გასული რამდენიმე დღე განსაკუთრებულად დაძაბული იყო კიმ კარდაშიანისა და კანიე უესტის ცხოვრებაში, რადგან რეპერმა, რომელიც ამერიკის შეერთებული შტატების პრეზიდენტობაზე იყრის კენჭს, საჯაროდ ისაუბრა იმაზე, რომ კიმთან ერთად, პირველი შვილის - ნორთის აბორტზე ფიქრობდა, რასაც დღეს ნანობს.
ამ ფაქტის გასაჯაროებას დიდი გამოხმაურება მოჰყვა, რასაც მოგვიანებით რეპერის მიერ გამოქვეყნებული კიდევ ერთი ტვიტი დაემატა. ის აღნიშნავდა, რომ კიმს მისი ექიმებთან გამოკეტვა სურდა, რაც საბოლოო ჯამში სიმართლეც აღმოჩნდა. კიმ კარდაშიანის თქმით, რეპერი ბიპოლარული აშლილობით იტანჯება და ამ ყველაფერთან ბრძოლა საკმაოდ რთულია. თუმცაღა მეუღლისგან განსხვავებით, მას აქამდე არასდროს გაუსაჯაროებია ოჯახური პრობლემები.
შექმნილი ვითარება, როგორც ჩანს, რეპერის უმცროსმა მეგობარმა - ჯასტინ ბიბერმა განმუხტა, რომელიც რეპერს ესტუმრა, რამდენიმე საათში კი, კანიემ მეუღლეს საჯაროდ მოუბოდიშა ჩადენილის გამო.
პოსტში რეპერი აღნიშნავს, რომ სწუხს იმის გამო, რომ ოჯახური საკითხები საზოგადოებამდე მიიტანა, რითიც გული დასწყვიტა კიმს. რეპერმა კიმს მადლობაც გადაუხადა იმის გამო, რომ მეუღლის გვერდით ყოველთვის სანდო პარტნიორად დგას.