სარა ჯესიკა პარკერმა სამსახიობო კარიერა იმის შესწავლაში გაატარა, თუ რას ნიშნავს იყო ურთიერთობაში და რას ნიშნავს იყო მარტო. HBO-ს სერიალში „სექსი დიდ ქალაქში“ (რომელსაც 1998 წლიდან 2004 წლამდე იღებდნენ) და შემდეგ ორ სრულმეტრაჟიან მხატვრულ ფილმში, ის კერი ბრედშოუს ასახიერებდა, ახალგაზრდა მწერალს მანჰეტენიდან. მსოფლიოს გარშემო მისი კინოგმირი იმდენმა ადამიანმა შეიყვარა, რომ სარას ხშირად უწოდებდნენ ქუჩაში კერის. მისი ჩაცმულობა მოდის ინდუსტრიაში დღემდე ინსპირაციულია. 2016 წელს პარკერი ისევ HBO-ს სერიალში მოგვევლინა, ამჯერად სახელწოდებით „განქორწინება“, და ამ პროცედურის შესახებაც საფუძვლიანად დაგვაკვალიანა. სამსახიობო საქმიანობის გარდა, სარა ანტრეპრენერია: ქმნის სუნამოებს, ფეხსაცმელებისა და სათვალეების დიზაინს.

კინოს არტისტობის მიღმა, სხვადასხვა „ქუდი“ მოირგეთ – გახდით დიზაინერიც. რას ურჩევთ ადამიანებს ორი კარიერის შეთავსებასთან დაკავშირებით?
ყველა პროექტის მიმართ, რომელსაც ჩემი დრო და კრეატიული აზროვნება მოვახმარე, ვნებით სავსე და სერიოზული ვიყავი. დაედევნეთ იმას, რაც გაღელვებთ და გაინტერესებთ, რაზეც ფიქრობთ, რომ ენერგია და რესურსები გაქვთ. შთააგონეთ საკუთარი თავი, რომ იმსახურებთ, გქონდეთ პროფესიული გამოცდილება, მაშინაც კი, თუ ეს ტრადიციული გზა არაა.

საიდან გაქვთ ბიზნესისთვის საჭირო ინსტინქტები?
გარშემო ჭკვიანი ხალხი შემოვიკრიბე, რომლებიც თავიანთ სფეროებში ლიდერები არიან. ვცდილობ ვიმუშაო ადამიანებთან, რომლებიც დისციპლინირებულები არიან. ვცდილობ ვისწავლო რაც შეიძლება მეტი და ცნობისმოყვარე დავრჩე.

20 წელზე მეტი გავიდა, რაც პირველად აჩვენეს „სექსი დიდ ქალაქში“. აანალიზებთ ამას?
1998 წელს, როცა პირველი სერია გადავიღეთ, ისტორია შევქმენით და პიონერები გავხდით. მანამდე არ არსებობდა საპნის ოპერა გოგონათა ჯგუფზე, რომლებიც ასე თავისუფლად საუბრობდნენ საკუთარ ინტიმურ ცხოვრებაზე. კერიმ და მისმა მეგობრებმა აღმოაჩინეს საკუთარი გრძნობები ცხოვრების, პოლიტიკის, სიყვარულისა და სექსის მიმართ. მათთან ერთად, ბევრმა მაყურებელმაც. ეს ყველაფერი ჩვენამდე ერთგვარ ტაბუს წარმოადგენდა.

გყავდათ მსგავსი მეგობრები ცხოვრებაში?
არა, და ამ მიზეზით სერიალი უფრო სათავგადასავლო და სტიმულისმომცემი იყო ჩემთვის. კერი ბრედშოუ, ისევე როგორც შარლოტა, მირანდა და სამანტა, ჩემთვის უცხო ქალები იყვნენ. ახალგაზრდობაში მსგავსად არ ვერთობოდი. ხალხმრავლობა არ მხიბლავდა და მორიდებული ვიყავი. მანჰეტენის სამყარო ჩემთვის აკრძალულად მეჩვენებოდა. არ ვფიქრობდი, რომ მოდურ ადგილებში სიარულისთვის შესაფერისი ვიყავი. მიუხედავად იმისა, რომ კერი არ მგავდა, მისი თამაში ძალიან მიყვარდა. ალბათ იმიტომ, რომ საპირისპირო ტიპაჟების განსახიერება გვხიბლავს.

პირველი სერიებიდან რა მოგონებები შემოგრჩათ?
დაბნეულები ვიყავით, არც ერთი ჩვენგანი არ იყო საკუთარი პერსონაჟის იდენტური, მაგრამ პროფესიულად მივუდექით, ეს ხომ სამსახიობო სამუშაოს წარმოადგენდა. წლების განმავლობაში დღეში 18-20 საათს ვმუშაობდი, სანამ შვილი არ მეყოლა. ხდება ხოლმე, როცა ქუჩაში დღემდე დამიძახებენ: „კერი!“

თქვენი მშობლები განქორწინდნენ მაშინ, როცა 2 წლის იყავით. გამოიყენეთ ეს გამოცდილება, რათა გაგეგოთ პერსონაჟისთვის სერიალში „განქორწინება“?
არა. არ მქონია ტრავმა ბავშვობიდან, იმიტომ, რომ ისინი ძალიან კარგად დაშორებული ადამიანები იყვნენ, სხვადასხვა ცხოვრებით. მე მათ თავიდანვე განცალკევებულად ვიცნობდი.

