ახალი წელი ის დღესასწაულია, რომელიც ოცნებების ასრულებას უკავშირდება. მასთან ასოცირდება საჩუქრები, დროის საყვარელ ადამიანებთან ერთად თბილ გარემოში გატარება, თოვლი, ფერადი სათამაშოებით მორთული ნაძვის ხე და ყველაზე მთავარი სანტა კლაუსი. Coca-Cola-ს კომპანია წლებია, საშობაო რეკლამების შექმნით არის დაკავებული, რაც მარკეტინგული თვალსაზრისით მეტად მომგებიანი აღმოჩნდა. OK! გთავაზობთ Coca-Cola-ს რიგით მე-100 საახალწლო რეკლამას, რომელიც გადაღებისთანავე ძალიან სწრაფად გაპიარდა და გულგრილს ვერავის ტოვებს.

უპირველეს ყოვლისა, უნდა აღინიშნოს ის გზა, რომელიც კომპანიამ სარეკლამო შეტყობინების სიმბოლური ფორმით წარსადგენად შეარჩია, რითაც მჭიდროდ დაუკავშირა ახალი წელი და თავისი პროდუქტი ერთმანეთს. თუმცა Coca-Cola-ს ახალი რეკლამა ყველა სხვა დანარჩენისაგან გამორჩეული აღმოჩნდა ემოციური თვალსაზრისით, რადგან მისი ყურების შემდგომ თვალიდან ნაზად ჩამოგორებული ცრემლი და ბედნიერებისგან სასიამოვნოდ აჩქარებული გული გვრჩება. ემოციურია რეკლამის სლოგანიც: “This Christmas, give something only you can give”. ამ ფრაზითა და გახარებული მამა - შვილის შეხვედრის კადრით სრულდება ვიდეორგოლი, რომელიც იწყება იმ ამბის ჩვენებით, თუ როგორ ცდილობდა მამა თავისი გოგონას წერილი სანტასთვის პირადად გადაეცა.

სიმბოლურია, ის ფაქტიც, რომ Coca-Cola-ს მანქანის მძღოლი აღმოჩნდა სანტა, რომელმაც იმედგაცრუებული მამა სახლში დააბრუნა და ამით გოგონას სურვილი აასრულა. ამით ხაზი გაესვა Coca-Cola-ს კომპანიის მიერ წარმოებული პროდუქტის ჯადოსნურობასა და ზღაპრულ ძალას. აგრეთვე არ დავივიწყოთ რეჟისორ ტაიკა უაიტიტის მიერ რეკლამაში გამოყენებული ფერებიც, რომლებიც ბედნიერებასთან ასოცირდება. ყოველივე ეს კი ჩვენი საახალწლო განწობის შექმნას უზრუნველყოფს.

ავტორი: მარიამ მთივლიშვილი