ჯეიკ ჯილენჰოლი ცნობილია როგორც შრომისმოყვარე მსახიობი და პირადი სასიყვარულო ცხოვრების კარგად შემნიღბველი მამაკაცი. კირსტენ დანსტი, რიზ უიზერსპუნი, ტეილორ სვიფტი და ბევრი სხვა ცნობილი გოგონა იყო დროებით მისი სასიყვარულო პარტნიორი. ჯეიკი ახლა 23 წლის ფრანგ მოდელ ჟანა კადიეს ხვდება. ბოლო პერიოდში მსახიობი „სპაიდერმენის“ ახალი ნაწილით იყო გართული და ტომ ჰოლანდთან ერთად მსოფლიოს გარშემო უამრავ ღონისძიებას ესწრებოდა.
ჯეიკ, თქვენს ერთ-ერთ უკანასკნელ სურათში „ხავერდოვანი ბენზოხერხი“ სამხატვრო კრიტიკოსს განასახიერებთ. თანამედროვე ხელოვნება თქვენთვისაც არაა უცხო?
როგორ გითხრათ... თუ ნიუ-იორკში, ჩემი სახლის სიახლოვეს ერთ სახელოსნოში შეიხედავთ, მეპატრონე აუცილებლად გეტყვით, რომ ჯეიკ ჯილენჰოლი იქ ათენებს და აღამებს − უკვეთავს ჩარჩოებს საკუთარი ფოტოპორტრეტებისთვის! ეს ზღაპარი მან ჩვენს ბოჰემურ რაიონში გამვლელთა მისაზიდად მოიგონა. მე მართლაც დავდივარ მასთან, ოღონდ ფილმების პოსტერების ჩარჩოებისთვის. ასეთი ჩვევა მაქვს. რაც შეეხება ჩემს გმირს „ხავერდოვან ბენზოხერხში“, მე ყველაზე მეტად მაინტერესებდა გამეგო, როგორ შეიძლება ერთი ხელოვნების ნიმუში მეორეს, პროფესიონალის გადმოსახედიდან ვამჯობინოთ. როგორ ხდება საერთოდ ხელოვნების კრიტიკა?
თავად დასაოჯახებელი ხართ, მაგრამ ბიძის სტატუსს უკვე ფლობთ. თქვენი დის ოჯახი, ალბათ საკუთარის მაგივრობას გიწევთ, ასე არაა?
ამის შესახებ ხშირად მეკითხებიან და სტანდარტული პასუხი მოვიფიქრე: „ბიძის როლით მომავალი მამის როლისთვის ვემზადები“. პრინციპში, ეს მარტივი როლია. იქამდე ვეთამაშები გოგონებს, სანამ არ დაიღლებიან. ვიტყოდი − დაუძლურებამდე. ან ტკბილეულით ვუმასპინძლდები. მეგისთან ორცხობილებითა და შოკოლადით დატვირთული მივდივარ და ამით მადლობას ვუხდი, ბავშვობაში უამრავ გიჟურ დადგმაში რომ მაძალებდა მონაწილეობის მიღებას! ირონიას რომ თავი გავანებოთ, მას არაჩვეულებრივი ბავშვები ჰყავს და სამაგალითოდ ზრდის. მშვენივრად მესმის, რომ მამის როლი ძალიან რთულია. უნდა იცოდე „არა“-ს თქმა. იშვიათად, მაგრამ მაინც რთული იქნება.
ყველაზე მეტად რა გიზიდავთ სამსახიობო საქმიანობაში?
ალბათ ის, რომ შემიძლია საკუთარ თავს უფლება მივცე ძლიერი განცდები გამოვცადო და ისე მოვიქცე, როგორც რეალურ ცხოვრებაში ვერასდროს მოვიქცეოდი. ეს ხანდახან სახალისოა − დააკვირდე საკუთარ თავს პერსონაჟის იმიჯში. როცა სამყაროს განსხვავებული რაკურსებიდან უყურებ, ძალიან ბევრს სწავლობ.
11 წელია, რაც მსახიობი ხართ. ეს პროფესია ჯერ კიდევ ბავშვობაში გაითავისეთ. როგორ ფიქრობთ, რა დაგეხმარათ წარმატებული „ზრდასრული“ მსახიობი გამხდარიყავით მაშინ, როცა ბევრი ბავშვი ვარსკვლავი ამ გამოწვევას ვერ უძლებს?
