სუპერმოდელი, წამყვანი და მრავალშვილიანი დედა, ჰაიდი კლუმი მუდამ საქმეებშია. ამჟამად, ის ახალ რეალითი პროგრამას უშვებს AMAZON PRIME VIDEO-ზე, ისევ ახალგაზრდა დიზაინერების შესახებ; მუშაობს ორი საკუთარი ბრენდის − HEIDI KLUM INTIMATES-ის და HEIDI KLUM SWIM-ის კოლექციებზე; მიჰყავს გადაცემა, სახელწოდებით GERMANY’S NEXT TOPMODEL. ამასობაში, ჰაიდიმ მესამე ქორწინება გააფორმა. 46 წლის ასაკში ის თამამად აცხადებს, რომ ახლა ძალიან ბედნიერია. კლუმის რჩეული 30 წლის ტომ კაულიცია − ჯგუფ TOKIO HOTEL-ის გიტარისტი.

როგორ უმკლავდებით ასეთ რეჟიმს?
მთელი ძალისხმევით ვცდილობ ბალანსი შევინარჩუნო ოჯახსა და სამსახურს შორის. ვადგენ საქმეების სიას და ყოველ მომავალ წუთს ვგეგმავ. კარგ დღეებში, როცა გეგმები ამართლებს, თავს Cirque du Soleil-ის ვარსკვლავად ვგრძნობ, მაგრამ უმეტესწილად ნამდვილი ქაოსი გამოდის! სამსახურის გამო, ხანდახან მიწევს გამოვტოვო სასკოლო კონცერტები − ისინი ოთხნი არიან და ვაღიარებ, ყველაფრის მოსწრებას ვერ ვახერხებ.

თქვენი ცხოვრება მთლიანად მოდის სფეროს უკავშირდება. გადაცემებით ყოველთვის გქონდათ შეხება ახალბედა, ნიჭიერ დიზაინერებთან. ახლა თავადაც ქმნით სამოსს. ასეთი მისწრაფება ბავშვობიდან გამოძრავებთ?
იცით, ბავშვობაში ვაღმერთებდი „ბარბის“ თოჯინებს, მაგრამ იმის მაგივრად, რომ მათთვის უამრავი სამოსი მეყიდა, იმიჯებს თავად ვიგონებდი, თავიდან ფეხებამდე. დედაჩემი არაჩვეულებრივად კერავდა და ხშირად მაძლევდა ნაჭრების ნარჩენებს, რომლებსაც საკუთარი იდეების გასახორციელებლად ვიყენებდი. ძალიან შემოქმედებითი ბავშვი ვიყავი! სკოლის შემდეგ, გერმანიაში, გამოცდები დიზაინის ფაკულტეტზე ჩავაბარე. მაგრამ იქ მოხდა სწორედ სილამაზის კონკურსის ამბავიც, რომელმაც ჩემი სამოდელო კარიერის სტარტს შეუწყო ხელი. ჩემი ცხოვრების გზა სხვა მიმართულებით შეტრიალდა.

ამ კონკურსში ტრიუმფალური გამარჯვების შემდეგ, გადაგიღეს Sports Illustrated Swimsuit-ის ყდისთვის, მოგვიანებით მიგიწვიათ Victoria’s Secret-მაც და გოგონამ გერმანიის პატარა ქალაქიდან, მსოფლიო ტოპმოდელის ტიტული მოიპოვეთ. როგორ გაიხსენებდით პირველ ნაბიჯებს?
როცა კარიერას ვიწყებდი, სტანდარტი ძალიან მკაცრი იყო და მიხარია, რომ ახლა პოდიუმზე ვხედავთ სხვადასხვა პარამეტრის ფიგურებს, სხვადასხვა ფერის კანს, სხვადასხვა ასაკს და გენდერულ იდენტობას. თამაშის კიდევ ერთი ახალი წესი სოციალური ქსელების განვითარებას უკავშირდება: ბრენდებს სურთ ისეთი სახეები აიყვანონ, რომლებსაც ბევრი მიმდევარი ჰყავთ. ამიტომაც, მიმდევარი სოციალურ ქსელში ახლა ერთგვარი ვალუტაა.

რა შთაგაგონებთ ახალი სამოსის შექმნისას?
საკუთარი გარდერობი. მე ვკერავ იმას, რასაც თავად ვისურვებდი მეტარებინა. ვატარებ კიდეც. ხანდახან, ჩემი გადაცემის მონაწილეების მსგავსად, მაღაზია Mood Fabrics-ში მივდივარ, რამდენიმე ქსოვილს ვყიდულობ ლამაზი პრინტით და ჩემთვის ბოჰემური სტილის კაბას ვიკერავ, რომელიც ზაფხულს მიფერადებს. მომწონს იმაზე ფიქრი, რომ ზუსტად ასეთი არავის აქვს − ის ერთადერთი მოდელია მსოფლიოში.

