რა გვასწავლა 2020 წელმა? ეს ბანალური შეკითხვა ისმის ბოლო რამდენიმე თვეა და პასუხებიც ძალიან ბევრია − ზოგი მარცხზე და ნეგატიურ მოვლენებზე ვსაუბრობთ, ზოგი თავსდატეხილ ცვლილებებზე, რომელსაც არავინ ველოდით და არც მზად ვიყავით ამ ცვლილებებისთვის. ზოგიც ცდილობს 2020 წელს მიღებული გამოცდილება სამომავლოდ გამოიყენოს...
„ადამიანები ადამიანებისთვის“ − ასე დავასათაურებდი 2020 წელს.
ერთი, რაც დანამდვილებით ვნახეთ 2020-ში, არის ის, რომ ადამიანებმა შეუძლებელი შეძლეს − ემპათიამ და ერთმანეთის მიმართ გაწეულმა თანაგრძნობამ თუ დახმარებამ, უპრეცედენტოდ დიდი როლი ითამაშა პანდემიის დროს.
დახმარების ახალი და ძალიან ეფექტიანი მეთოდებიც გაჩნდა. სოციალური ქსელებით ხალხმა შეძლო წარმოუდგენლად დიდი რესურსის თავმოყრა და მობილიზება, სწორი გადანაწილება − შინ მარტო დარჩენილ უნუგეშო ადამიანებს ექიმები თუ სხვა სფეროს სპეციალისტები მსოფლიოს სხვადასხვა ქვეყნიდან მკურნალობდნენ, ამშვიდებდნენ, გვერდით ედგნენ. უსახსროდ დარჩენილი ოჯახებისთვის დახმარებასაც სოციალური მედიით შექმნილი ჯგუფები აორგანიზებდნენ. რთულია იმ ყველაფრის ჩამოთვლა, რასაც ჩვენი თვალით დღემდე ვუყურებთ. ვუყურებთ ახალგაზრდებს, რომლებსაც მანქანით დააქვთ ძაღლების საკვები და ქუჩაში უპატრონოდ დარჩენილ ძაღლებს კვებავენ. და ეს ყველაფერი მართლა ხდება, ადამიანებში ემპათიის გრძნობა არ დაკარგულა, არამედ პირიქით − უფრო გაძლიერდა და გაცილებით დიდი მნიშვნელობაც შეიძინა.
ეს ჩემთვის ბოლო სარედაქტორო სვეტია 2020 წელს. როდესაც ჟურნალი OK! გამოვა, უკვე 2021 წელი იქნება და მხოლოდ კარგზე, მხოლოდ დადებით მოვლენებზე, ბედნიერებაზე, ცხოვრების საუკეთესო მომენტებზე და უძვირფასეს ემოციებზე მინდა ვისაუბრო ჩემი სვეტის დასასრულს.
მეტი სიყვარული არის ერთადერთი გზა ბედნიერებისკენ. ბედნიერება კი ზუსტად ის არის, რასაც ვერსად იპოვი − ის ჩვენშია მხოლოდ. არ არსებობს ბედნიერება, რომელიც შენგან გარბის და შენ ცდილობ დაეწიო. ბედნიერებას ვერ აედევნები და ვერც დაეწევი, რადგან ის სულ მცირე დეტალებშია, ჩვენს სულშია და ჩვენს ემოციებს ეხება მხოლოდ. საახალწლოდ ზუსტად იმაზე ვფიქრობ, ვიყოთ ბედნიერი იმით, რაც გვაქვს და არ გავედევნოთ იმას, რაც ჩვენგან მიდის. თუ ვიფიქრებთ ცოტა მეტს, ვნახავთ, რომ საკუთარი სახლი არის ბედნიერება, ბედნიერება არის ოჯახი, ბედნიერება არის მეგობრები, ბედნიერება არის საქმე, ბედნიერებაა ყველა დილა და ღამეც, და თუ ამ ყველაფერში სიყვარულს ჩავდებთ, ბედნიერება მუდამ იქნება ჩვენში და ვერსად წავა. ბედნიერება სიკეთის კეთებაშია, გაცემაშია, სხვის ფეხზე დაყენებაშია, თანაგრძნობაშია.
მინდა ყველას გისურვოთ, გეპოვოთ ბედნიერება თქვენში და ამ 2021 წელს ბევრი ბედნიერი წუთი გქონოდეთ, ბევრი დადებითი ემოცია მიგეღოთ!
სიყვარულით, ნინო ჯიბლაძე
ჟურნალ OK!-ის მთავარი რედაქტორი