როგორ გაიხსენებდით დედის აღზრდის მეთოდებს?
მას სურდა, ხელოვნებასთან ვყოფილიყავით დაკავშირებული. უნდოდა, ბევრი გვეკითხა. ისწრაფვოდა ჩამოვყალიბებულიყავით ცნობისმოყვარეებად, დაგვენახა და გაგვეგო ყველაფერი, რაც შეგვეძლო.

დედაჩემი ჭკვიანი იყო და ნებისმიერ შესაძლებლობას მოეჭიდებოდა, რასაც გასწვდებოდა. იყო რაღაცები, რაც არ გვქონდა, მაგრამ დედა ფიქრობდა, რომ ხელოვნებასთან კავშირი მათ საჭიროებაზე მაღლა იდგა. მისი აზრით, აჯობებდა ცხოვრება სავსე ყოფილიყო ხელოვნებით, ვიდრე ბარბის თოჯინებით, ტელევიზორით თუ კონდიციონერით, ან ტანსაცმლით, რომელიც ყველა კლასელს ეცვა, ან პოპულარული ფეხსაცმლით...
მეც დაინტერესებული ვიყავი. ყოველთვის არ ვგრძნობდი სიამოვნებას. ხანდახან მშურდა მეგობრების, რომლებიც ერთმანეთის სახლში ტელევიზორს უყურებდნენ და ტკბილეულს მიირთმევდნენ. თუმცა, ბალეტის, სპექტაკლის თუ კლასიკური ორკესტრის მოსმენისას, შეძრული ვიჯექი და პროცესში ვერთვებოდი. მიყვარდა მუშაობა და დისციპლინა.

ადამიანები ბაძავენ თქვენს სტილს... რა ხრიკებს გაგვიზიარებდით ამ კუთხით?
ზოგადად, საყიდლებზე დამოკიდებული არ ვარ. ვინტაჟი მომწონს. მნიშვნელოვანია იყოთ კომფორტულად და იყოთ ის, ვინც ხართ. ჩემს გარდერობში მთავარი ნივთებია შავი კაბა, ნაცრისფერი შარვალი, ნაცრისფერი ჯემპერი, სათვალეები და რამდენიმე მაღალქუსლიანი ფეხსაცმელი. ეს ჩემი უნიფორმაა. ის, რასაც უცებ ჩაიცვამ და იგრძნობ, რომ შენ ხარ.

გაქვთ რაიმე საიდუმლო ჩვეულება, რომელსაც ხშირად ასრულებთ?
ყოველდღე ვსვამ ღვინოს. ამას ბოლო 10-12 წელია ვაკეთებ. მე ვგულისხმობ ძალიან პატარა ჭიქას, რომელიც ევროპაში, ვინტაჟურ მაღაზიაში შევიძინე. და მხოლოდ ერთ ჭიქას. როცა სტუმრები გვყავს და მე და ჩემი ქმარი ღვინოს ვისხამთ, ადამიანებს უკვირთ, რატომ ვუნდებით ამდენ ხანს ჭიქის დაცლას. მაგრამ, ეს ჩვენი ხერხია.

როგორც ვიცით, სამომავლოდ საკუთარი ღვინის გამოშვებასაც აპირებთ...
რადგანაც ბევრს ვმოგზაურობ, ადგილობრივი ღვინის დაგემოვნება მიყვარს. ყველანაირ ღვინოს ვტესტავ. ჩემთვის სასიამოვნოა ადამიანების, ქვეყნისა და კონკრეტული კულტურის ამ გზით შეცნობა.

თქვენი და მეთიუს ურთიერთობა ჰოლივუდში ერთ-ერთი სამაგალითოა. 22 წელია, რაც დაქორწინებულები ხართ და სამ ბავშვს ზრდით. რას აკეთებთ ამ ურთიერთობის შესანარჩუნებლად?
ალბათ, უცნაურად ჟღერს, მაგრამ ორივე ვცხოვრობთ ცხოვრებით, რომელიც უფლებას გვაძლევს გარკვეული დროით ერთმანეთს დავშორდეთ და შემდეგ ისევ დავუბრუნდეთ. რაც უფრო დიდხანს ვინარჩუნებთ ერთმანეთს, მით უფრო მეტ ინვესტიციას ვაბანდებთ ურთიერთობაში. ის ცხოვრების ერთგული კომპანიონია. უკეთესს ვერც ვინატრებდი.

რატომ გადაწყვიტეთ, ფოკუსირება მოგეხდინათ სატელევიზიო ამბავზე, რომელიც განქორწინებას ეხება?
ქორწინება ხშირადაა მიმართული მარცხზე, ჭკვიანი ადამიანების სულელურ გადაწყვეტილებაზე. ბევრი ადამიანი ფიქრობს, რომ ისინი ცუდად უმკლავდებიან განქორწინებას, იმიტომ, რომ ამის გამოცდილება არ ჰქონიათ. ჩემი აზრით, ამ ისტორიის მოყოლა საინტერესო იყო. ქალები ღალატობენ იმიტომ, რომ ბედნიერები არ არიან. არ გრძნობენ თავს ისე, როგორც საჭიროა. მამაკაცები კი, მეორე მხრივ, ერთგულები აღარ არიან მაშინ, როცა თავს მწვერვალზე მოიაზრებენ, ხიბლში გადავარდებიან და ფიქრობენ, რომ ეგოისტობაა, არ გაუზიარონ თავიანთი საოცარი თავი სხვებსაც. ბუნებრივია, იყო ცნობისმოყვარე და დაინტერესებული სხვა ადამიანების მიმართ, მაგრამ ეს არ ნიშნავს იმას, რომ ხაზი უნდა გადაკვეთო.