როგორია თქვენი გეგმა ქსელური მაღაზიებისთვის?
მათთვის კოლექციების შექმნისასაც მუდამ ვცდილობ რაიმე ორიგინალური გავაკეთო. იდეების ძებნაში ვათვალიერებ ბაზარს, მოგზაურობის დროს ვაკვირდები ქუჩაში გამვლელებს. მაგრამ, რაც მთავარია, ჩემ მიერ გამოშვებული ნივთები აუცილებლად ხელმისაწვდომი უნდა იყოს. ვფიქრობ, ქალისთვის თეთრეულის ან საცურაო კოსტიუმის შეძენა ბიუჯეტში გარღვევას არ უნდა იწვევდეს. თუ მეუბნებიან, რომ ნაწარმზე ფასს ობიექტურად ვერ დააკლებენ, მირჩევნია სხვა ქსოვილი გამოვიყენო ან ზედმეტი დეკორი მოვაშორო. არ გავუშვებ გაყიდვაში ნივთს, რომელსაც ბევრი ქალი ვერ შეიძენს.

როცა საკუთარი ქალის თეთრეულის რეკლამაში თავად გამოჩნდით, საზოგადოებაში თქვენი მისამართით კრიტიკა გამოითქვა. ისინი ფიქრობდნენ, რომ თქვენი ასაკის გამო, ეს საქმე ახალგაზრდა მოდელისთვის უნდა მიგენდოთ.
სექსუალურობა ჩემთვის დაკავშირებულია არა ასაკთან, არამედ თავდაჯერებულობასთან. იყო კმაყოფილი საკუთარი თავით, დააფასო და ღირსეულად გამოკვეთო ის, მიიღო მისი ნაკლიც და არასრულყოფილებაც − აი, რა არის რეალურად სექსუალური.

ფაქტია, 46 წლის ასაკში საოცრად გამოიყურებით და თქვენი სხეული ბევრი ქალისთვის შთაგონების წყაროდაც იქცევა. თუმცა, როგორც ცნობილია, დიეტების დაცვა არ გიყვართ.
მიყვარს გემრიელად მირთმევა. ვგიჟდები შნიცელებზე, სოსისებსა და გერმანული სამზარეულოს კერძებზე. მაგრამ, ჩვენ ბაღიც გვაქვს, სადაც ბოსტნეულს და მწვანილს ვზრდით. სწორედ ყოველივე ეს ხვდება ჩვენს სასადილო მაგიდაზე. ოჯახური ვახშმობის შემდეგ, საცეკვაო წვეულების მოწყობა ერთგვარ წესად გვექცა.

არაა გასაკვირი...15 წელი იყავით დაკავებული ქორეოგრაფიით, ცეკვავდით ბალეტს და, ალბათ, ამ გატაცებამ თავი ვერ დაგავიწყებინათ...
დიახ, რომ არა მოდელი, მოცეკვავე ვიქნებოდი. მაგრამ ცეკვა ახლა ჩემი ყოველდღიური ფიზიკური დატვირთვის ნაწილია. ის ემოციურადაც განმტვირთავს. ეზოში ბატუტიც გვიდგას. ძალიან მიყვარს ხტუნაობა, განსაკუთრებით კი იმიტომ, რომ ამას ძირითადად შვილებთან ერთად ვაკეთებ.

ზოგადად, როგორ იქცევთ თავს ერთად ყოფნისას?
ძალიან მიყვარს საერთო თავშესაქცევის მოფიქრება. ჩემთვის მნიშვნელოვანია ვიცოდე, რომ ჩემს შვილებს აქვთ საშუალება გამოხატონ საკუთარი თავი, ისევე, როგორც ეს მე მქონდა. ერთად ვრთავთ და ვხატავთ სააღდგომო კვერცხებს, სხვადასხვა ფორმებად ვჭრით ჰელოუინის გოგრებს, ხშირად უბრალოდ ვხატავთ და ამ ნახატებით კედლებს ვრთავთ. შვილების სურათებს ცნობილი მხატვრების ტილოების გვერდით ვკიდებ, ამით მინდა ვაგრძნობინო, რომ მათი შემოქმედება არანაკლებ მნიშვნელოვანი და ღირებულია.

