20-წლიანი კარიერის განმავლობაში მან მოასწრო ეთამაშა ჯაშუშიც, დედოფალიც, სპიკერიც და სერიული მკვლელიც, რომლის გამო „ოსკარი“ დაიმსახურა. მაგრამ მისი ყველაზე მნიშვნელოვანი სამსახური 8 წლის ჯექსონის და 4 წლის ოგასტის დედის როლია. 44 წლის მსახიობი აღიარებს, რომ შეყვარებული არაა, თუმცა ურთიერთობებისთვის მზადყოფნას ამჟღავნებს. უკანასკნელმა მისმა პროექტმა „სკანდალი“ ნამდვილი სენსაცია მოახდინა ჰოლივუდში. ნიკოლ კიდმანთან და მარგო რობისთან ერთად, შარლიზ ტერონი ჟურნალისტურ სამყაროს აშიშვლებს. ფილმმა „ოსკარი“ მაკიაჟისა და ვარცხნილობისთვის დაიმსახურა, განსაკუთრებით კი სწორედ შარლიზის იმიჯის გამო, რომელიც საუცხოოდაა შეცვლილი. „სკანდალის“ პროდიუსერი თავად ტერონია.
რამოდენიმეჯერ კარდინალურად შეიცვალეთ იმიჯი როლისთვის. მარტივი იყო თქვენთვის მაგალითად, თმის გადაპარსვა ფილმისთვის „შეშლილი მაქსი“?
ძალიან მარტივი. იმიტომ, რომ არასდროს მქონია ბრწყინვალე თმა. ვფიქრობ, ჯენიფერ ენისტონს გაუჭირდებოდა! თუმცა, ცხოვრებაში ასეთი თამამი ნამდვილად არ ვარ: ამგვარ ნაბიჯებს სამსახური მადგმევინებს.
რომელი გარდატეხა იყო ყველაზე რთული?
რა თქმა უნდა, წონის მომატება ფილმისთვის „ტალი“. იმიტომ, რომ საქმე დეპრესიასთან დავიჭირე. 22 კილოგრამის მოსამატებლად და ამ წონის შესანარჩუნებლად ბევრ შაქარს მივირთმევდი. ამან გამოიწვია ის, რომ გადაღებების პერიოდში, 6 თვის განმავლობაში, უგუნებოდ და სრულიად ძალაგამოცლილი ვიყავი.
ვინ ჩამოაყალიბა თქვენი შეხედულება სილამაზეზე?
დედაჩემმა. იმიტომ, რომ მასში იყო ბევრი ისეთი რამ, რასაც ჭეშმარიტ სილამაზეს ვუწოდებ. მაგრამ ეს მთავარი არაა. ჯერ კიდევ ადრეულ ასაკში მქონდა ბედნიერება, ბევრი მემოგზაურა და მენახა, რას საქმიანობენ, რას მიირთმევენ, როგორი სურნელი აქვთ და როგორ გამოიყურებიან სხვა ადამიანები პლანეტიდან. სამხრეთ აფრიკაში გავიზარდე – ქვეყანაში, სადაც იმაზე მეტი კულტურაა თავმოყრილი, ვიდრე ნებისმიერ სხვა ქვეყანაში. ეს, რა თქმა უნდა, დამეხმარა ყველაფრისთვის უფრო ფართოდ შემეხედა.
ანუ მუდამ გესმოდათ, რომ სილამაზე მრავალფეროვნებაშია – ფორმებში, ზომებში, კანის ფერებში, ნაციონალობაში...
დიახ! ვხვდებოდი ქალებს და მესმოდა, რომ ეს ბედნიერებაა – იყო თუნდაც წუთით სამყაროს ნაწილი. დაათვალიერო, შემდეგ შინ დაბრუნდე და იფიქრო: „იქ ხომ ყველაფერი სხვანაირადაა. როგორ ვერ ვამჩნევდით ამ სილამაზეს?“ მიმაჩნია, რომ ჩვენი, როგორც მშობლების, მისიაა, მუდმივი შეხსენება ბავშვებისთვის, რომ ისინი ფასდაუდებლები არიან. საქმე მათ სილამაზეს, ნიჭს, საუბარს თუ გონებას ეხება, მინდა იცოდნენ, რომ ეს სამყარო მრავალგანზომილებიანია და ყველა მათგანს აქვს საამაყოდ საქმე.
თქვენი ძველი სარეკლამო რგოლები რომ გავიხსენოთ, მივხვდებით, რომ არ იცვლებით! როგორია თქვენი შეხედულებები დაბერების შესახებ?
