კრის ტეიგენმა და ჯონ ლეჯენდმა ქორწინებიდან მე-6 წლის იუბილე აღნიშნეს, თუმცა ერთად უკვე 13 წელს ითვლიან. ისინი იმ იშვიათ წყვილს წარმოადგენენ, რომელიც ყოველთვის ღია და გულწრფელია საკუთარ სასიყვარულო ცხოვრებაზე საუბრისას.

კრისი და ჯონი ერთმანეთს პირველად 2007 წელს, მომღერლის მუსიკალური ვიდეოს გადაღებებზე შეხვდნენ. მოდელმა ჯონის ინტერესის ობიექტი განასახიერა. კლიპის ჩაწერის შემდეგ კი მასთან ურთიერთობა განაგრძო. „დაახლოებით 12 საათი ვიყავით ერთად. მე ქალის თეთრეული მეცვა, მას კი კოსტიუმი, ნორმალურად ვერც კი დავემშვიდობეთ ერთმანეთს“, – იხსენებდა კრისი მოგვიანებით.

რამდენიმე თვე კონტაქტს ვირტუალურად აგრძელებდნენ. „ტელეფონით შემიყვარდა, რადგანაც ის საოცარი ოსტატობით ფლობს ამ 140 სიმბოლოს. ბევრს ვწერდით ერთმანეთს და მასში ნელ-ნელა იუმორის გრძნობის შემჩნევა დავიწყე. ამ საუბარში ვხვდებოდი, როგორ მიყვარდებოდა ის ისეთი, როგორიც იყო“, – იხსენებს ლეჯენდი.

პირველი მოგზაურობა იტალიაში, კომოს ტბაზე შედგა. „ნავის ტურით ტბაში ერთ მშვენიერ ადგილას მიგვიყვანეს და გვითხრეს, რომ სურვილის ჩაფიქრება იქ წესად იყო ქცეული. მე ვითხოვე ჯონი ყოფილიყო კაცი, რომელზეც დავქორწინდებოდი და რომლისგანაც შვილები მეყოლებოდა. მგონი მან სრულყოფილი სპაგეტის გასინჯვა ითხოვა. ორივე ასრულდა!“ – იხსენებს მოდელი.

2011 წელს, 4-წლიანი ურთიერთობის შემდეგ, ლეჯენდმა ტეიგენს ხელი მალდივებზე სთხოვა, მაგრამ ყველაფერი ისე არ მოხდა, როგორც ჩაფიქრებული იყო. აეროპორტის გზაზე იჩხუბეს და სიურპრიზი კინაღამ აეროპორტის დაცვამაც ჩაშალა. „მახსოვს, მანქანაში ძალიან გავუბრაზდი, საჩუქრები წინასწარ გავხსენით და მან სამზარეულოს წიგნი და ქვაბი მაჩუქა“, – ყვება კრისი, – „ბეჭედი ხელჩანთაში მქონდა. აეროპორტში რატომღაც დაცვამ მთხოვა ყველაფერი ამომეღო ჩანთიდან, რადგანაც აინტერესებდათ, რა იდო იმ პატარა ყუთში. კრისი გვერდით მედგა. ვფიქრობდი, „ღმერთო, ამდენ ხანს რა კარგად ვმალავდი. ახლა, როცა როგორც იქნა, დგება შესაფერისი მომენტი, ბეჭედს კრისი დროზე ადრე დაინახავს. საბედნიეროდ, ყველაფერი კარგად დასრულდა“, – იხსენებს მომღერალი.

„მალდივებზე იდეალური შობა გვქონდა. ჯონმა იცის, როგორ მიყვარს ეს დღესასწაული. ვახშამზე დესერტი ვერცხლის ლანგრით შემოიტანეს, მან თავსახური ახადა, თუმცა შიგნით ძალიან ბევრი მწვანილი დავინახე. მათი მიმოფანტვის შემდეგ, როგორც იქნა პატარა ყუთმაც მიიქცია ჩემი ყურადღება. როცა მასში მოთავსებულ ბეჭედს ხედავ, გული თითქოს ჩერდება“, – ყვება ტეიგენი.

