სერენა უილიამსი და ალექსის ოჰანიანი ქორწილის შემდეგ დიდი ხნის განმავლობაში არ ახმაურებდნენ თუ სად ატარებდნენ თაფლობისთვეს, ახლა კი ცნობილი გახდა, რომ ოჯახი ბაჰამის კუნძულებზე ისვენებს. ჩოგბურთელმა ინსტაგრამის საკუთარ გვერდზე გამოაქვეყნა ვიდეო წარწერით - „ერთი კვირა სამოთხეში“.
ახლადდაქორწინებული წყვილი ორი თვის შვილთან ალექსის ოლიმპიასთან ერთად მსოფლიოში ერთ-ერთი ყველაზე დიდი ბარიერული რიფების მახლობლად მდებარე ანდროსის კუნძულზე ისვენებენ. მათი აპარტამენტები ყველასგან მოშორებით მდებარეობს და იქ მოხვედრა მხოლოდ ვერტმფრენის ან კერძო ნავის საშუალებითაა შესაძლებელი. ვილის ფართობი 39 ჰეკტარს შეადგენს, სადაც ჩოგბურთის პერსონალური კორტები და სპა-კომპლექსია განთავსებული. წყვილს შეფ-მზარეული და ტრენერი ემსახურება, ასევე ვილაზე მასაჟისტის და კოსმეტოლოგის მომსახურებაც არის შესაძლებელი.
შეგახსენებთ, სერენა უილიამსმა და ალექსის ოჰანიანმა ურთიერთობა 2015 წელს დაიწყეს. სექტემბერში კი გოგონა ოლიმპია შეეძინათ, რომელიც ორივე მათგანისთვის პირველი შვილია. ჩოგბურთელი სპორტში დაბრუნებას მომავალი წლიდან გეგმავს, მისმა მეუღლემ განაცხადა, რომ ის დეკრეტულ შვებულებას აიღებს და შვილს თავად მოუვლის.