ჰოლივუდს და მის მონათესავე ინდუსტრიებს, დაარსებიდან მოყოლებული, ბევრი საკულტო წყვილი ახსოვთ. ისინი ერთმანეთს იცნობდნენ გადაღებებსა თუ წვეულებებზე და ფოტოობიექტივების წინაშე თავს შთამაგონებელი იმიჯებით იწონებდნენ. სამწუხაროდ, ზოგიერთმა ყველასთვის საყვარელმა წყვილმა დროს ვერ გაუძლო და დღეს ისინი ერთად აღარ არიან. გავიხსენოთ რამდენიმე მათგანი, რომლებიც აღტაცებას გვრიდნენ საზოგადოებას.

ნიკოლ კიდმანი და ტომ კრუზი

ნიკოლი და ტომი ერთმანეთს 1990 წელს შეხვდნენ, ფილმის „ჭექა-ქუხილის დღეები“ შესარჩევ გადაღებებზე. როლი ორივემ მიიღო. ერთმანეთით პირველი ნახვისთანავე მოიხიბლნენ, რასაც მომავალში კიდევ ერთი თანამშრომლობა მოჰყვა ფილმში „ფართოდ დახუჭული თვალები“. 11-წლიანი ურთიერთობის, ორი საერთო ნაშვილები ბავშვის და ეკრანზე ბრწყინვალე „ქიმიის“ მიუხედავად, რაც რეალურ ცხოვრებაშიც ჰპოვებდა ასახვას, წყვილი 2001 წელს ერთმანეთს დაშორდა.

გვინეტ პელტროუ და ბრედ პიტი

ფილმში „შვიდი“ ერთად მონაწილეობის შემდეგ მსახიობებმა რომანტიკული ურთიერთობა განაგრძეს. პრესაში წერდნენ, რომ გვინეტი და ბრედი ერთმანეთზე ჭკუას კარგავდნენ. ქერათმიანმა ვარსკვლავებმა შეხვედრები 1994 წელს დაიწყეს, ორი წლის შემდეგ, 1996 წელს კი, ბრედმა გვინეტს ხელიც კი სთხოვა. სამწუხაროდ, 1 წლის შემდეგ წყვილი დაშორდა. გვინეტი ამ ურთიერთობას შემდეგნაირად იხსენებს: „მზად არ ვიყავი, ის ჩემთვის ზედმეტად კარგი იყო“.

ბრედ პიტი და ანჯელინა ჯოლი

ჰოლივუდის კიდევ ერთი წყვილი, რომელთა დაშორებას ვერავინ ვერასდროს წარმოიდგენდა. ბრედი და ანჯელინა 21-ე საუკუნის ერთ-ერთ ყველაზე საკულტო წყვილის სტატუსს ატარებდნენ. მათი ისტორია 2005 წელს დაიწყო, თუმცა არცთუ სასიამოვნოდ, რადგანაც ბრედი ფილმის „მისტერ და მისის სმიტები“ გადაღებებამდე ჯენიფერ ენისტონს ხვდებოდა. მალევე იშვილეს კენიაში 3 წლის მედოქსი და აღიარეს, რომ მათი სასიყვარულო ისტორიაც ფილმის გადაღებებიდან იღებდა სათავეს. 2006 წელს უკვე ბიოლოგიურ საერთო შვილს – შაილოს შეეგებდნენ. მომდევნო წელს პაქსი იშვილეს, 2008 წელს კი ტყუპები – ნოქსი და ვივიენი ეყოლათ. ბრედმა ასევე ლეგალურად იშვილა ანჯელინას პირველი ორი შვილი – მედოქსი და ზაჰარა. მიუხედავად იმისა, რომ ურთიერთობის 10 წლის თავზე ქორწილიც გადაიხადეს, ცოლ-ქმრობამ დიდხანს ვეღარ გაძლო. ისინი 2016 წელს დაშორდნენ და განქორწინების პროცესი საკმაოდ ხანგრძლივად მიმდინარეობდა.