თქვენ თავად რა ისწავლეთ საკუთარი შვილებისგან?
ამაზე მარტივად ვერ გიპასუხებთ. ისინი საოცრად შთამაგონებენ. თითოეული მათგანი თავისებურადაა ბრძენი. გულწრფელად წუხან, თანაუგრძნობენ და უყვართ. სწორედ ამ უპირობო სიყვარულს ვსწავლობ მათგან.

ბოლო დროს განსაკუთრებულად პოზიტიური ხართ. თქვენს საუბარსაც ეტყობა, რომ სიტყვებს „სიყვარული“ და „მხიარულება“, ბევრჯერ ახსენებთ. როგორც ჩანს, ასაკთან ერთად, სიცოცხლით ტკბობის ხალისი უფრო გეზრდებათ...
დიახ, ახლა ძალიან ბედნიერი ვარ! შეიძლება ითქვას, მთელი ჩემი ცხოვრების განმავლობაში განსაკუთრებულად ბედნიერი. ჯანმრთელი შვილები მყავს, გვერდით საყვარელი მამაკაცი, რომელიც ჩემზე ზრუნავს და პატივს მცემს. ახალ შემოქმედებით მიზნებს ვისახავ და როცა სარკეში ვიყურები, ყველაფერი, რასაც ვხედავ, ეს საკუთარი, გულწრფელი ღიმილია.

საყვარელი წიგნი: „სიტყვების ლექსიკონი“.

ჩემს პლეილისტშია: Tokio Hotel-ის მუსიკა, რომელსაც ჩემი ქმარი ასრულებს. ორი თვის წინ გამოუშვეს ახალი სიმღერა Melancholic Paradise და მას დღემდე მრავალჯერ ვისმენ. მალე მათგან კიდევ ერთ საინტერესო ჩანაწერს მოვისმენთ.

საყვარელი ფილმი: „ავატარი“. მიყვარს კინოში ფანტასტიკა და მაგია. მსგავსი სურათის ნახვის შემდეგ, მსურს ვიოცნებო და ვიფანტაზიორო. „ავატარში“ ასევე მხიბლავს სპეცეფექტები და მონტაჟი.

ყველაზე შთამაგონებელი მოგზაურობა: გასულ წელს, საგაზაფხულო არდადეგებზე, ბავშვებთან ერთად აზიაში გავემგზავრე. ეს იყო საუკეთესო რამ, რაც მათ გადახდათ. როცა მოგზაურობ ქვეყანაში, რომელიც კარდინალურად განსხვავდება შენი საცხოვრებლისგან, უსასრულო ინსპირაციას პოულობ. შთაგაგონებს ახალი კულტურის აღმოჩენა და ყველაფერი, რაც შენ გარშემოა. ჩვენ არაჩვეულებრივად გავატარეთ დრო. მოვინახულეთ ჩინეთის დიდი კედელი, პეკინი, ტოკიო.

საყვარელი კერძი: კარტოფილი ფრი!

საყვარელი ჩანთა: უზომოდ მიყვარს Cеline-ის ჩემი შავ-თეთრი ჩანთა, რომელიც ყოველი მგზავრობის დროს თან დამაქვს. მასში ყველაფერი თავსდება, რაც შეიძლება გზაში დაგჭირდეს. მეტიც − თავისუფალი ადგილიც რჩება.

ყოველთვის თან ვატარებ: ნოუთბუქს, ტელეფონს, ქაღალდს ფანქრით და ყურსასმენებს.

საყვარელი დიზაინერი:Valentino-ს შემოქმედებითი დირექტორი პიერ პაოლო პიჩოლი.

ნივთები, რომლებიც ყველა ქალის გარდერობში უნდა იყოს: ტანზე იდეალურად მომდგარი ჯინსი, ელეგანტური პიჯაკი, მაღალქუსლიანი ფეხსაცმელი, სასაცილო კედები და ტყავის ქურთუკი.

საუკეთესო აქსესუარი ნებისმიერი იმიჯისთვის: ჩემი ქორწინების ბეჭედი!

საყვარელი სამკაული: ყველაფერი მომწონს. სამკაულის დიდი გულშემატკივარი ვარ. ყელსაბამი, საყურე, სამაჯური, ბეჭედი − ყველაფერს ვატარებ. განსაკუთრებით ვაფასებ ანტიკვარს.

ჩემს კოსმეტიკის ჩანთაში: პერიოდულად ვცვლი ბრენდებს. ახლა ვიყენებ Charlotte Tilbury ის.

საყვარელი სუნამო: Hermes Ambre Narguile.