ნათია კარიაულმა სამხატვრო აკადემია ტანსაცმლის მოდელირების მიმართულებით დაამთავრა. კარიერულ სარბიელზე სვლა სწორედ ამ სფეროში დაიწყო, თუმცა 2007 წლიდან გეზის ოდნავი ცვლილება გადაწყვიტა და რთულ საქმიანობას − ინტერიერის დიზაინს შეეჭიდა. სპეციალური კურსებისა და სტაჟირების გავლის შემდეგ, პატარ-პატარა ობიექტებზე მუშაობა განაგრძო. პირველი დიდი ობიექტი, რომელმაც წარმატება მოუტანა, კლუბი TWO SIDE აღმოჩნდა, რომლისთვისაც 2009 წლის „საუკეთესო საზოგადო ინტერიერის“ ჯილდოც მიიღო. ასე გაიცნო ხალხმა. მას შემდეგ, პორტფოლიოში უამრავი წარმატებული კერძო თუ საზოგადოებრივი თავშეყრის პროექტი დაუგროვდა. ქართველ ინტერიერის დიზაინერთან თანამშრომლობა მომხმარებლისთვის ძალიან სასიამოვნოა, რადგანაც ნათია სწორი მიდგომებისა და პროფესიონალიზმის წყალობით, მათ გაოცებას ყოველ ნაბიჯზე ნამდვილად ახერხებს.

რას ნიშნავს თქვენთვის ეს საქმიანობა? რამ გიბიძგათ, ხელი ინტერიერის დიზაინერობისთვის მოგეკიდათ?
თავიდანვე დიზაინი ავირჩიე, უბრალოდ, შემდეგ პროფილი შევიცვალე. ძალიან მიყვარს ჩემი საქმე. რაც უნდა დაკავებული ვიყო, მას არასოდეს ვღალატობ. რა თქმა უნდა, დიდ ენერგიას და რესურსს მოითხოვს, მაგრამ ძალიან მსიამოვნებს ამის კეთება. შედეგი ძირითადად ყოველთვის ისეთი გამოდის, როგორიც გვინდა, ეს კი იმდენად დიდი კმაყოფილებისა და სიამოვნების განცდას გვანიჭებს, რომ დამკვეთთან ერთად დადებითი შთაბეჭდილებებით ვივსებით. ამასთან, მრავალფეროვანია. სხვადასხვა დამკვეთის უკან სხვადასხვა ადამიანი და სრულიად სხვა სამყარო დგას. თითოეული მომხმარებელი ახალ გამოცდილებას გვმატებს. ჩემი საქმე ცოტა ფსიქოლოგიურ დისკურსშიც განიხილება. ყველას თავისი გემოვნება და მისწრაფებები ახასიათებს, მათ ისე უნდა მიუდგე, როგორც სჭირდებათ.

დამკვეთთან თანამშრომლობის პროცესი როგორ წარიმართება?
უპირველესად, მისი გაცნობაა მთავარი. არის შემთხვევები, როცა დარწმუნებულნი არიან საკუთარ არჩევანში, მაგრამ მუშაობის პროცესში გამოდის, რომ თურმე სხვა რამ სჭირდებათ. ამიტომაც, მე ჯერ მათ პიროვნულ მხარეს უნდა გავეცნო, მათ მოთხოვნებსა და სურვილებს. თუ პირად სივრცეზეა საუბარი, მაქსიმალურად ვითვალისწინებთ, რომ ინტერიერი მათ გემოვნებას და სურვილებს შევუსაბამოთ.

ზოგადად, განსხვავებული ადამიანები ვართ და სხვადასხვანაირად ვაზროვნებთ. ყველა ინდივიდუალურია. იმ შემთხვევაში, თუ ჩვენი სურვილები ერთმანეთთან ვერ თანხმდება და ვხვდები, რომ ვერ ვითანამშრომლებთ, მირჩევნია შევწყვიტო, ვიდრე საბოლოოდ არასწორ შედეგამდე მივიდეთ. მაგრამ, ბევრი დამკვეთია ისეთი, რომლებსაც მუშაობის პროცესში ჩემდა უნებურად, საკმაოდ ვუახლოვდები. იმ პერიოდში თავს მათი ოჯახის მეგობრადაც კი აღვიქვამ, რადგანაც თითოეულ წევრთან ახლო შეხება მაქვს. ხანდახან თვითონაც არ იციან, რა როგორ სჯობს და ბოლომდე მენდობიან. ვფიქრობ, თუ გულით არ მიუდგები ამ საქმეს, შედეგი სათანადო არ იქნება.

