Foxy ზოომაღაზიაა, რომელიც აერთიანებს შინაური ბინადრებისთვის საჭირო საკვებს, მოვლის საშუალებებს, აქსესუარებსა და მათი სასტუმროში განთავსების სერვისს. OK! Foxy-ის დამფუძნებელს, ბათუ კოღოშვილს გაესაუბრა. მას მიაჩნია, რომ ცხოველები ადამიანის ერთგული მეგობრები არიან, რომელთაც ყურადღება და მზრუნველობა სჭირდებათ.
ბათუ, გვიამბეთ Foxy-ის ისტორია, თუ რა გახდა თქვენი მაღაზიის გახსნის ინსპირაცია.
ვინაიდან მცირე ასაკში დავინტერესდი ცხოველებთან დაკავშირებული საკითხებით, გადავწყვიტე, მომეძიებინა ის ადამიანები, რომელთა შეხედულებებიც ამ საკითხთან დაკავშირებით თანხვედრაში იქნებოდა ჩემს მოსაზრებებთან და ამ მიმართულებით მემუშავა. შესაბამისად, 2018 წლის 28 თებერვალს გავხსენით მაღაზია Foxy და აქტიურად დავიწყეთ მუშაობა.
გვესაუბრეთ Foxy-ში წარმოდგენილი პროდუქციის შესახებ.
ჩვენ მომხმარებელს ვთავაზობთ ცხოველთა როგორც ეკონომხარისხის, ისე სუპერპრემიუმხარისხის საკვებს. მაღაზია Foxy-ში აგრეთვე ხელმისაწვდომია შინაური ბინადრების აქსესუარებისა და მოვლის საშუალებების შეძენაც. გვაქვს ცხოველთა სასტუმროში განთავსების სერვისიც. ასევე, საჭიროების შემთხვევაში, გავცემთ რჩევებს მათთვის, ვისაც ცხოველის აყვანის სურვილი აქვს.
თქვენ ახსენეთ ცხოველთა სასტუმროები. გვიამბეთ ამის შესახებ უფრო დეტალურად.
Foxy თავის მომხმარებლებს სთავაზობს შინაური ცხოველების მოვლის სერვისსაც, რაც გულისხმობს შემდეგს: იმ შემთხვევაში, თუ მათ აქვთ გადატვირთული გრაფიკი ან/და ქალაქიდან უწევთ გასვლა და არ იციან ვის დაუტოვონ თავიანთი ოთხფეხა მეგობარი, შეუძლიათ ჩვენ მოგვმართონ. ამ სერვისის ფარგლებში, კლიენტები ცხოველებს ტოვებენ სასტუმროებში, რის შემდეგაც მათ ეძლევათ გარანტია, რომ მოვლილი და საღსალამათი დაუბრუნდებათ.
მთავარი ნიშა, რომელიც Foxy-ის სხვა ზოომაღაზიებისგან გამოარჩევს...
ჩვენთვის Foxy არ არის მხოლოდ სავაჭრო ობიექტი. ჩვენთვის Foxy წარმოადგენს იდეას, რაც მდგომარეობს ცხოველების დაცვასა და მოვლაში. ამის ნათელი მაგალითია, ჩვენ მიერ გაწეული დახმარება ცხოველთა დამცველებისათვის. აღსანიშნავია ისიც, რომ საკუთარი სახსრებით ვცდილობთ ტყეში მცხოვრები უპატრონო ცხოველების მოვლას. გავიხსენებ ერთ ისტორიას ამასთან დაკავშირებით: ძაღლების გამოსაკვებად გამართულ ერთ-ერთ გასვლით აქციაზე მამკოდისა და საბადურის ტყეში ვიპოვე მელიის ლეკვი, რომელსაც სავარაუდოდ ბრაკონიერებმა დედა მოუკლეს. იგი იმდენად იყო დასუსტებული, რომ ვერც კი დადიოდა. ჩვენ ჩამოვიყვანეთ ის ლეკვი და ვუვლიდით. დაახლოებით სამი კვირა დაგვჭირდა მის გამოსაჯანმრთელებლად. ვუმკურნალეთ, გამოვკვებეთ და როდესაც ფეხზე დადგა, ძალიან შეგვეჩვია. სახელიც კი დავარქვით − „კარმა“. გვინდოდა ის ჩვენთან დაგვეტოვებინა, მაგრამ ამის საშუალებას არც კანონმდებლობა გვაძლევდა და არც მორალური უფლება გვქონდა, რომ ცოცხალი არსება, რომელიც გაჩენილია ბუნებაში, ჩვენს ტყვეობაში გვყოლოდა. შესაბამისად, „კარმა“ ისევ იმ ადგილას დავაბრუნეთ, საბადურის ტყეში, საიდანაც წამოვიყვანეთ. პირადად მე, გული ძალიან დამწყდა, რადგან, როდესაც მომჯობინდა, ჩემთან ცხოვრობდა. კიდევ ერთი მიზეზი იმისა, თუ რატომ გავუშვით იგი ამ დროის შემდეგ ისევ ტყეში, ის იყო, რომ ადამიანებს ძალიან არ შეჩვეოდა, რადგან ისევ ბუნებაში მოუწევდა საბოლოოდ დაბრუნება. იმ შემთხვევაში კი, თუ მას ადამიანების მიმართ შიში გაუქრებოდა, მარტივად შესაძლოა გამხდარიყო ბრაკონიერებისა და სხვათა ნადავლი. ამ ამბით მინდოდა მეთქვა, რომ ჩვენ ის ვართ, რასაც ვაკეთებთ.
