Victoria’s Secret-ის მეგობრულ ოჯახში მატებაა − ვალენტინა სამპაიო პირველი ტრანსგენდერი მოდელია, რომელიც კომპანიამ აიყვანა. გოგონად თავი მან ჯერ კიდევ 8 წლის ასაკში იგრძნო. აკირასში დაიბადა, ბრაზილიის ჩრდილო-აღმოსავლეთ ნაწილში. „როცა 8 წლის ვიყავი, დედამ ფსიქოლოგთან წამიყვანა. ამ დროს უკვე ძალიან მიყვარდა გოგონებთან ერთად ყოფნა, ერთ-ერთ მათგანადაც მოვიაზრებდი თავს, თოჯინების კოლექციას ვფლობდი. ფსიქოლოგი მიხვდა, რომ ტრანსგენდერი ვიყავი. 12 წლის ასაკში ვალენტინა დავირქვი, რომელიც შემთხვევით გავიგონე და ლამაზად მომეჩვენა“, − იხსენებს მოდელი. მას გაუმართლა: თინეიჯერობის ასაკში ყველა ისე იღებდა, როგორც გოგონას და სხვა ტრანსგენდერების მსგავსად, გენდერული მიმღებლობის კუთხით პრობლემებს არ შეჯახებია. „გარშემომყოფები გოგონად აღმიქვამდნენ. 15 წლის ასაკში ჩემში ქალური ჰორმონების რიცხვი უკვე ძალიან მაღალი იყო. იმდენად დიდი, რომ არ მქონია თმა სხეულზე, მკერდმა კი ბუნებრივად დაიწყო ზრდა“. ვალენტინა მშობლებს ძალიან ემადლიერება, რადგანაც მათ ნება დართეს ყოფილიყო ის, ვინც სურდა.

16 წლის ასაკში ვალენტინამ გამოცდები კოლეჯში, მოდისა და დიზაინის ფაკულტეტზე ჩააბარა. 2015 წელს ფორტზალის ფესტივალზე მისი სამოდელო დებიუტი შედგა. 2017 წელს ის გახდა პირველი ტრანსგენდერი მოდელი, რომელიც ფრანგული Vogue-ის გარეკანზე დაბეჭდეს, რის შემდეგაც შემოთავაზება უამრავი მოდის სხვა ჟურნალისგან მიიღო.

მოგვიანებით გახდა L’Oreal-ის სახე. 22 წლის მოდელის პორტფოლიოში გადაღებებია ისეთი ბრენდებისთვის, როგორებიცაა:H&M, J’Adore Dior, Opening Ceremony. სამპაიოს ძალიან წარმატებული კარიერა აქვს, მაგრამ Victoria’s Secret მის ცხოვრებაში ახალი, უმნიშვნელოვანესი ნაბიჯია. „ძალიან ბედნიერი და ამაყი ვარ Victoria’s Secret-თან თანამშრომლობის გამო, განსაკუთრებით ამ საყოველთაო ცვლილებების პერიოდში. ვამაყობ ჩემი მიღწევებით, მაგრამ ეს ჯერ კიდევ დასაწყისია. მნიშვნელოვანია, რომ ჩემს ხმას გარკვეული ცვლილებების გამოწვევისთვის ვიყენებ“.

მიუხედავად „უდარდელი“ ბავშვობისა, „დიდობაში“ მას დისკრიმინაციასთან შეჯახება მაინც მოუწია. სამოდელო ბიზნესში ტრანსგენდერების გარშემო შექმნილი სიტუაცია არც დღეს ახარებს. მისი აზრით, მოდელები გენდერული ჩარჩოების გათვალისწინებით აღარ უნდა შეაფასონ. 2014 წელს ერთ-ერთმა ბრაზილიურმა კომპანიამ მას მუშაობაზე უარი უთხრა, რადგანაც საკუთარი კონსერვატორული მომხმარებლების გაღიზიანება არ სურდა. მოდელი იხსენებს, რომ მაშინ ძალიან ცუდად გრძნობდა თავს, მაგრამ სწორედ ეს სირთულეები დაეხმარა, წინსვლა განეგრძო.

