BBK-ის შექმნის იდეა 2015 წელს ჩამოყალიბდა, როდესაც დაირღვა პარტნიორების უფლებები და საჭირო გახდა კანონით უზრუნველყოფილი უფლებების დაცვა. წარმატებით დასრულებული პროცესი პარტნიორებისთვის გახდა ბიძგი, შეეთავაზებინათ უფლებების დაცვის ხელმისაწვდომი მომსახურება ფართო საზოგადოებისთვის. უფლებების დაცვა სჭირდება როგორც ფიზიკურ პირებს, ასევე ბიზნესს. ბიზნესის პირველად საჭიროებებში კი, იურიდიული მომსახურების გარდა, არის ბიზნესის განვითარებისა და წარმატების მხარდაჭერა, ამიტომ BBK-ის დამფუძნებელმა გუნდმა გადაწყვიტა შეექმნა კომპლექსური საკონსულტაციო პროდუქტი სწორედ იმ სფეროებში, რომელშიც დააგროვეს გამოცდილება, კვალიფიკაცია და კომპეტენცია. სწორედ ამ თემებზე, უფრო კონკრეტულად და ვრცლად სასაუბროდ OK! BBK - BUSINESS & LAW-ის მმართველ პარტნიორს, სალომე ბეჟაშვილს ესაუბრა.

რა სახის მომსახურებებს სთავაზობს BBK - Business & Law მომხმარებლებს?
BBK - Business & Law-ის მიმართულება ბიზნესსაკონსულტაციო და საადვოკატო მომსახურებებია. უფრო აქტიურები ვართ სამართლის მიმართულებით, ვემსახურებით ფიზიკურ პირებს, რომელთაც შესაძლოა დასჭირდეთ სესხი, ხელშეკრულებასთან დაკავშირებული მომსახურებები, ნასყიდობა, იჯარის ხელშეკრულება, საკრედიტო ხელშეკრულებები, აქვთ საოჯახო ან სამემკვიდრეო დავები და ასე შემდეგ. ასევე ვემსახურებით კომპანიებს კორპორაციული სამართლის მიმართულებით და სრულად ვახორციელებთ მათი ინტერესების უზრუნველყოფას. უფრო კონკრეტულად რომ ვთქვათ, ჩვენს ფუნქცია-მოვალეობაში შედის: იურიდიული მომსახურება, საადვოკატო საქმიანობა, მცირე (საოჯახო) ბიზნესის მხარდაჭერა, არსებული პროდუქტების განვითარება, ახალი პროდუქტის დაგეგმვა, ბიზნესის პროდუქტიულობის ანალიზი და აუდიტორული და ბუღალტრული მომსახურება. ჩვენი კომპანია წარმოდგენილია ყველა ინსტანციის სასამართლოში და წარმოვადგენთ ჩვენი კლიენტის ინტერესებს.

ჩვენი მიზანია, სამომხმარებლო ბაზარს შევთავაზოთ, პროფესიული და სრულად პერსონალიზებული, კონკრეტული მომხმარებლის საჭიროებებზე მორგებული BBK-ის ხედვა, გახდეს ერთ-ერთი წარმატებული კომპანია საკონსულტაციო ბაზარზე, ბიზნეს და სამართლებრივი ქონსალთინგის მიმართულებით, წვლილი შეიტანოს ბიზნესის განვითარებაში, კერძო სექტორის წარმატებაში და უზრუნველყოს მისი საქმიანობის კანონთან შესაბამისობა.

რა მიგაჩნიათ კომპანიის მთავარ პრორიტეტებად და პრივილეგიებად?
ჩვენს ერთ-ერთ პრიორიტეტს ყველა სახის შემოსავლის მქონე პირისათვის ხელმისაწვდომი მომსახურება წარმოადგენს, რომელიც ხორციელდება არა გუნდის წევრების კვალიფიკაციისა თუ შესრულებული სამუშაოს ხარჯზე, არამედ სწორად განაწილებული სამუშაო რესურსისა და გუნდური, კოორდინირებული მუშაობის საშუალებით. ძალიან ხშირად გვაქვს Pro bono-აქციები, ანუ Pro bono-მომსახურება, რომლის ფარგლებშიც სრულიად უსასყიდლოდ ვემსახურებით ისეთ საქმეებს, როგორიც არის მაგალითად საქველმოქმედო ორგანიზაციებსა და საქველმოქმედო სფეროში ჩართული ადამიანებისთვის მომსახურების გაწევა.

კომპანიის კიდევ ერთი მთავარი უპირატესობა ნდობაა, რომელსაც ჩვენი მომხმარებლები გვიცხადებენ და მათი რჩევით ძალიან ხშირად ახალი მომხმარებლები მოდიან. ჩვენი პოლიტიკა კომპანიის დაფუძნების დღიდან მაქსიმალურად მორგებული იყო მომხმარებლის სურვილზე, თუმცა ეს არ ნიშნავს იმას, რომ შეიძლება ვიყოთ მიკერძოებულები და სხვადასხვა არასამართლიანი პირობა შევთავაზოთ ერთი და იგივე ქეისის მქონე კლიენტს. ჩვენ ადამიანური და მორალური მიდგომა გვაქვს ყველა საქმისადმი და ვითვალისწინებთ ჩვენთან მოსული ადამიანის გასაჭირსა და პრობლემას. ფინანსური ნაწილით იქნება ეს განპირობებული, დროითი რესურსით თუ მორალურად გვერდით დგომით, მაქსიმალურად ვცდილობთ, მისთვის მისაღები და მასზე მორგებული მომსახურება შევთავაზოთ.

