომელიც შეიძლება ქალმა დაუშვას ურთიერთობაში. არ აქვს მნიშვნელობა რამდენად დელიკატურად ცდილობთ მამაკაცის შეცვლას - ის მაინც იგრძნობს, რომ თქვენ მას ასამართლებთ და გსურთ მისგან გამოძერწოთ თქვენთვის სასურველი თოჯინა. ზემოთ ხსენებული ფრაზის გაგონებისას პირველი კითხვა რაც იბადება არის - თუ არ გაკმაყოფილებთ მამაკაცი ისეთი როგორიც არის, რატომ ცდილობთ მასთან ყოფნას?
რა თქმა უნდა, არსებობს რაღაც საკითხები, რომელიც ძალიან ზედაპირულია და გვგონია, რომ მამაკაცები თვითონ ვერ იაზრებენ თავიანთ მინუსებს, მაგრამ დამერწმუნეთ ამ მინუსებზე ნებისმიერი სახით მითითება ყველა ადამიანისთვის ძალიან შეურაცხმყოფელია. გასაგებია, რომ საკმაოდ რომანტიკულად გვეჩვენება მამაკაცების მიერ ნათქვამი ფრაზა: „სიყვარულმა სავსებით გამომცვალა“, რადგან ამ დროს ჩვენი თვითშეფასება ერთი-ორად იზრდება, მაგრამ სხვის თვითშეფასებაზეც ხომ უნდა ვიფიქროთ. დაიმახსოვრეთ თუ მამაკაცს სურს, რომ შეიცვალოს ამას თავისითაც მოახერხებს, ხოლო თუ მას საკუთარი თავი ისეთი მოსწონს როგორიც არის, თქვენი მცდელობა მხოლოდ გააღიზიანებს.
7. არ ხართ დამოუკიდებელი
თუ თქვენ ემოციურად ზედმეტად დამოკიდებული ხართ თქვენს პარტნიორზე არაფერ კარგს არ ელოდოთ. როგორც წესი ასეთი ურთიერთობა ძალიან მალე ხდება ტოქსიკური - დამერწმუნეთ არავის არ უყვარს, როდესაც თავისუფალ დროს არ უტოვებენ, განსაკუთრებით კი მამაკაცებს, რომელთაც ყოველთვის აქვთ თავისი ბედნიერი სამყარო, სადაც თავს მშვიდად გრძნობენ. ისინი ამ სამყაროს ყველაზე მეტად აფასებენ დედამიწის ზურგზე. ამიტომ თუ თქვენ შეეცდებით ხშირად მოპაროთ საკუთარი თავისთვის განკუთვნილი დრო ის იგრძნობს ზეწოლას და წავა.
ემოციური ძალადობა - ეს ძალიან დიდი ცოდვაა. დააფასეთ ავტონომია ურთიერთობებში, იცხოვრეთ დამოუკიდებლად, იმისთვის, რომ შექმნათ იდეალური კავშირი. ჩათვალეთ, მამაკაცის მიერ საკუთარი თავისთვის გამოყოფილი დრო თქვენზეც კარგად აისახება, რადგან ის იქნება უფრო დამშვიდებული და თქვენც მეტად გაგაბედნიერებთ. მამაკაცებს ხშირად არ შეუძლიათ აუხსნან თავის მეორე ნახევარს თუ რა არ მოსწონთ ურთიერთობაში ამიტომ უბრალოდ წასვლას არჩევენ.
