მარადიულად ახალგაზრდა და ყველასთვის საყვარელი პერსონაჟი რეიჩელ გრინი 50 წლისაა. ჯენიფერ ენისტონმა წელსაც ბევრჯერ დაამტკიცა, რომ ქალი ასაკთან ერთად საკუთარ სილამაზეს არ კარგავს. რა თქმა უნდა, იმ შემთხვევაში, თუ გარეგნულს შინაგანი სილამაზეც ერწყმის.
ახლა ჯენიფერი სიმშვიდისკენ, ჰარმონიისკენ და შემოქმედებითი თვითრეალიზაციისკენ ილტვის. მსახიობი ახალი სერიალით ძალიან ამაყობს − „დილის გადაცემა“ არის პროექტი, რომელიც მის კარიერაში ერთ-ერთი ყველაზე რთული აღმოჩნდა. მასთან ერთად, ამ სერიალში რიზ უიზერსპუნსაც იხილავთ. შოუ დილის ამბების გასაოცარ სამყაროს გვიჩვენებს და იმ ადამიანებს გვაცნობს, რომლებიც ყოველდღე ამერიკას აფხიზლებენ. სიუჟეტის ცენტრში ორი ქალია, პროფესიული და პირადი ცხოვრების კრიზისებით. ენისტონი არა მხოლოდ მთავარი როლის შემსრულებელი, არამედ პროექტის აღმასრულებელი პროდიუსერია.

თქვენი ასაკი მუდამ განხილვის საგანია. დროსთან ერთად, როგორი დამოკიდებულება გაქვთ მასთან?
მშვენიერ ფორმაში ვარ. უკეთესში, ვიდრე ოდესმე ვყოფილვარ. ეს იმას არ ნიშნავს, რომ ჩემი სხეული არ „ჯანყდება“ დროდადრო. მაგალითად, რამდენიმე ოპერაცია ჩავიტარე მუხლებზე და ახლა ორჯერ დავფიქრდები, სანამ მათ მოვიშიშვლებ. სხეულის დანარჩენი ნაწილები სრულ წესრიგში მაქვს. სავარჯიშო დარბაზს კვირაში 4-5-ჯერ ვაკითხავ. ბოლო ორი წელია მთელი ვნებით შემიყვარდა კრივი, რომელიც კარგ ფიზიკურ და მენტალურ ფორმაში მამყოფებს. ყოველ მორიგ ვარჯიშს მოუთმენლად ველი!

რას ურჩევდით ადამიანებს, რომლებსაც საკუთარი სხეულიდან გამომდინარე, თავდაჯერება აკლიათ?
ასაკისა და გავრცელებული სტანდარტის მიუხედავად, ჩვენი სხეული მთლიანობაშია მშვენიერი და არა ნაწილობრივ. ნურავის მისცემთ შანსს გაგიფუჭოთ ურთიერთობა საკუთარ თავთან კრიტიკისა და სირცხვილის გრძნობის გაჩენით. თუ თქვენი სხეული ვინმეს არ მოსწონს, ეს მისი პრობლემაა და არა თქვენი.

სერიალში „მეგობრები“ ერთმანეთთან იდეალური და გრძელვადიანი ურთიერთობები დაგვანახეთ. რას იტყოდით თქვენს რეალურ მეგობრებზე?
ზოგიერთ მათგანთან 35 წელზე მეტია ვმეგობრობ. ენა არ მომიტრიალდება მათ მხოლოდ „მეგობრები“ ვუწოდო. მათ შორის კორტნი კოქსი, სერიალის მსგავსად, ჩემი ერთ-ერთი საუკეთესო მეგობარია. ვფიქრობ, ერთმანეთთან იდუმალი თანხმობა გავაფორმეთ. ახლობელი სული მეტია, ვიდრე ნათესავი. წლებთან ერთად, ამაში უფრო და უფრო ძლიერ ვრწმუნდები.

და რას გვეტყვით სიყვარულზე?
მე არაფერს და არავის ველი. ვცხოვრობ საკუთარი ცხოვრებით ამ პლანეტაზე, საკუთარ გზას გავდივარ. მაგრამ თუ მან, სიყვარულმა ისევ დამიკაკუნა, სიხარულით გავუღებ კარს. არასოდეს შევწყვეტ, მიყვარდეს. ყოველთვის გავხსნი საკუთარ გულს. მე არ მჯერა მხოლოდ ერთი სიყვარულის მთელი ცხოვრების განმავლობაში.

როგორ გაიხსენებთ კარიერის დასაწყისს? რას ნიშნავდა თქვენთვის ცნობილ სერიალში მონაწილეობა და ფიქრობდით თუ არა, რომ იგი მსგავს პოპულარობას მოიხვეჭდა?
როცა 20 წლის ხარ და ამოუცნობ გზას ადგახარ, მუდამ ფიქრობ მომავალზე. დრო ძალიან სწრაფად მიქრის და არ იცი, მიაღწევ თუ არა რამეს საბოლოოდ. როცა უფროსი ხდები, გინდა იყო აქ და ახლა, უბრალოდ, დატკბე ცხოვრებით. ვისურვებდი, დროის შენელება შემეძლოს. ცოტა ხნის წინ, კორტნიმ სოციალურ ქსელში ჩვენი ძველი ფოტო გამოაქვეყნა თვითმფრინავში. ფოტო გადაღებული იყო იქამდე, სანამ „მეგობრები“ ეთერში გავიდოდა. მაშინ ჯერ კიდევ ვერ ვიაზრებდი, რომ ეს ყველაფერი ჩემს თავს ხდებოდა. ძალიან მენატრება ის დრო და ყველა მიყვარს, ვისთან ერთადაც ვმუშაობდი. გქონდეს სამსახური, რომელიც სიხარულს განიჭებს, ნამდვილი ბედნიერებაა.

