პრინცესას განსახიერება ლილი როუზ დეპის ბუნების მეორე მხარეა. „ცხოვრების განმავლობაში პირველი 10 ჰელოუინი სწორედ პრინცესას იმიჯით გავატარე“, – იხსენებს ჯონი დეპის და ვანესა პარადის ერთადერთი ქალიშვილი. დევიდ მიშოდის კინოსურათში „მეფე“, რომელიც შექსპირის მიხედვით გადაიღეს, ლილი მე-15 საუკუნის ფრანგ პრინცესა ქეთრინად გვევლინება, ტიმოთი შალამე კი ჰენრი მეხუთეს როლს თამაშობს. რამდენიმე საინტერესო ფილმში მონაწილეობის მიუხედავად, „მეფე“ დეპს პირველ მეინსტრიმულ აღიარებას უქადის. „ეს ყველაზე დიდი პროექტია მათ შორის, რომელთა ნაწილიც ოდესმე ვყოფილვარ. ამ მხრივ მუშაობა ძალიან სტრესულია, მაგრამ ბევრი ამაღელვებელი მომენტი მოსდევს და ვცდილობ ჩემი ოსტატობის მაქსიმუმი გამოვავლინო“, – აცხადებს მსახიობი და გვარწმუნებს, რომ გამოწვევებისთვის მართლაც შესაშურადაა მზად.

ახალ ფილმში თამაშობთ პრინცესას, რომელიც იძულებულია მეფე ჰენრი მეხუთეს გაჰყვეს ცოლად, მას შემდეგ, რაც ჰენრიმ მისი ქვეყანა დაიპყრო. რამ გადაგაწყვეტინათ როლზე მუშაობა?
ის არაჩვეულებრივი ქალი იყო! ბევრი რამ არ ვიცოდი მის შესახებ, მაგრამ გადაღებების დაწყებამდე კვლევა-გამოძიებით ძალიან ვისიამოვნე. მოედანზე ისტორიკოსებიც გვესწრებოდნენ, რომლებიც ჩვენ შეკითხვებს პასუხობდნენ. ქეთრინი ძლიერი ქალების ოჯახიდან იყო. მამამისს, ჩარლზ VI-ს, ფსიქიკური შეტევები ჰქონდა, ამიტომაც მის მაგივრად ხანდახან დედამისი მართავდა ქვეყანას, ეს ყველაფერი კი დახურულ კარს მიღმა რჩებოდა.

როგორი იყო ატმოსფერო გადასაღებ მოედანზე?
ვფიქრობ, რეჟისორი და მთავარი როლის შემსრულებელი ქმნიან ამ განსაკუთრებულ ატმოსფეროს მოედანზე. ამ მხრივ, დევიდი და ტიმოთი არაჩვეულებრივები იყვნენ. დევიდს კოლაბორაციები საუცხოოდ გამოსდის. ზუსტად იცის რა უნდა, მაგრამ ის აუცილებლად შეგეკითხება, რა გსურს თავად.

იყო ისეთი რამ, რაც საკუთარ პერსონაჟში შეცვალეთ?
კასტინგიდან გადაღებებამდე, ქეთრინის ცნობისმოყვარეობა და ინტერესი ჰენრის მიმართ ევოლუციას განიცდიდა. თავიდან მეტად სასტიკი ვიყავი. არ ვფიქრობ, რომ მას ჰენრისთან შეხვედრა უხაროდა, მაგრამ ის ჭკვიანია და შესწევს ძალა გამოიტანოს დასკვნა სხვების მიერ ჰენრიზე გამოთქმული აზრებიდან. ის მოარშიყე არაა, მაგრამ არც კაცთმოძულეა. გაცნობის სცენის ბოლოს, მათ შორის ურთიერთგაგება ყალიბდება, რაც დროთა განმავლობაში უნდა განვითარდეს. ამბობენ, რომ როცა ჩვენი ამბავი წყდება და ისტორია გრძელდება, მათ ერთმანეთის მიმართ დიდი სიყვარული ამოძრავებდათ.

რას ფიქრობთ ტიმოთის პერფორმანსზე?
ის დაუვიწყარია. ტიმოთის ემოციური მოწყვლადობა შეაქვს ყველაფერში, რასაც აკეთებს და ამას ძალისხმევის გაღების გარეშე ახერხებს. ეს ნიჭია. ის იმდენად ნიჭიერია, რომ ვფიქრობ ვერავინ ითამაშებდა ამ როლს ისე, როგორც ის.

რობერტ პატინსონის აქცენტმა პრესის ყურადღება მიიქცია. რჩევებს აძლევდით?
სამწუხაროდ, არ მომეცა საშუალება მასთან ერთად მემუშავა. ჩვენ გადასაღებ მოედანზე ერთდროულად ყოფნა არ გვიწევდა, თუმცა ფილმში და-ძმას ვთამაშობთ. ერთხელ, როცა გადავეყარე, ვუთხარი: „რობ, მომასმენინე შენი აქცენტი. უნდა დავრწმუნდეთ, რომ ჩვენი გმირები ერთი და იგივე ოჯახიდან არიან!“ მან ეს არ გააკეთა! მაგრამ, რა თქმა უნდა, ვფიქრობ, ის არაჩვეულებრივია. მისი პერსონაჟი ფილმს განსაკუთრებულ ელემენტს სძენს, თუნდაც კომედიურ ელფერს.