ბრწყინვალე მშობლები მყავს: მამა რეჟისორი, დედა − სცენარისტი. ისინი ყოველთვის მხარს მიჭერდნენ. რა თქმა უნდა, ჩემი და, მეგიც. ოჯახში ვამბობთ ხოლმე, რომ ის საუკეთესოა ჯილენჰოლებს შორის. სამწუხაროდ, მშობლები დიდი ხნის წინ დაშორდნენ, მაგრამ მეგობრული ურთიერთობა შეინარჩუნეს. დედა ნიუ-იორკში ცხოვრობს, მამა ახალ ოჯახთან ერთად ლოს-ანჯელესში გადავიდა. ბევრ დღესასწაულს, მაგალითად, მადლიერების დღეს, ყოველთვის ერთად აღვნიშნავთ. სწორედ მათი ერთიანობისა და ჩვენდამი დამოკიდებულების წყალობით, არაჩვეულებრივი ურთიერთობა ჩამოგვიყალიბდა.
ორი წელი სწავლობდით ბუდიზმს კოლუმბიის უნივერსიტეტში...
დიახ, უმა თურმანის მამის − რობერტ თურმანის ხელმძღვანელობით. ის პირველი იყო ჰოლივუდიდან, რომელიც დალაი-ლამამ მიიღო. კარგი დრო იყო, მაგრამ უნივერსიტეტი მივატოვე, რადგანაც კინოში თამაში მსურდა. საბედნიეროდ, სწავლამ, ისევე, როგორც მშობლების დარიგებებმა, გამაანალიზებინა, რომ „წარმატების“ გაგებაზე ზედმეტადაც არ უნდა კონცენტრირდე. არ შეიძლება მიმართო სამსახიობო საქმიანობას იმაზე ფიქრით, თუ როგორ გახდე საუკეთესო, რადგანაც ყველაფრის მოსწრებისკენ ლტოლვა მუდმივ სტრესში გამყოფებთ.
ტომ კრუზი შეგეკამათებოდათ...
ჯერ კიდევ ბავშვობაში გავიკეთე ამაზე „აცრა“. მიუხედავად იმისა, რომ ჩემი მშობლები ჰოლივუდში არც ისეთი მდიდრები და პოპულარულები იყვნენ, ბევრ ცნობილ ადამიანთან მეგობრობდნენ. ჯეიმი ლი კერტისი ჩემი ნათლიაა, პოლ ნიუმენი − მშობლების ახლო მეგობარი გახლდათ. ახალგაზრდა სტივენ სოდერბერგი კი ჩვენი ავტოფარეხის თავზე ოთახს სიმბოლურ ფასად რამდენიმე წლის განმავლობაში ქირაობდა. მოკლედ, ბავშვობიდანვე დავიწყე კრეატივის შესწავლა. შინ ყოველთვის შემოქმედებითი ნატურები გვსტუმრობდნენ და ვიცოდი, რა იყო ჰოლივუდი და ბოჰემა. მშობლებს ვემადლიერები იმისათვის, რომ ცხოვრების მხოლოდ ნათელ მხარეებს არ მაჩვენებდნენ. ამიტომაც, კარიერაში რთული გმირების თამაშს ვამჯობინებ.
ზოგიერთი დარწმუნებულია, რომ არც ცხოვრებაში ხართ მარტივი და თქვენთან მუშაობა რთულია...
მართლაც, საქმისადმი სერიოზული მიდგომა მაქვს. ადამიანები, რომლებიც ამ ბიზნესის მიღმა არიან, ჩემს მიდგომებს ვერ მიხვდებიან. მაგრამ, ჩვეულებრივ ცხოვრებაში სხვანაირი ვარ. არანაირი თავგადასავლები და ავანტიურები! ისინი სამსახურშიც მეყოფა. ალბათ, იმის შესახებ გაიგეთ, რომ მაღალფარდოვანი საუბრები არ მიყვარს. ან იმის შესახებ, რომ ხანდახან ისე მიტაცებს საკუთარი ფიქრები, გარშემომყოფები მავიწყდება. ეს მართლაც ასეა.
მაგრამ თქვენ გყავთ მეგობრები კოლეგებს შორის. მაგალითად, რაიან რეინოლდსი და წარსულში ჰიტ ლეჯერი...