გადაღებების პარალელურად, გასული საუკუნის 90-იანებიც გენატრებათ?
1990-იანები ნოსტალგიას მიღვიძებს. იმ დროს ადამიანები საზოგადოებრივი აზრის მიმართ ასეთი დაუცველები არ ყოფილან, როგორც ახლა. მეტს კონტაქტობდნენ. რა თქმა უნდა, მენატრება იმდროინდელი სტილიც. დღემდე მიყვარს შარვალი, ზედმეტსახელად Maharishi, რომელიც გასული საუკუნის 90-იან წლებში პოპულარული იყო. ბევრი წყვილი მქონდა, სხვადასხვა ფერის და სხვადასხვა ნაქარგით. ახლა მხოლოდ ერთი მაქვს.

„ყველაზე სექსუალური ქალის“ წოდება გაქვთ მიღებული. რას ფიქრობთ სექსსიმბოლოს სტატუსზე და როგორ გაიხსენებთ წითელი ხალიჩის ისტორიას?
ეს სიტყვა ჩემთვის არაა. იყო სექსუალური, ნიშნავს დარჩე ბუნებრივი, საყვარელი და იუმორით სავსე. კარიერის განმავლობაში მქონდა როგორც წარმატებული გამოსვლები, ასევე კრახიც. ვფიქრობ, ნებისმიერი წითელი ხალიჩის საუკეთესო ნაწილი − მისი დასასრულია!

როგორც ირკვევა, ახალმა სერიალმა თქვენს ცხოვრებაში დიდი გარდატეხა მოახდინა...
ხანდახან შესაძლოა გზიდან ფეხი გადაგიცდეთ და ვეღარ გაიგოთ, რისთვის აკეთებთ საკუთარ სამუშაოს, მაგრამ ეს შოუ ჩემთვის ნამდვილი შეხსენება აღმოჩნდა. მე ვიმყოფები ზუსტად იქ, სადაც უნდა ვიყო. ბევრი დრო დამჭირდა, რომ გამეგო, რეალურად რა შემიძლია. ამაში ყოველთვის დარწმუნებული ნამდვილად არ ვყოფილვარ. ალბათ იმიტომ, რომ ადრე სხვა ადამიანებზე ვიყავი დამოკიდებული. ახლა პასუხისმგებლობას საკუთარ თავზე ვიღებ. და იცით, რა? ეს ძალიან სასიამოვნოა.
ეს სერიალი გვაძლევს საშუალებას შევიხედოთ დილის გადაცემების კულისებში და ცხოვრების უნიკალური წესი, ვარსკვლავებით შეპყრობა და კორუფცია დავინახოთ. ვაჩვენებთ სიმართლეს იმაზე, თუ როგორი დამოკიდებულება აქვთ მამაკაცებს ქალების მიმართ ჩვენს საზოგადოებაში, განსაკუთრებით − სამუშაო ადგილას. შოუ სიჩუმის კულტურაზე ყვება. როგორ ვმონაწილეობთ ხანდახან მის შექმნაში და ამას ვერც ვაანალიზებთ. ეს როლი ჩემთვის კარიერაში ერთ-ერთი ყველაზე რთული აღმოჩნდა. საკუთარი გმირი, ამბიციური ტელეწამყვანი კოლეგებისა და უფროსების მხრიდან სექსიზმს, ეიჯიზმს და დისკრიმინაციის სხვა სახეობებს ეჯახება. ალექსი ახალგაზრდა აღარაა, მაგრამ მთელი ძალით ცდილობს თანამედროვეობა შეინარჩუნოს. გადაღებებამდე Good Morning America-ს კულისებში დიდი დრო გავატარე, იქ დილის 5 საათიდან მივდიოდი, რათა როლი უკეთ გამეთავისებინა.

როგორ ჩამოყალიბდა თქვენი იმიჯი ამ სერიალში?
ნინა და კლერ ჰოლუორტებთან ერთად ვმუშაობდი. ამ სტილისტებთან უკვე 10 წელზე მეტია, რაც ვთანამშრომლობ. ავარჩიეთ დახვეწილად შეკერილი მამაკაცის კოსტიუმები ნაცრისფერ, ცისფერ და ყავისფერებში. არანაირი ყვითელი ან ფუქსია. შთაგონების წყაროდ დაიანა სოიერი იქცა − ლეგენდარული ტელეწამყვანი, ცნობილი თავისი პროფესიონალიზმითა და სტილით. ის ყოველთვის ელეგანტური და მოდური იყო ჩემს თვალში.

ზოგადად, ქალთა ემანსიპაციაზე რა აზრის ხართ?
ქალებს არასოდეს აძლევდნენ უფლებას, ძალაუფლება ხელში აეღოთ. დღეს, ძალაუფლება მე სექსუალური მგონია − ისევე, როგორც ქალის ინტელექტი. ქალები განუმეორებლად ყოვლისშემძლეები და კრეატიულები არიან.