2016 წლის სექტემბრის ბოლოს ანჯელინა ჯოლიმ და ბრედ პიტმა განქორწინების შესახებ განაცხადეს. წყვილის განქორწინებიდან ერთი წლის მერეც კი უჭირთ მათ გულშემატკივრებს იმის დაჯერება, რომ მსოფლიოში ყველაზე ლამაზი ცოლ-ქმარი ერთად აღარ არის. ცოტა ხნის წინ მიცემულ ინტერვიუში ანჯელინამ პირვლად ისაუბრა იმის შესახებ, თუ რა გახდა მათი განქორწინებისთვის საჭირო უკანასკნელი წვეთი.

2014 წელს ისინი ერთად მუშაობდნენ ფილმზე „By The Sea”, სადაც ორივე მათგანი მთავარ როლს ასრულებდა. სიუჟეტის მიხედვით ისინი ცოლ-ქმარს თამაშობდნენ, რომლებიც ურთიერთობაში კრიზისულ პერიოდს განიცდიდნენ. შეგახსენებთ, ფილმის რეჟისორი და სცენარისტი ანჯელინა იყო.

„ამ ფილმს უკეთესობისკენ უნდა შეეცვალა ჩვენი ურთიერთობა. სიმართლე გითხრათ, მე მსურდა კიდევ ერთხელ მეთამაშა მასთან ერთად ფილმში, რადგან ჩვენ სწორედ გადასაღებ მოედანზე შევხვდით ერთმანეთს. მინდოდა, რომ ამჯერად ჩვენი როლები უფრო სერიოზული ყოფილიყო, ჩვენ გავიზარდეთ და საჭირო იყო ერთად რაღაც უფრო სერიოზული შეგვექმნა. ვფიქრობდი, რომ საერთო საქმე ერთმანეთის უკეთ გაგებაში დაგვეხმარებოდა. ჩვენ უკვე მაშინ გვქონდა პრობლემები. არა, ფილმი არ ქცეულა ჩვენი განქორწინების მთავარ მიზეზად, მაგრამ ის დაგვეხმარა უკეთ დაგვენახა ურთიერთობაში წარმოქმნილი სირთულეები.“

ანჯელინა ასევე გამოტყდა - "ის პერიოდი ძალიან ბევრი მიზეზის გამო იყო რთული: დედის გარდაცვალება, მასტექტომია, სიმსივნის საფრთხე - ეს ყველაფერი ძალიან დააწვა ჩვენს ურთიერთობას. საერთო დრამატულ ფილმზე მუშაობა დაგვეხმარა, რომ ყველაფრისთვის თავისი სახელი დაგვერქვა, აღმოვაჩინეთ მთავარი პრობლემა - კომუნიკაციის პრობლემა."