ქვეყნის მასშტაბებს მიღმა ცნობადობის მისაღწევად მას მოკლე ფილმში თამაში დაეხმარა, რომელიც სან-პაულუში მოდის კვირეულის ფარგლებში აჩვენეს. სამპაიო ბრაზილიაში უკვე იყო ლგბტ-საზოგადოების ერთგვარი სიმბოლო, ამ ფაქტის შემდეგ კი მასზე ყურადღება გლობალურმა მოდის ინდუსტრიამ გაამახვილა. „მოდის სამყარო ჩვენთვის ერთგვარი ხერხია, მოგვისმინონ და დაგვინახონ. სწორედ აქ დგას მრავალფეროვნებისა და თვითიდენტიფიკაციის საკითხები ყველაზე მაღალ საფეხურზე. ვიმედოვნებ, ჩემი მაგალითი სხვა ტრანსგენდერებსაც შთააგონებს სასწრაფოდ შეწყვიტონ დამალვა და საკუთარი „მე“-ს მიძინება. ახლა ჩემი ოცნებაა ვიცხოვრო სამყაროში, სადაც რეპრეზენტირება ნებადართულია. მჯერა, ბრენდები იწყებენ ჩართულობას, მაგრამ კიდევ ბევრი სამუშაოა ზოგადად ინდუსტრიაში, კულტურაში, საზოგადოებაში. ვიმედოვნებ, უფრო და უფრო გაიზრდება იმ ბრენდების რიცხვი, რომლებსაც ეს ესმით...“
სამპაიო ფიქრობს, რომ მომავალში ტრანსგენდერი მოდელის ქალის თეთრეულის რეკლამაში გამოჩენა ჩვეულებრივი ამბავი გახდება. „წარმოიდგინეთ სამყარო, სადაც ტრანსგენდერი მოდელის მოდის ბრენდში მუშაობა სიახლეს აღარ წარმოადგენს. არ იქნება ეს მშვენიერი? მინდა ვიცხოვრო მსოფლიოში, რომელსაც მეტი პატივისცემა აქვს თითოეული ადამიანის მიმართ“.

საყვარელი აქტივობა დასვენების დღეებში: მთელი დღე შემიძლია სანაპიროზე გავატარო. იქ, სადაც დავიბადე და გავიზარდე, რადგანაც ეს ენერგიით მავსებს.

სილამაზის რუტინა: ვცდილობ კანი და თმა მუდამ სუფთა და დატენიანებული მქონდეს.

მოდური სისუსტე: ფეხსაცმელები. მე მათზე შეყვარებული ვარ!

სასურველ ფიზიკურ ფორმაში ყოფნის ხერხი: ვცდილობ ჯანსაღად ვიკვებო, ბევრი წყალი დავლიო, მივმართო იოგას და სერფინგს.

მარადიული ინსპირაცია: ბრუკ შილდსი.

3 მიზანი: დაქორწინება, დაოჯახება, წარმატებული კარიერის წარმართვა.

საყვარელი ფილმი: ვუდი ალენის „მატჩ პოინტი“.

მოდელები, რომლებსაც აღმერთებთ: ჟიზელ ბუნდჰენი, იზაბელ ფონტანა, დოუცენ კრუზი, ნაომი კემპბელი, ქენდის სვეინპული, ლინდა ევანგელისტა და სინდი კროუფორდი.

3 ინსტაგრამ-გვერდი, რომელსაც რეკომენდაციას უწევთ: @natgeo @madcowboy @mileycyrus

საყვარელი საკვები: თევზი, შეხვეული ბანანის ფოთლებში.

საყვარელი ქალაქი: Prainha, აკირაზი. მე იქ დავიბადე, გავიზარდე და ყოველთვის მას ვუბრუნდები, როცა შესვენება მაქვს.

ფარული ნიჭი: ხატვა. ყოველთვის მიყვარდა ამის კეთება. თითოეული ჩემი ნახატი ბევრს ამბობს ჩემზე.

ფობია: საყვარელი ადამიანებისთვის იმედის გაცრუება.

თქვენი ცხოვრებისეული მანტრა: გააკეთე ყველაფერი სიყვარულით და წარმოადგინე შენი თავის მაქსიმუმი.