2020 წლის საიუბილეო ბერლინალეზე სალი პოტერის ახალი დრამის "The Roads Not Taken"-ის პრემიერა გაიმართა, რის გამოც გერმანიის დედაქალაქს ფილმის შემოქმედებითი ჯგუფი: ხავიერ ბარდემი, სელმა ჰაიეკი და ელ ფენინგი ესტუმრნენ. ფილმის ჩვენების შემდეგ გამართულ პრესკონფერენციაზე რეჟისორები და მსახიობები ჟურნალისტებს საკმაოდ მხიარული განწყობით შეხვდნენ, თუმცა ფილმი საპირისპირო ემოციას ბადებს: ის საკმაოდ სევდიან ისტორიას მოგვითხრობს ქალისა და კაცის და მამისა და ქალიშვილის სიყვარულის შესახებ.
ამავე სახელწოდების რობერტ ფროსტის პოემა, ისევე როგორც ფილმი მკითხველსა და მაყურებელს აფიქრებს ცხოვრებისეულ გადაწყვეტილებებსა და არჩევანზე, რომელსაც თითოეული ინდივიდი აკეთებს. სათაურიც ერთგვარი განმსაზღვრელია იმ გზისა თუ გზების, რომელსაც არ ვირჩევთ. ელ ფენინგმა საკუთარ პერსონაჟთან დაკავშირებით სწორედ ეს განაცხადა, რომ მისი გმირი მნიშვნელოვან გადაწყვეტილებებს აკეთებს. მას საქმე უფუჭდება პროფესიულ საქმიანობაში თუმცა მამას არ ტოვებს და მასზე ზრუნვას ირჩევს.
პენელოპე კრუსის საუკეთესო მეგობარმა, სელმა ჰაიეკმა პრესკონფერენციის დასაწყისში ამაყად განაცხადა, რომ ხავიერი მისთვის მსოფლიოში საუკეთესო მსახიობი მამაკაცია. აქვე დაკოტა ფენინგის უმცროსმა დამ დაამატა, რომ როლის მიღების დროს განსაკუთრებით ღელავდა, რადგანაც გადასაღებ მოედანზე, მასთან ერთად ხომ თვით მისტერ ბარდემი იმყოფებოდა!
სიუჟეტის მიხედვით, მამას გონებრივი აშლილობა სჭირს, რის გამოც ის წარსულსა და აწმყოში გაუაზრებლად დამოგზაურობს. ის თითქოს ცხოვრების სხვადასხვა მომენტში გაიჭედა და გასასვლელს თვალის ცეცებით ეძებს, მაგრამ ვერ პოულობს, რადგანაც ყველა გზას მაინც საკუთარ თავამდე მიჰყავს, რომელიც ვერ ეხმარება. მსახიობი შთაგონებული იყო სალი პოტერის პირადი ისტორიით, რომელიც ძმას იმავე დაავადების დროს ისევე უვლიდა, როგორც ელის გმირი მამას. "ყოველთვის მაინტერესებდა სად მიდიოდა, როცა ახლოს იყო, მაგრამ მშორდებოდა" - განაცხადა რეჟისორმა და მართლაც იმავეს ვხედავთ მოლის (ელ ფენინგის პერსონაჟი) თვალებში. მას მამის გვერდით ყოფნა დაუსახავს მიზნად, იმისდა მიუხედავად, რომ თავად მამამ ოდესღაც მაიტოვა, მიზეზად კი მწერლობაზე კონცენტრაციას ასახელებდა.
პრესკონფერენციაზე ახსენეს სალი პორტერისა და ელ ფენინგის წინა თანამშრომლობაც. ფილმი: "Ginger and Rosa", სადაც ელი 13 წლისაა. კითხვაზე რას ფიქრობს ის სალიზე, ფენინგმა გულწრფელი ღიმილით უპასუხა, რომ ისურვებდა მასთან მთელი ცხოვრების მანძილზე ეთანამშრომლა.
აღსანიშნავია, რომ ფილმი რამდენიმე დღეში გადაიღეს და მაყურებელიც თითქოს ერთი ამოსუნთქვით უყურებს. ცოტაოდენი იუმორით ის აუცილებლად დაგვაფიქრებს ადამიანთა შორის არსებულ ურთიერთობებზე, განსაკუთრებით მაშინ, როცა ერთმანეთის თანადგომა გვჭირდება. პრესკონფერენციის ბოლოს, ერთ-ერთმა ჟურნალისტმა აღნიშნა, რომ სელმა ახლა იმაზე მეტადაა დაკავებული ვიდრე ოდესმე. მსახიობი მხიარული განწყობიდან სენტიმენტალურ ნოტაზე გადავიდა და ახსენა, რომ ახლა ზუსტად ის მომენტი უდგას, როცა ირჩევს იმ გზებს, რომელიც უნდა განვლოს.