მე და რაიანი ერთმანეთთან ახლოს ვცხოვრობთ და ვმეგობრობთ. ჰიტმა და მე კი ერთმანეთი ძალიან სასაცილოდ გავიცანით. ბაზ ლურმანი „მულენ რუჟისთვის“ მთავარ შემსრულებელს არჩევდა. ჩვენ კასტინგზე იუან მაკგრეგორთან ერთად მოვხვდით და მანამდე ერთმანეთზე არაფერი ვიცოდით. როლი მაკგრეგორმა მიიღო, ჩვენ კი ვერც გადავიკვეთეთ. ბევრი სინჯი გავიარეთ, მაგრამ ერთმანეთს ყოველთვის ვცდებოდით. შემდეგ, როცა საბოლოოდ გავიცანით ერთმანეთი, „უარყოფილებმა“ ერთმანეთს გავუგეთ და დავმეგობრდით. მოგვიანებით, ჰიტმა დამირეკა და თავისი ავსტრალიური აქცენტით მითხრა: „შენთვის სიახლე მაქვს!“ აღმოჩნდა, რომ ბაზ ლურმანმა ის თავის ახალ ფილმში დაპატიჟა, მან კი უარი განუცხადა! ასე გადაიხადა სამაგიერო ორივეს მაგივრად! ასეთი მეგობრობა გვქონდა...
შეგიძლიათ დაასახელოთ ფილმი, რომელმაც თქვენზე უდიდესი გავლენა მოახდინა?
ალბათ, ფედერიკო ფელინის „გზა“, 1954 წლის ფილმი. ამ სურათმა შთააგონა მამაჩემი, რეჟისორი გამხდარიყო. ჩემზე ასევე დიდი გავლენა მოახდინა ტომ ფორდის „ღამის ცხოველებმა“, სადაც მეც ვთამაშობ.
თქვენი და − მეგი, მშვენიერი მსახიობია, მაგრამ ბოლო დროს ნაკლებად თამაშობს. დიდ ძალისხმევას დებს ფემინისტურ მოძრაობაში #MeToo?..
მეგის ძველებურად სურს რეჟისორი და პროდიუსერი გახდეს. თანამედროვე ჰოლივუდში ეს ძალიან რთულია. მსახიობ ქალს, რომელსაც სურს პროფესია შეიცვალოს, სულ სხვანაირად უყურებენ, ვიდრე მსახიობ მამაკაცს. განსაკუთრებით ჩემი დის მსგავსს − გულწრფელს და ღიას, რომელიც საკუთარ აზრს მუდამ აფიქსირებს. ამიტომაც, პირადად მე, საკუთარი პროდიუსერული კომპანია შევქმენი და დავაწესე, რომ არასდროს არაფერში მივანიჭებდი უპირატესობას მამაკაც თანამშრომლებს. მსურს, ეს ჰოლივუდში ნორმად იქცეს.
დასთან ასეთი მჭიდრო მეგობრობა ჰოლივუდის სამსახიობო დინასტიებში იშვიათია...
ვაღიარებ, ბავშვობაში ძალიან ნერვებს მიშლიდა და თავს მაბეზრებდა! მაგრამ თავისი ნიჭით, სიმამაცით, პრობლემებთან თუ ცხოვრებასთან დამოკიდებულებით, მუდამ შთამაგონებდა. ნებისმიერ სირთულეს და გამოწვევას თვალს უსწორებს. მას ძალიან დიდ პატივს ვცემ. ჩვენ არა უბრალოდ და-ძმა, არამედ საუკეთესო მეგობრები ვართ. ყველაფერზე შეგვიძლია ვისაუბროთ და ყოველთვის ვუჭერთ ერთმანეთს მხარს − მაშინაც კი, თუ შეცდომებს ვუშვებთ.
თქვენ იმდენად დიდი პასუხისმგებლობის მქონე ადამიანი ბრძანდებით, რომ მგონი მზად ხართ ოჯახი შექმნათ....
მსურს, საბოლოოდ გავიზარდო. ვიმედოვნებ, მეოჯახე მამაკაცის სტატუსის დამკვიდრებით, თავს მართლაც გაზრდილ ადამიანად ვიგრძნობ. ბევრს ვსაუბრობ საქმის, სამსახიობო კარიერის მიმართ თავის მიძღვნაზე, მაგრამ გულის სიღრმეში მესმის, რომ არაფერია უფრო მნიშვნელოვანი, ვიდრე ქმრისა და მამის როლი, რეალურ ცხოვრებაში.
მაშინ, რატომ არ ჩქარობთ დაოჯახებას?
ალბათ, შეცდომის დაშვების მეშინია. რამდენი მშვენიერი ქალია სამყაროში, რამდენი შესაძლებლობაა... მაგრამ მე მონოგამიის მჯერა. ახლაც დარწმუნებული ვარ, რომ თუ საკუთარ ბედისწერას შევხვდები, ჩემს ადამიანს, ამას აუცილებლად ვიგრძნობ. ასაკთან ერთად, შეცდომის დაშვების რისკი მცირდება.