რაც შეეხება საზოგადო სივრცეებს, ვითვალისწინებთ დამკვეთის მოთხოვნებს. თავად ვთავაზობ მიმართულებას, ვმსჯელობთ, ვკამათობთ, მივდივართ კომპრომისებზე. დიდი მნიშვნელობა აქვს ბიუჯეტს, რომელსაც უნდა მოვერგოთ. ისე უნდა გავაკეთო ჩემი საქმე, რომ არც ბიუჯეტს გავცდე და დამკვეთისთვის სასურველი შედეგიც მივიღოთ. ეს ერთგვარი გამოწვევაა. გამართლებული უნდა იყოს ფერებიც და დეტალებიც. ინტერიერი არ უნდა იყოს სტილისტურად ამოვარდნილი. ხანდახან სხვადასხვა სტილი მოსწონთ და არ იციან, როგორ უნდა შეუხამონ ერთმანეთს. შემდეგ, კონკრეტულ შეთავაზებას რომ ვუკეთებ, ხვდებიან, რომ ზუსტად ეს უნდოდათ.

რომელია თქვენი ფავორიტი სტილი, რომელში მუშაობაც გხიბლავთ?
ძალიან მომწონს ლოფტისა და კლასიკის მიქსი. ზოგადად, სხვადასხვა სტილის შერწყმა მიმდინარე ტენდენციებსაც პასუხობს და ჩემთვის ეს საინტერესოა.

საქართველოში ვრცელდება თუ არა 2019 წლის ინტერიერის ტენდენციები?
ცოტა გვიან იკიდებს ფეხს, მაგრამ ინტერნეტის მეშვეობით ამაზე დაკვირვება ისეთი ხელმისაწვდომი გახდა, რომ აქტიურად ვრცელდება. მოგეხსენებათ, ქართველებს სტილის შეგრძნებაც მაღალ დონეზე გვაქვს. ზოგადად, ინტერიერის დიზაინერი უკვე ძალიან აქტუალური პროფესია გახდა. ადამიანებმა გაიაზრეს, რომ სწორი შედეგის მისაღებად მისი აყვანა აუცილებელია, რათა სამომავლოდ ლაფსუსებს არ ჰქონდეს ადგილი.

როგორ ვითარდებით ყოველწლიურად? მუშაობის პროცესში გარკვეულ ინსპირაციის წყაროებს ხომ არ გამოყოფდით?
სხვადასხვა შემთხვევაში სხვადასხვაა. უპირველეს ყოვლისა, ის სივრცე ხდება ინსპირაციის ობიექტი, რომელსაც პირველად ნახულობ. ეს შეიძლება იყოს ამოუცნობი, შემთხვევით დანახული რომელიღაც ელემენტი. ამასთან, ყოველწლიურად ევროპის გამოფენებზე დავდივართ. ეს ცალკეული სამყაროა. იქ დიზაინის თვალსაზრისით იმდენ მასალას ითვისებ, რომ შემდეგ ამას ბუნებრივად იყენებ საკუთარ საქმიანობაში. მთავარია ხედვა და ემოცია. გარკვეული უნარები მუშაობის პროცესში მოდის. ბევრ რამეს ვეცნობი. დანარჩენს გემოვნება და დამკვეთის სტილისტური არჩევანი განსაზღვრავს.

რითი საზღვრავთ კარგ ინტერიერს? როგორია ის თქვენთვის?
კარგი ინტერიერი ალბათ არის ის, რომელშიც ადამიანი თავს კომფორტულად გრძნობს. შეიძლება იყოს ლამაზი, მაგრამ არ გიზიდავდეს და იქ გაჩერება დიდხანს არ შეგეძლოს. ჩემი აზრით, ინტერიერი იმისათვის იქმნება, რომ ადამიანმა თავი კომფორტულად იგრძნოს. ფერები, განათება, ავეჯი, ფაქტურა − ყველაფერს უდიდესი მნიშვნელობა აქვს. განათების გადანაწილებას თავად აქტიურად ვიყენებ და მას უდიდეს მნიშვნელობას ვანიჭებ. რესტორანი იქნება თუ სახლი, მაქსიმალურად მყუდრო და ფუნქციურად გამართული უნდა იყოს.