სად შეუძლია მომხმარებელს თქვენი პროდუქციის შეძენა?
ამჟამად გვაქვს ორი მაღაზია გლდანის პირველი მიკროს მეორე კორპუსსა და მეშვიდე მიკროს გადასასვლელ ხიდთან. გარდა ამისა, მომხმარებელს შეუძლია პროდუქციის ნებისმიერი ადგილიდან შეკვეთა და ჩვენ უმოკლეს დროში მივაწვდით მას შენაძენს.
გვესაუბრეთ თქვენი პროდუქციის ხარისხისა და ფასის შესახებ.
Foxy მუშაობს ბრენდებზე. შესაბამისად, ვთანამშრომლობთ ისეთ მსხვილ კომპანიებთან, როგორებიცაა Diplomat Georgia და Master-trade − საქველმოქმედო მიმართულებით. მათ აქვთ საერთაშორისო ბრენდების პროდუქცია, რომლებსაც ვიღებთ და შემდეგ უკვე მომხმარებელს ვაწვდით. აქედან გამომდინარე, ყველაფერი, რისი შეძენაც ჩვენთან შეიძლება, არის სრულიად ჯანსაღი და მაღალი ხარისხის. აღსანიშნავია ისიც, რომ Foxy-ში ჩვენს კლიენტს შეუძლია შეიძინოს როგორც ცხოველების, ისე ფრინველთა საკვები. რაც შეეხება ფასს, მაქსიმალურად ვცდილობთ, ძალიან დაბალი იყოს. მეტიც − კომენდანტის საათის გამოცხადების შემდეგ, ერთი თვის განმავლობაში, ჩვენი პროდუქციის ფასი თითქმის განახევრდა, რათა ყველასთვის ყოფილიყო ხელმისაწვდომი. მიუხედავად იმისა, რომ ეს პერიოდი წაგებაზე ვმუშაობდით, მაინც ბედნიერები ვიყავით, რადგან ამით დახმარებას ვუწევდით იმ ადამიანებს, ვისაც შინაური ბინადრები ჰყავდათ.
გვიამბეთ თქვენი სამომავლო გეგმების შესახებ.
დეკემბერში ჩვენ ვაპირებთ დიდი მაღაზიის გახსნას, აგრეთვე არასამთავრობო მიმართულებით მუშაობის დაწყებას ცხოველთა დაცვის კუთხით. ჩვენთვის ყველაზე მთავარი და პრიორიტეტული საკითხი, მიუსაფარ ცხოველთა დახმარებაა.
რას ურჩევდით ჩვენს მკითხველს?
ძალიან მინდა, საზოგადოება უფრო მეტად ცდილობდეს საკუთარ შვილებში ცხოველებისადმი სიყვარულის გაღვივებას. აგრეთვე ჩემი დიდი სურვილია, ადამიანები არათუ არიდებდნენ თავს მიუსაფარ ცხოველებს, არამედ ეხმარებოდნენ მათ.
ტექსტი: მარიამ მთივლიშვილი
საკონტაქტო ინფორმაცია:
Facebook: Pet store Foxy; ზოომაღაზია „ფოქსი“
555 70 05 32