4 ივლისს გარემოსა და ბუნებრივი რესურსების დაცვის სამინისტროს მხარდაჭერით ჟურნალ OK!-ის მიერ ორგანიზებული მწვანე წვეულება გაიმართა!
ღონისძიებას, რომელიც „თბილისი გარდენსში“ საღამოს 7 საათზე გაიმართა, მთავრობის, ბიზნესისა და შოუ ბიზნესის წარმომადგენლები დაესწრნენ, რომელთაც ეროვნული საშენი მეურნეობის ნერგები გადაეცათ საჩუქრად. ღონისძიებაზე დაცული ტერიტორიების შესახებ გადაღებული ფილმის ჩვენებაც შედგა.
როგორც გარემოსა და ბუნებრივი რესურსების დაცვის სამინისტროში აცხადებენ, სამინისტრო მიესალმება მედიის, კერძო სექტორისა და სახელმწიფოს თანამშრომლობას მწვანე თემატიკის პოპულარიზაციის საქმეში და მომავალშიც დაუჭერს მხარს მსგავს აქტივობებს იმისათვის, რომ როგორც საზოგადოების, ისე ბიზნესის მაქსიმალურად დიდმა ნაწილმა გაითავისოს ეკოლოგიური პროექტების და ზოგადად ეკო ინიციატივების მნიშვნელობა ჯანსაღი გარემოს შექმნაში.
მაიკო წერეთელი, ჟურნალ OK!-ის აღმასრულებელი დირექტორი: „დღევანდელი საღამო მთლიანად მწვანე თემატიკას მივუძღვენით, გაფორმება და დეკორაციაც ეკო მიდგომებით გავიაზრეთ. დიდი მადლობა გარემოსა და ბუნებრივი რესურსების დაცვის სამინისტროს მხარდაჭერისთვის, რაც სტიმულს გვაძლევს მწვანე თემატიკაზე მუშაობა გავაგრძელოთ და საზოგადოების უფრო დიდ ნაწილს მივაწოდოთ ინფორმაცია და მეტი ინტერესი გავუჩინოთ ეკო პროექტების მიმართ.“
ასევე, წვეულებაზე გაიმართა OK!–ის აპლიკაციის პრეზენტაცია, რომელიც მომხმარებელს გაუმარტივებს ჟურნალის მიერ მოწოდებული სიახლეების წაკითხვას.