ქეით მოსი და ჯონი დეპი

გასული საუკუნის 90-იანი წლების ეს საოცნებო წყვილი 1994 წლიდან ხვდებოდა ერთმანეთს. მაშინ ჯონი 31 წლის იყო, ქეითი კი მხოლოდ და მხოლოდ 20-ის. „ჩვენი საუბრის პირველივე მომენტიდან ვიცოდი, რომ ერთად ვიქნებოდით“, – იხსენებს ქეითი. ამ გლამურულმა წყვილმა ერთად 4 წელი გაატარა და გასული საუკუნის ბოლო ათწლეულის საკულტო წყვილად, სტილის ეტალონად იქცა. მათი გამოჩენა წითელ ხალიჩაზე ყოველთვის შთამბეჭდავი და თავბრუდამხვევი იყო: სრულყოფილი და შთამაგონებელი. ხშირად ეცვათ ერთმანეთთან შეთანხმებულად, პოზირებდნენ ერთად და 1998 წლამდე ერთმანეთზე დანიშვნაც კი მოასწრეს. მათი ფოტოები გულშემატკივრებს გასული საუკუნის 90-იანი წლების ნოსტალგიას უღვიძებს.

ვაინონა რაიდერი და ჯონი დეპი

ჯონის პირველი მნიშვნელოვანი სასიყვარულო მეწყვილე 1990-იანების კიდევ ერთი დასამახსოვრებელი ფიგურა – ვაინონა რაიდერი იყო. ისინი ერთმანეთს 1989 წელს, ფილმის პრემიერაზე შეხვდნენ. რაიდერი 17 წლის, ჯონი კი 27 წლის გახლდათ. 1990 წელს დაინიშნენ, მაგრამ 1993 წელს ერთმანეთს დაშორდნენ. დეპმა ვაინონას პატივსაცემად ტატუც კი გაიკეთა სხეულზე: „მუდამ ვაინონა“, რომელიც მოგვიანებით გადააკეთა ფრაზით „ღვინო სამუდამოდ“.

რიჩარდ გირი და სინდი კროუფორდი

ეს ორი ვარსკვლავი და თავისი საქმის უდავო პროფესიონალი, 1991 წლიდან 1995 წლამდე იყვნენ ცოლ-ქმარი. ისინი ერთმანეთს სახლის წვეულებაზე შეხვდნენ, მაშინ, როცა სინდი 21 წლის იყო. 17 წლით უფროს ცნობილ მსახიობთან 4-წლიანი თანაცხოვრება განქორწინებით დასრულდა, თუმცა კარიერაში გამართლებამ არ დააყოვნა და სინდი ეპოქის საკულტო მოდელი გახდა.

ითან ჰოუკი და უმა თურმანი

მსახიობები ერთმანეთს „გატაკას“ გადაღებებზე, 1997 წელს შეხვდნენ. 1 წლის შემდეგ დაქორწინდნენ, ხოლო 2004 წელს განქორწინდნენ. ჰოუკმა მოგვიანებით განაცხადა, რომ ქორწინებისთვის ძალიან ახალგაზრდა იყო. ითანს და უმას ორი საერთო შვილი ჰყავთ: 21 წლის მაია (მსახიობი) და 17 წლის ლევონი. ვარსკვლავები ერთმანეთთან დღემდე კარგ ურთიერთობას ინარჩუნებენ.

ჯონი დეპი და ვანესა პარადი

„ჰოლივუდის მეამბოხემ“ საფრანგეთში „სამოთხე“ იპოვა“ – წერდნენ ამ გამორჩეულ წყვილზე. ჯონი დეპმა იმედგაცრუებების შემდეგ თითქოს თავისი ცხოვრების ნამდვილ სიყვარულს მიაგნო. წლების განმავლობაში ცალ-ცალკე ინტერვიუებში ორივე მათგანი აღიარებდა, რომ იმ დროისათვის მათი მეორე ნახევარი, შვილები და ოჯახი ყველაზე მთავარ საგანძურს წარმოადგენდენ. მიუხედავად ამისა, საბოლოოდ, მათი გზები მაინც გაიყარა. „შანელის“ მუზა მსახიობს პირველად 1994 წელს შეხვდა, მაგრამ მაშინ ჯონი ქეით მოსს ხვდებოდა. „ხშირად მეფიქრებოდა მასზე“ , – იხსენებს ვანესა. 1998 წელს, თავისუფალი დეპი პარადის რომან პოლანსკის ფილმის გადაღებებზე კვლავ გადაეყარა და მაშინვე მოიხიბლა: „ვუყურებდი მას და არ ვიცოდი, რა მემართებოდა“. 1999 წელს ჯონის ვარსკვლავი გაუხსნეს, ვანესაც მის გვერდით იმყოფებოდა. მათი საერთო შვილი – 20 წლის ლილი როუზ დეპი თავს სამსახიობო და სამოდელო კარიერაში ერთმანეთის პარალელურად ცდის, ხოლო უმცროსი ვაჟიშვილი – ჯეკი, 17 წლისაა.