კომპანია „გალფის“ ინიციატივით საქართველოში პირველად საწვავის მსოფლიო დღე აღინიშნა. ღონისძიება სასტუმრო Radisson Blu Iveria-ში დღეს გაიმართა. ღონისძიების მიზანი ჯანსაღი გარემოს შესაქმნელად საწვავის ხარისხის გაუმჯობესების ხელშეწყობაა. როგორც ნავთობკომპანია „გალფის“ საზოგადოებასთან ურთიერთობის და მარკეტინგის უფროსი ნინო ჯიბლაძე ირწმუნება, ეს ღონისძიება ტრადიციულ სახეს მიიღებს და მომავალში მისი მასშტაბებიც გაიზრდება.

წლევანდელი ღონისძიება მიზნად საზოგადოების ინფორმირებულობის დონის ამაღლებას ისახავს: რამდენად მნიშვნელოვანია ხარისხიანი საწვავის გამოყენება ავტომობილისთვის და რა ნეგატიური გავლენა შეიძლება იქონიოს უხარისხო საწვავის მოხმარებამ გარემოზე და ადამიანის ჯანმრთელობაზე.

ღონისძიებაზე სიტყვით გამოვიდა გარემოსა და ბუნებრივი რესურსების სამინისტროს წარმომადგენელი ნელი კორკოტაძე, რომელმაც საქართველოში არსებულ საწვავის ხარისხთან დაკავშირებულ რეგულაციებზე და ჩვენი გარემოსთვის საწვავის ხარისხიანობის მნიშვნელობაზე ისაუბრა. მისი თქმით საქართველოში არსებული რეგულაციები მალე ევროპულ სტანდარტებს გაუტოლდება, ამაზე კი სწორედ ჩვენს ქვეყანაში მოქმედი ნავთობკომპანიების საწვავი იქონიებს გავლენას. ღონისძიებაზე ასევე სიტყვით გამოვიდნენ მედიცინის დოქტორი ნინო ჩოგოვაძე, ნავთობკომპანია „გალფის“ საოპერაციო დირექტორი საბა ჯიშიაშვილი და კომპანია „გალფის“ საზოგადოებასთან ურთიერთობის და მარკეტინგის უფროსი ნინო ჯიბლაძე.

შეგახსენებთ ნინო ჯიბლაძე ჟურნალ OK!-ის ახალი რედაქტორია და სწორედ მისი ინიციატივით ჟურნალს ახალი რუბრიკა OK! GREEN START-UP დაემატა, რომელიც ჯანსაღი გარემოს გაუმჯობესების პოპულარიზაციას ემსახურება.