ეს მშვენიერი ფრანგი ქალბატონი ერთდროულად გვხიბლავს როგორც ეკრანზე, ისე პრემიერებისთვის მოწყობილ წითელ ხალიჩასა და სცენაზე, მიკროფონით ხელში. ვანესა პარადი ადრეულ ასაკშივე გახდა ცნობილი შემსრულებელი და მსახიობი. მისი პირველი ალბომი − M&J გამოვიდა მაშინ, როცა გოგონა სულ რაღაც 14 წლის იყო. ვანესას სიმღერები 5 წლის განმავლობაში ორჯერ მოხვდა ბრიტანეთის პრესტიჟულ რეიტინგში. 1988 წელს JOE LE TAXI, ხოლო 4 წლის შემდეგ − BE MY BABY.

სამშობლოში ჰიტებმა მას შეუდარებელი ვარსკვლავის სტატუსი მოუპოვა. 45 წლის მომღერალს 11 სტუდიური ალბომი აქვს. რაც შეეხება ფილმოგრაფიას, პარადი ამ მიმართულებითაც საკმაოდ სოლიდური სიით გამოირჩევა − 30-მდე სურათი, რომელთა შორისაა: „ელიზა“ ჟერარ დეპარდიესთან ერთად, „ერთი შანსი ორისთვის“ ჟან-პოლ ბელმონდოსთან და ალენ დელონთან ერთად. ვანესას ცხოვრებაში მნიშვნელოვანია ჯონი დეპთან ქორწინებაც, რომელმაც 1998 წლიდან 2012 წლამდე გასტანა. წელიწადია, რაც მისი მეუღლე ფრანგი მწერალი სემუელ ბენჩტრიტია.

რას ნიშნავს, გიყვარდეს?

გიყვარდეს, ეს ნიშნავს გიყვარდეს! თუ ჩვენ ეჭვი გვეპარება, ნიშნავს, რომ მტკიცედ არ გვიყვარს. რა თქმა უნდა, შეუძლებელია ყველაფერში აბსოლუტურად დარწმუნებულები ვიყოთ, მაგრამ უნდა გვჯეროდეს.

დარწმუნებული ხართ, რომ „სიმღერა სასწაულს ახდენს“? ამ „მაგიაზე“ ვისაუბროთ.

სიმღერა − ეს არის სხეულიდან გამოსვლა, ვიბრაცია. დიაფრაგმას შეხედეთ. როცა სტრესში ვართ, ის გაჭედილია, როცა ვმღერით, ის ვიბრირებს, და თავს მაშინვე კარგად ვგრძნობთ. ყალბადაც რომ იმღეროთ, თავს მაინც ბედნიერად იგრძნობთ, რადგანაც სიმღერის დროს ტვინში მეტი ჟანგბადი ხვდება. დიაფრაგმა მოდუნებულია და ცხოვრებაც ლაგდება. სიმღერა სიცილს ჰგავს. ეს ნიშნავს, იცხოვრო უკეთ.

ანუ, სიმღერა თქვენებური მედიტაციაა?

ეს თერაპიაა. როცა გარშემო მუსიკოსები ცოცხალ მუსიკას ასრულებენ, ყველაფერი ვიბრირებს. ვგრძნობ, როგორ ამოდის იატაკიდან გადმოცემული ვიბრაცია ჩემს ფეხებზე და შემდეგ მთელ სხეულს მოიცავს. ეს მაგიაა. და ეს კარგია ჯანმრთელობისთვის.

თქვენი ალბომის, სახელწოდებით „წყაროები“, შექმნამდე ფილმებზე მუშაობდით. ნიშნავს ეს იმას, რომ კინოს თავისი დრო აქვს, ხოლო მუსიკას თავისი? როგორ განსხვავდება ეს პერიოდები ერთმანეთისგან?

კინოში უცხო ადამიანის ისტორიას ვყვები, სხვა ადამიანის მიერ დანახულის. მუსიკაში კი თავად ვარ საკუთარი თავის რეჟისორი. სიმართლე გითხრათ, არ არსებობს განცალკევებული პერიოდები მუსიკისა და კინოსთვის − ეს მე ვირჩევ, გავატარო ისინი ამ სახით. ალბომზე მუშაობა და ტურნე დიდ დროს მოითხოვს. როცა ყველაფერი მთავრდება, დიდი სიამოვნებით ვიღებ ფილმებში მონაწილეობას იქამდე, სანამ ახალი ალბომით დავკავდები. კინოში სხვების სურვილებზე ვარ დამოკიდებული. თუ საინტერესო სურათს შემომთავაზებენ, ვთანხმდები, რადგანაც ეს თავისებური გაქცევაა საკუთარი სამყაროდან, მუსიკის სამყაროდან. მომწონს მოვლენების ასე დალაგება, მაგრამ მკაცრი წესები არ გამაჩნია.