სიმღერა All of Me ჯონმა კრისს მიუძღვნა, რომელსაც მაშინ ჯერ კიდევ საცოლის სტატუსი ჰქონდა. მოდელმა მოგვიანებით აღიარა, რომ როცა ლეჯენდმა კრისს სიმღერა პირველად უმღერა, იმდენად ამაღელვებელი აღმოჩნდა, რომ ცრემლები ვერ შეიკავა. „ემოციური ვარ, მაგრამ მსგავს რამეებზე, როგორც წესი, არ ვტიროდი. ეს უბრალოდ მშვენიერი იყო“, – იხსენებს კრისი.

კრისი და ჯონი 2013 წელს კომოს ტბაზე დაქორწინდნენ. კაბაზე ვერა ვანგმა იზრუნა. „მოწმის სახით ირინა შეიკი გვყავდა, ყველაზე ლამაზი ქალი დედამიწაზე!“ – ამბობს მოდელი.

2016 წლის 14 აპრილს ვარსკვლავურ წყვილს პირველი ქალიშვილი, ლუნა შეეძინა, 2018 წლის 16 მაისს კი მათი ვაჟიშვილი – მაილსი მოევლინა ქვეყანას.

დღეს ლეჯენდის ჩვეული რუტინა ასეთია: იღვიძებს დილის შვიდის ნახევარზე, ეთამაშება ბავშვებს, ვარჯიშობს, მიჰყავს ლუნა ბაღში, მაილსი კი მუსიკაზე; შემდეგ მიდის სტუდიაში, მუშაობს, ბრუნდება შინ და ვახშმის შემდეგ კვლავ პატარებს ეთამაშება მათ დაძინებამდე. „როცა იძინებენ, მე და კრისი საყვარელ გადაცემებს ვუყურებთ, ღვინოს ვსვამთ და მორიგი დღისთვის ვემზადებით. ჩვენ ძალიან გვინდოდა შვილები. თავად 4-შვილიან ოჯახში გავიზარდე, ამიტომაც ვფიქრობ, სამი და ოთხი კარგი რიცხვებია“.

ჯონ ლეჯენდისა და კრისი ტეიგენის წყვილს ბევრი გულშემატკივარი ჰყავს, რადგანაც ისინი უშუალო, მხიარული ადამიანები არიან და მათი ოჯახი ბევრს შთააგონებს. 41 წლის მუსიკოსს მიაჩნია, რომ წარმატებული თანაცხოვრებისთვის შრომაა საჭირო: „ჩვენ მართლა გვიყვარს, პატივს ვცემთ და ვაფასებთ ერთმანეთს. ვფიქრობ, აქედან იწყება ყველაფერი. ძალიან გვსიამოვნებს ერთმანეთის კამპანიაში ყოფნა. მეორე უმნიშვნელოვანესი ნაწილი იუმორია. ჩემი ცოლი მუდამ მაცინებს. მეც ვცდილობ ხშირად გავაღიმო, თუმცა ყველამ იცის, რომ ის ჩემზე სასაცილოა“!

34 წლის ტეიგენი მართლაც მილიონ ადამიანს აცინებს ტვიტერსა და ინსტაგრამზე საკუთარი გვერდების მეშვეობით. მოდელი სოციალურ ქსელში ხშირად აღწერს სასაცილო მომენტებს ყოველდღიური ცხოვრებიდან. კრისმა კარიერა მოდელობით დაიწყო, თუმცა დროსთან ერთად კულინარიაში დახელოვნდა, წიგნი გამოსცა და წამყვანის იმიჯსაც წარმატებით ირგებს. ჯონის ცხოვრებაში კი 2019 წელი კარიერის მიღმა ერთი საინტერესო ფაქტითაც იწერება: ჟურნალ Peoples-ის ყოველწლიური რუბრიკის მიხედვით, მან წლის ყველაზე სექსუალური მამაკაცის წოდება დაიმსახურა.