გუნდი, რომელიც BBK - Business & Law-ის უკან დგას.
თამამად შეიძლება ითქვას, რომ თანამშრომლებსა და პარტნიორებს იურიდიული და საადვოკატო მომსახურების სფეროში მრავალწლიანი გამოცდილება აქვთ. გუნდი დაკომპლექტებულია პროფესიონალი კადრებით, მათ შორის: იურისტებით, ადვოკატებით და ბიზნესსაკონსულტაციო მომსახურების განმახორციელებელი პირებით.

პირადად მე, გარდა იმისა, რომ სრულად ვარ ჩართული კომპანიის საქმიანობაში, მრავალ ორგანიზაციას ჩემი სახელით ვემსახურები და სასამართლოში წარმომადგენლობას ვახორციელებ. ვარ მცხეთის რაიონული სასამართლოს მედიატორი და საქართველოს ადვოკატთა ასოციაციაში მედიაციისა და არბიტრაჟის განვითარების კომიტეტის თავმჯდომარე. გარდა ამისა, გვაქვს ახალი წამოწყება – ა(ა)იპ საქართველოს მედიაციის პალატა – BBK. მიმდინარე წლიდან ამოქმედდა „მედიაციის შესახებ“ საქართველოს კანონი და ჩვენც გვინდა, რომ ამ ახალ ინიციატივას დასავლურ სტანდარტთან მიახლოებით ჩვენს ქვეყანაშიც გავუხსნათ ფართო გზა და შევქმნათ პლატფორმა იმისათვის, რომ სამედიაციო პროცესები რაც შეიძლება ხშირად ვაწარმოოთ და რაც შეიძლება ნაკლებად წავიდეს სასამართლოში და არბიტრაჟში იმისათვის, რომ დავები მოვაგვაროთ.

კომპანიის ხედვა, მიმართულებათა მრავალფეროვნება, ჩვენი გუნდის წევრების პროფესიონალიზმი, კვალიფიკაცია და გამოცდილება გახდება თქვენი წარმატების გარანტი. BBK-ის მთელი შემადგენლობის კოორდინირებული მუშაობა დაგეხმარებათ სწორედ ამ მიზნის მიღწევაში.

ძალიან საინტერესოდ გამოიყურება კომპანიის ლოგო. გვიამბეთ, რა დატვირთვა აქვს მას?
BBK – ლოგოს იდეა ინსპირირებულია რუნული დამწერლობით, კერძოდ, სიმბოლო Berkanan არის კომპლექსური მნიშვნელობის მატარებელი, ისევე, როგორც BBK-ის სერვისი, და აღნიშნავს ფიზიკურ და გონებრივ ზრდას, ახალი წამოწყების აყვავებას, რეგენერაციას, შემოსავალს, განწმენდას, მზარდ ბიზნესს, ინვესტიციას, განახლებას, ფიზიკურ სილამაზესა და განსხვავებულობას, ახალი სიცოცხლის დაბადებას, ახალი აქტივობისა და იდეის პოზიტიურობას, ნაყოფიერებას, ახალი ციკლის საწყისსა და განკურნებას.

სამომავლო გეგმები...
ყოველთვის ვცდილობთ გამოვიკითხოთ, რას ვაკეთებთ არასწორად და რა სურთ ჩვენს მომხმარებლებს, რათა გამოვასწოროთ და მაქსიმალურად კომფორტულად მოვემსახუროთ თითოეულ მათგანს. მუდმივად ვმუშაობთ კომპანიისა და მისი მომსახურების გაუმჯობესებაზე. დღემდე არსებულ დიდ კომპანიებს, რომელთაც ჩვენ მომსახურება გავუწიეთ, უკმაყოფილება არ გამოუთქვამთ, თუმცა ჩვენ მაინც მუდმივ რეჟიმში ვცდილობთ გავაუმჯობესოთ ხარისხი და უფრო და უფრო სრულყოფილი და კომფორტული გავხადოთ ჩვენი მომსახურება ადამიანებისთვის.

აღსანიშნავია, რომ დამწყებ იურისტებს მუდმივად ვაძლევთ საშუალებას, ჩვენთან შეიძინონ გამოცდილება და დასაქმდნენ. ყოველთვის ვთანამშრომლობთ უნივერსიტეტებთან დასაქმების თვალსაზრისით, ვატარებთ საინფორმაციო შეხვედრებს და ლექციებს. ამ ეტაპზე, გარდა იმ საადვოკატო მიმართულებისა, რომელსაც დღეს ვხელმძღვანელობთ, ძალიან გვინდა, სამედიაციო მიმართულება განვავითაროთ.