შეხედულებები მუდამ მეცვლება. არის დღეები, როცა მიყვარს ჩემი სახე და არ განვიცდი ნაოჭების არსებობას პირისა და თვალების გარშემო. სხვა დღეებში კი ვფიქრობ: „ღმერთო ჩემო, დროა სახე დავიჭიმო“. ეს ნორმალურია და არ ნიშნავს იმას, რომ დაბერება არ მინდა. რაც უფრო მეტად გესმის, რომ ეს ნორმალურია და შენი ცხოვრების ნაწილია, მით უფრო ნაკლებად იძაბები. ან უნდა დათანხმდეთ ამას, ან არა. მოუფრთხილდით საკუთარ თავს და მიიღეთ ყოველდღე ისეთი, როგორიც არის.
„ოსკარის“ დაჯილდოებაზე დედასთან ერთად გამოცხადდით. ის თქვენთან ერთად ცხოვრობს და ბავშვების აღზრდაში გეხმარებათ?
დედა ჩვენგან რამდენიმე კილომეტრში ცხოვრობს და სიმართლე გითხრათ, ჩემი შვილების მეორე დედაა. ჩვენ ერთად ვზრდით მათ. ასევე ერთად ვზრუნავთ ძაღლებზე – ორივეს 3-3 გვყავს. ისინი ჩვენი ცხოვრების ნაწილნი არიან. დედაჩემი ჩვენთან დილის 6 საათზე მოდის და ძაღლებს ასეირნებს. როცა ვმუშაობ, მთლიანად მცვლის. ზაფხულში ინგლისში ვიმყოფებოდი გადაღებებზე და დედა ლონდონში ნაადრევად ჩავიდა, რათა ყველაფერი გაემზადებინა, ხოლო როცა გადაღებები დაიწყო, ბავშვებთან დარჩა.
თქვენი გამოცდილებიდან რას გაუზიარებდით ბავშვებს მომავალში?
როგორც დამწყებ მსახიობს, გამუდმებით საკუთარი თავის დაცვა მიწევდა, ზურგშექცევა საშინელი ადამიანებისგან. გამუდმებით უნდა მემტკიცებინა, რომ რაღაცად ვღირვარ. მსგავსი სევდიანი გამოცდილება ბევრი ქალისთვისაა ნაცნობი და არა მხოლოდ შოუბიზნესის ინდუსტრიაში. ვისურვებდი, ჩემი შვილები ამას არ შეჯახებოდნენ. მახსოვს, ლოს ანჯელესში რომ ჩავედი, 18 წლის ვიყავი და ერთ-ერთ გავლენიან რეჟისორს გადავეყარე. მან როლზე დასამტკიცებლად ტექსტის წაკითხვაზე დამიბარა. რა თქმა უნდა, გამიკვირდა, როცა მოწვევა შაბათ საღამოს, მის სახლში მივიღე. მაგრამ, ამ ბიზნესის ბევრი არაფერი გამეგებოდა და ვიფიქრე, ეტყობა აქ, ჰოლივუდში ასეა მიღებული-მეთქი. როცა მივედი, ის პიჟამაში დამხვდა. ისევ გავამართლე, იქნებ ასეა მუშაობას მიჩვეული? მან დალევა შემომთავაზა და ვფიქრობდი, როდის გადავა საქმეზე საბოლოოდ? მალევე მივხვდი, რა ხდებოდა. თუმცა, ვიცოდი, როგორ მოვქცეულიყავი. ის არასწორ გოგონას შეეფეთა.
ჰოლივუდში ხშირად მიმართავენ პროფესიონალთა დახმარებას – ვგულისხმობ ფსიქოთერაპევტის მომსახურებას. თავად თუ დაგჭირდათ მათთან ვიზიტი?
ფსიქოთერაპევტს მხოლოდ 30 წლის ასაკიდან მივმართე. როცა აღმოვაჩინე, რომ ბავშვობა, გატარებული ალკოჰოლიკ მამასთან, მუდმივი დაძაბულობისა და არასტაბილურობის განცდა, ხელს მიშლიდა დამენახა პერსპექტივა. მსურდა დავრწმუნებულიყავი, რომ ჩემს ცხოვრებაში ის არსებობს. მასში ყველაფერი შეიძლებოდა ყოფილიყო, მათ შორის – დედობა. თერაპიის დახმარებით შევძელი სრული სურათი დამენახა და ჩემი ადგილი მეპოვა, სადაც შევძლებდი საკუთარი შვილებისთვის ცხოვრების სწორი პირობების შექმნას. ყოველთვის ვიცოდი, რომ ბავშვებს ვიშვილებდი. არც სასიყვარულო პარტნიორებს ვუმალავდი ამას.