რა არის ყველაზე რთული მსახიობისა და მომღერლის პროფესიებში?

იყო ყოველთვის მზად. როცა ტურნეში ვარ, თითქმის ყოველდღე ვმღერი. ხდება ხოლმე, რომ შეუძლოდ ვარ, ან ხმაში სისუსტე შემენიშნება, მაგრამ სცენაზე მაინც უნდა გავიდე. იქ ხომ მელოდებიან ადამიანები, რომლებმაც ბილეთები კონცერტამდე დიდი ხნით ადრე იყიდეს, გადაუხადეს ძიძას, რომ ბავშვები დაეტოვებინათ... მათ იმედს ვერ გავუცრუებ.

ეს სხვების მიმართ პასუხისმგებლობაა.

ზუსტად. მაგრამ, ჩვენ ხომ მაინც მივდივართ სამსახურში მაშინაც კი, თუ თავს არც ისე კარგად ვგრძნობთ? განსხვავება მხოლოდ იმაშია, რომ სცენაზე მომღერალი ყოველთვის შეუდარებლად უნდა გამოიყურებოდეს. ეს რთულია, მაგრამ არ ვწუწუნებ. ჩემი საქმე ბედნიერს მხდის, განსხვავებით იმ ადამიანებისგან, რომლებსაც სამსახური არ მოსწონთ. არის დღეები, როცა ვბუზღუნებ, მაგრამ არასოდეს ვაძლევ საკუთარ თავს საშუალებას, ეს ხალხში გამოვხატო. გამიმართლა, რომ ასეთი ცხოვრებით ვცხოვრობ და ამისთვის მადლიერი ვარ.

ძალიან ახალგაზრდა ასაკში გახდით ცნობილი და ახლა თქვენი ქალიშვილი − ლილი-როუზ დეპი მიყვება თქვენს ნაკვალევს. რას ურჩევთ? და ითვალისწინებს თუ არა თქვენს რჩევებს?

ჩემმა ქალიშვილმა ზუსტად იცის, რა უნდა. ვურჩევ მაშინ, როცა ამას თავად მეკითხება. მაგალითად, ვეუბნები, რომ მნიშვნელოვანია აირჩიოს ფილმები, რომლებშიც რეალურადაა დარწმუნებული, რომლებისაც სჯერა, და არა ისეთები, რომელთა მეშვეობითაც რამის სწრაფად მიღებაა შესაძლებელი. ხანდახან გთავაზობენ პროექტს, რომელიც ცნობილს გაგხდის, მაგრამ ეს პოპულარობა ხუთ წუთს გასტანს. მნიშვნელოვანია, შენი გზა აირჩიო. ლილი-როუზი ლამაზი, ჭკვიანი და ნიჭიერია, მაგრამ ეს ისაა, რითაც დაიბადა. აი, ამიტომაც მას სჭირდება მეტი იშრომოს. ჩვენ არ შეგვიძლია საკუთარ ნიჭზე გავჩერდეთ, ჩვენი ღირსებებითა თუ გარეგნობით დავკმაყოფილდეთ. ეს უბრალოდ ბუნების საჩუქარია. უნდა ვიმუშაოთ, ვიმუშაოთ და კიდევ ერთხელ ვიმუშაოთ. მოკლედ, მე ამის თქმა მისთვის არც კი მჭირდება. ლილიმ ეს ყველაფერი იცის და ასეც იქცევა.

მთელი მსოფლიო ცდილობს ფრანგი ქალების ელეგანტურობის საიდუმლოს ამოცნობას. თქვენ შეგიძლიათ ამ ფენომენის ახსნა?