ამის საპირისპიროდ, ქეთრინი ძალიან სერიოზულია – ეს მის სამოსზეც აისახება. როგორ გეხმარებოდათ კოსტიუმი, გაგეთავისებინათ პერსონაჟი?
ჯეინ პეტრიმ, ჩვენი კოსტიუმების დიზაინერმა, დახვეწილი სამუშაო შეასრულა. ფილმში ჩემი კოსტიუმები დიდებულია, მაგრამ არა მდიდრული. ისინი გამოხატავენ იმ მდგომარეობას, რომელიც ქვეყნისთვის იმ კონკრეტულ მომენტში იყო დამახასიათებელი. ფრანგები ვერ ნახავდნენ თავიანთ პრინცესას ბრილიანტებში, როცა გარეთ ომი იყო.

ქეთრინის განსახიერებამ იქონია გავლენა თქვენს პირად გარდერობზე პრესტურის დროს?
ეს სიტუაციაზეა დამოკიდებული. ხანდახან გსურს აირეკლო შენი პერსონაჟი, ხანდახან კი გინდა მთლიანად გაემიჯნო მას. ჩემს თავს ვაძლევ უფლებას, თანამედროვე პრინცესას საკუთარი მომენტები მქონდეს.

ლონდონში გამართულ პრემიერაზე პირველი იყავით, რომელმაც „შანელის“ 2020 წლის გაზაფხული/ზაფხულის კოლექციიდან სამოსი პოდიუმს მიღმა მოირგო. როგორ განვითარდა თქვენი ურთიერთობა მოდის სახლთან მას შემდეგ, რაც ბრენდის ელჩი ხართ?
„შანელი“ ოჯახია. მსგავსი საქმიანი ურთიერთობა არავისთან მქონია. ბავშვობიდან მთელ შემოქმედებით ჯგუფს ვიცნობ და მათთან ერთად მუშაობა ჩემთვის დიდი სიამაყეა. ნიმუშები ბრწყინვალეა, მაგრამ ადამიანები მათ უკან – აი, ვინ ხდის თითოეულ მოდელს განსაკუთრებულს, ისევე, როგორც კარლ ლაგერფელდი.

გახსოვთ პირველი შეხვედრა კარლთან?
მაშინ 8 წლის ვიყავი. ის ზომების აღებით იყო დაკავებული და მე და დედა ატელიეში აგვიყვანა. მახსოვს, როგორ იყო გარშემორტყმული ქსოვილებითა და ნახაზებით. როცა კარლი დავკარგეთ, ძალიან დავსევდიანდი. ბავშვობაში რაზეც ვოცნებობდი, იმას ვაკეთებ ახლა და სწორედ მან ამისრულა ოცნებები. დრო, რომელსაც მასთან ვატარებდი, მოგონებებია, რომელიც მთელი ცხოვრება გამყვება.

გიმუშავიათ ვირჯინ ვიარდთან – მის მემკვიდრესთან „შანელში“?
მიყვარს ვირჯინი. მას ბრენდში მუშაობის დაწყებიდან ვიცნობ. ის ძალიან ჭკვიანია და ვფიქრობ, მის გარდა ვერავინ შეძლებს კარლის ხსოვნის შენარჩუნებას. ყოველ შოუში, მე კარლის ნაწილს ვხედავ. ჩვენ ისევ ვგრძნობთ მის გავლენას, მის გენიას.

გაიხსენეთ მომენტი, რომელმაც შეცვალა თქვენი ცხოვრება.
ჩემი ცხოვრება შეიცვალა იმ წამს, როცა ამ ქვეყანას ჩემი ძმა მოევლინა.

როგორ ფიქრობთ, დრო ქალის მეგობარია თუ მტერი?
დარწმუნებული ვარ, რომ დროს შეუძლია იყოს მეგობარი. საჭიროა მხოლოდ ვიცოდეთ დროის მენეჯმენტი.

რითი დაგვამახსოვრდება დრო, რომელშიც ახლა ვცხოვრობთ?
ვფიქრობ, არ ღირს გავაიდეალოთ ან პირიქით – მოვახდინოთ რომელიღაც კონკრეტული პერიოდის დისკრედიტება. ყოველ ეპოქას თავისი პლუსები და მინუსები აქვს. ჩვენი ეპოქა ნამდვილად დაგვამახსოვრდება სოციალური ქსელების გაჩენით, რომლის მეშვეობითაც თაობის ბევრი წარმომადგენელი ცნობილი არ იქნებოდა. დღეს რთულია შევაფასოთ მისი დადებითი და უარყოფითი მხარეები – არის ეს დროის კარგვა თუ ხსნა.

დაბოლოს: რა გაქვთ დაგეგმილი ახლო მომავალში?
ჩემი პირველი სამეცნიერო-ფანტასტიკური ფილმი! ახლახან მოვრჩი რუმინეთში ფილმ Voyagers-ის გადაღებებს. რეჟისორი ნეილ ბურგერია, მთავარ როლებში კი კოლინ ფარელს და ფიონ ვაითჰედს იხილავთ. ასევე, წინ მაქვს Dreamland არმი ჰამერთან ერთად, რომელიც ოპოიდურ კრიზისს ეხება. ორი სხვადასხვა როლია, ერთმანეთისგან მკვეთრად განსხვავებული, და აბსოლუტურად შორს იმ ყველაფრისგან, რაც მიკეთებია, ამიტომაც დიდი მოლოდინით ვარ განმსჭვალული 2020 წლის მიმართ.