როგორი ურთიერთობა ჩამოგიყალიბდათ მათთან?..
1 წელი საოცარი პერიოდი იყო, როცა ჯექსონი პატარა ოგასტს აღმერთებდა. ის მას კოცნიდა, ეხვეოდა, იცავდა, ყველანაირად გამოხატავდა მის მიმართ სიყვარულს. ყოველდღე ვტიროდი და ვფიქრობდი: „ეს ყველაზე მშვენიერი სიყვარულია, რომელსაც კი დავკვირვებივარ ცხოვრებაში“, მაგრამ ახლა ოგასტი გაიზარდა და მიხვდა, რომ არაა ვალდებული გააკეთოს ყველაფერი, რასაც მას უფროსი დაიკო ეტყვის. და დაიწყო ომი. ახლა მხოლოდ დანანებით ვიხსენებ იმ დროს.
ახლა გაცილებით წარმატებულად გამოიყურებით, ვიდრე კარიერის ნებისმიერ პერიოდში...
შესაძლოა. ახალგაზრდობაში ყველაფერი მქონდა, რაც იმ დროს მჭირდებოდა. მქონდა 8-წლიანი ურთიერთობა მამაკაცთან, რომელიც ჩემსავით თავგადასავლების მოყვარული იყო. შეგვეძლო ზურგჩანთებით ნებისმიერ ადგილას რამდენიმე კვირით წავსულიყავით. ავდიოდით მთებზე, ვცურავდით ზღვებში, ოკეანეებში, ტბებსა და მდინარეებში, ვჩერდებოდით ოჯახებში... მაგრამ, როცა ურთიერთობა დასრულდა, ძალიან დიდი მოთხოვნილება გამიჩნდა, დედა გავმხდარიყავი.
აღარ მსურდა მეტი მოგზაურობა, წვეულებები თუ თავგადასავლები. მაგრამ შვილად აყვანის პროცესი ფსიქოლოგიურად ძალიან რთული გამოდგა. შეიძლება ითქვას, ეს იყო ყველაზე საშინელი მომენტი ჩემს ცხოვრებაში – როცა ქაღალდებს ვაფორმებდი. იყო სიტუაციები, როდესაც რაღაც არ გამოდიოდა. მიზანი ახლოს იყო, მაგრამ უცებ ყველანაირი იმედი ქრებოდა. თუმცა, 40 წლის ასაკში საუკეთესო დრო დამიდგა. ყველაზე მეტად ეს წლები მიყვარს. როგორც იქნა, ჩემი იდეალური ჭიქა და საწოლი ვიპოვე იმ ზღაპრის მსგავსად, სამ დათვზე რომაა. საკუთარ ცხოვრებას ვმართავ და არაფერს ვნანობ.
მზად ხართ ისევ გაიღოთ რაიმე როლის გამო? ვგულისხმობ, ფიზიკურად – წონაში მოიმატოთ ან დაიკლოთ?
არასდროს ვამბობდი უარს რეჟისორების მოთხოვნებზე, მაგრამ „ტალის“ შემდეგ წონის დაკლება ძალიან გამიჭირდა. როცა 27 წლის ხარ, ეს უფრო ადვილია. 3 კვირა ზედმეტს აღარაფერს მიირთმევ და საქმე მოგვარებულია. მაგრამ, როცა 40 წლის ხარ, სწრაფად მომატება ძალიან მავნეა, უარყოფითად მოქმედებს ორგანიზმზე და დიდ ზიანს აყენებს სხეულს.
და რას ფიქრობთ ახალი სიყვარულის პოვნაზე?
იცით, ძალიან დაკავებული ვიყავი 2 პატარას აღზრდით. არ დაგავიწყდეთ, რომ მარტოხელა დედა ვარ. მაგრამ მე ეს მსურდა. ვტკბებოდი დედობით. ახლა, როცა უმცროსი ქალიშვილიც წამოიზარდა და გამუდმებით არ ვჭირდები, დრო უფრო გამომითავისუფლდა. ჯერჯერობით შეყვარებული არ ვარ, მაგრამ პაემნებზე დავდივარ. მხოლოდ ერთი რამ დარჩა – მამაკაცი, რომელიც მზადაა იმოქმედოს!