ელექტრონული წიგნების მაღაზია LIT.GE უკვე წლებია, რაც საზოგადოებას უამრავ წიგნზე წვდომის შესაძლებლობას აძლევს, რაც კიდევ უფრო აადვილებს და შესაბამისად, ზრდის მკითხველთა რაოდენობას. OK! LIT.GE-ის დირექტორ ავთო სულაძეს ესაუბრა, რომელიც გვიამბობს, რამდენ წიგნზე წვდომაა ვებგვერდის მეშვეობით შესაძლებელი და რამდენად გაიზარდა ბოლო წლების განმავლობაში მკითხველთა რაოდენობა.
როგორია ელექტრონული წიგნების მკითხველთა რაოდენობა და აქტივობა?
ელექტრონული წიგნების მაღაზია Lit.ge-ის ჰყავს 100 ათასზე მეტი რეგისტრირებული მომხმარებელი. ბევრი მათგანი მუდმივად ავსებს თავის ელექტრონულ ბიბლიოთეკას ახალი წიგნებით.
რამდენად გაიზარდა მკითხველთა რაოდენობა ბოლო წლების განმავლობაში?
ბოლო წლებში საკმაოდ გაიზარდა მომხმარებელთა რაოდენობა. დაახლოებით, წლიური 20%-იანი ზრდაა. თუმცა უკეთეს დინამიკას ვისურვებდით.
თქვენი აზრით, ჩაანაცვლა თუ არა ელექტრონულმა წიგნებმა ბეჭდური გამომცემლობა?
ჯერჯერობით, ელექტრონული წიგნი მნიშვნელოვნად ვერ ანაცვლებს ნაბეჭდ ვერსიებს. დაახლოებით 2-3% იქნება ბაზარზე ელექტრონული წიგნების წილი.
როგორ გესახებათ ამ პროცესის განვითარება?
ვფიქრობთ, თანდათან უფრო მეტი მომხმარებელი ირჩევს ელექტრონულ წიგნს. დაჩქარდება გავრცელების ტემპიც. ამას უპირველესად განაპირობებს ხარისხიანი ეკრანის მქონე ელექტრონულ მოწყობილობებზე ხელმისაწვდომობის ზრდა.
რამდენ წიგნზე წვდომაა ხელმისაწვდომი მომხმარებლებისთვის წიგნების მაღაზია Lit.ge-ის მეშვეობით და რა სიახლეებს უნდა ელოდოს საზოგადოება ახლო მომავალში?
4 ათასამდე წიგნი და პერიოდული გამოცემაა lit.ge-ზე ამჟამად ხელმისაწვდომი. ვცდილობთ მაქსიმალურად მოვიცვათ ახალი გამოცემული ლიტერატურა. ხელი შევუწყოთ ელექტრონული წიგნების მომხმარებელთა რაოდენობის ზრდას.