არ უნდა დაგვავიწყდეს, რომ საფრანგეთი მდიდარი ისტორიის ქვეყანაა, ფრანგები კი თავიანთი ისტორიის მემკვიდრეები. ამასთან, განსხვავებით ქვეყნებისგან, სადაც ქალები ძირითადად ავტომობილებით გადაადგილდებიან, ფრანგები ფეხით ბევრს დადიან ქალაქში, ყველას დასანახად, და თანაც მაღალქუსლიანი ფეხსაცმელებით! ისინი ერთდროულად აქტიურები და ქალურები არიან. რა თქმა უნდა, სასაცილოა დაგარწმუნოთ, რომ მუდამ მაღალქუსლიანი ფეხსაცმელებით გვევლინებიან. შვილები მყავს და ვერ დაგიმტკიცებთ, რომ მაღალქუსლიანი ფეხსაცმლის გახდის გარეშე გავზარდე. მაგრამ, მაინც მიმაჩნია, რომ ფრანგი ქალების ელეგანტურობის საიდუმლო მათი მემკვიდრეობაა და ისიც, რომ ქალურები, თავისუფლები და აქტიურები არიან.

ეს საუკეთესო ახსნაა, რაც კი მომისმენია.

როცა ფრანგზე ვსაუბრობთ, ხშირად პარიზელს მოვიაზრებთ, პარიზში კი მუდამ ფეხით დავდივართ. საფრანგეთში ოთხივე სეზონია წარმოდგენილი, ამიტომაც სამოსს ხშირად ვიცვლით. დაუმატეთ ამას ის ფაქტი, რომ პარიზი − მოდის დედაქალაქია. ეს გახლავთ ყოველივე ამის „საიდუმლო“.

რომელი ნივთებია მთავარი თქვენს გარდერობში?

Chanel-ის პატარა შავი ჟაკეტი. ის ყველაზე ლამაზია! მიუხედავად იმისა, რომ ყოველთვის შეიძლება იპოვო მშვენიერი შავი ჟაკეტი უფრო დემოკრატიულ ბრენდებთან. ყველაზე გენიალურად თანამედროვე მოდაში მივიჩნევ იმას, რომ ის ყველასთვის ხელმისაწვდომია. მოკლედ, მთავარი ნივთი აუცილებლად შავი ჟაკეტია − ის უხდება ჯინსებსაც და კაბასაც. ასევე, ქუსლიანი ფეხსაცმლის წყვილი. ჯინსი და თეთრი მაისური.

ბევრი ქალს სურს გახდეს. თქვენც ერთ-ერთი მათგანი ხართ?

მე გამიმართლა: ბევრ ტკბილს და მარილიანს მივირთმევ, მაგრამ არ მეტყობა. დიახ, ვიცი, ეს გამაღიზიანებელია... მაგრამ ჩემი სამსახური ფიზიკურ დატვირთვას უკავშირდება: ზედმეტი კილოგრამების დაკლებაში სიმღერა მეხმარება. ამასთან, როცა ვმღერი, მუცლის კუნთებს ვჭიმავ, ამიტომაც ისინი შესანიშნავ ფორმაში მაქვს.

თქვენ ხომ ცეკვავთ კიდეც...

დაკავებული ვარ ცეკვით, იოგათი, კედელთან ვარჯიშით. საჭიროა იპოვოთ სპორტის ის სახეობა, რომელიც მოგწონთ. შეიძლება უბრალოდ ბევრი იაროთ. ჩვეულებრივი სიარული ბევრ დადებით ცვლილებას იწვევს, გონებას ასუფთავებს. სპორტი მნიშვნელოვანია არა მხოლოდ იმიტომ, რომ სასურველი ფიზიკური ფორმა შევინარჩუნოთ ან გავხდეთ − ის გვაბედნიერებს, ისევე, როგორც სიმღერა. სპორტი ტვინს ჟანგბადით ამდიდრებს.

გიზიდავთ ის, რასაც დღეს „უბრალო ცხოვრებას“ უწოდებენ? თუ მათ შორის ხართ, რომელსაც არ შეუძლია დიდხანს გაძლოს მოძრაობისა და ხმაურიანი კამპანიის გარეშე?

მე ორივე ვარიანტი მომწონს. მხიბლავს ქალაქიც, სოფელიც, მთაც, ზღვაც, მოძრაობაც და სიმშვიდეც. კარგია, როცა ყველაფერია მცირე დოზით.

რას აპირებთ 2019 წლის მეორე ნახევარში? მას მუსიკას მიუძღვნით?

დიახ, ზაფხულის ტურნეს შემდეგ, შემოდგომაზეც ელოდეთ კონცერტებს.