სულ ახლახან ახალი ზელანდიის საზოგადოება საზარელი ტრაგედიის მომსწრე გახდა, ქალაქ კრაისტჩერჩში ორ მეჩეთზე ტერორისტული თავდასხმა განხორციელდა, რომელმაც 50 ადამიანის სიცოცხლე შეიწირა და ასობით ადამიანი დააზარალა. ამ უმძიმესმა ამბავმა მთელი სამყარო შეძრა, ახალ ზელანდიაში დაღუპულ ადამიანებს ადგილობრივ მაცხოვრებლებთან ერთად, მთელი მსოფლიო გლოვობს. მიუხედავად იმისა, რომ სასექსის ჰერცოგინიას შვებულებაში გასვლიდან ერთი კვირაც კი არ გასულა, 19 მარტს ის მეუღლესთან ერთად ახალი ზელანდიის საელჩოს ესტუმრა და უბედური შემთხვევისას დაღუპული ადამიანების ხსოვნას პატივი მიაგო.
წყვილი მუქი ფერის კლასიკურ სამოსში იყო გამოწყობილი, მეგანმა დახვეწილ ჩაცმულობას Boh Runga-ს 170 ფუნტის ღირებულების საყურე შეუხამა.
მეგანი და ჰარი ახალი ზელანდიის წარმომადგენლებს ერთმანეთზე ცხვირის მიდებით შეეგებნენ, რაც მათ ქვეყანაში წუხილის გამოხატვის ტრადიციული რიტუალია.
შემდეგ კი, მისასამძიმრებელ წიგნში მაორის ენაზე დაწერეს სიტყვები 'aroha nui', რომელიც თანადგომისა და თანაგრძნობის გამოსახატად გამოიყენება.
შეგახსენებთ, რომ მეგანი და ჰარი სულ რამდენიმე თვის წინ ახალ ზელანდიას ესტუმრნენ, სადაც ქვეყნის პრემიერ მინისტრს ჯაკინდა არდერნსაც შეხვდნენ, რომელთანაც მათ საქმიანი ურთიერთობა აკავშირებთ.