2020 წლის მარტში ცნობილი მომღერალი - ბილი აილიში მსოფლიო ტურნეში უნდა გამგზავრებულიყო, რომლისთვისაც სპეციალური ვიდეორგოლი ჩაწერა. 18 წლის გოგონამ, რომელიც როგორც წესი ცდილობს საკუთარი სხეული დიდი ზომის სამოსით დამალოს, წელს სრულიად სხვა მესიჯის გაგზავნა გადაწყვიტა იმ ადამიანებისთვის, რომლებიც ქალბატონებს ზედმეტი კილოგრამების გამო აკრიტიკებდნენ.

რამდენიმე საათის წინ ბილიმ სრული ვიდეო გაასაჯაროა, რომლიდანაც აქამდე ფანებს მხოლოდ რამდენიმე კადრი ჰქონდათ ნანახი:

"თქვენ გაქვთ დამოკიდებულება ჩემს მუსიკაზე, სამოსზე, სხეულზე. ზოგ ადამიანს არ მოსწონს ის ყველაფერი, რასაც ვატარებ, ზოგი კი, პირიქით, ცდილობს სტილი თავადაც მოირგოს. ზოგი, ამას სხვების შესარცხვენად იყენებს, დანარჩენები კი, თავად მე მარცხვენენ. მაგრამ მე ვიცი, რომ რასაც ვაკეთებ, შეუმჩნეველი არ დარჩება. თქვენ გსურთ რომ უფრო გამხდარი ვიყო? უფრო სუსტი? უფრო მაღალი? გსურთ ჩემი სხეულის ნაწილების ნახვა? ნახოთ სხეული, რომლითაც დავიბადე, განა ეს არ გსურდათ?" -სწორედ ეს იყო იდეა, რამაც ვარსკვლავს თამამ სესიაზე არ ათქმევინა უარი.