ბელგიელი დიზაინერი მოდის ინდუსტრიის ჰორიზონტზე უჩვეულო ვარსკვლავია. რაფ საიმონსის რეზიუმეში ისეთი ბრენდების შემოქმედებითი ხელმძღვანელის პოზიციებს შევხვდებით, როგორებიც არიან JIL SANDER, DIOR და CALVIN KLEIN.

2018 წლის ბოლოს ცნობილი გახდა, რომ საიმონსი Calvin Klein-ის კრეატიული დირექტორის პოსტს ტოვებდა. მისი დანიშვნიდან ჯერ მხოლოდ 2 წელი იყო გასული. ბელგიელ გურუს კვლავ აქვს მამაკაცის საკუთარი ხაზი, მაგრამ ნუთუ ეს საკმარისია ასეთი შემოქმედებითი ნატურისთვის და მისი პოტენციალის სრული რეალიზებისთვის? როგორც ჩანს, არა. რაფი იმ სფეროს უბრუნდება, საიდანაც ყველაფერი დაიწყო − ავეჯის ინდუსტრიას. ის უკვე თანამშრომლობს დანიური ტექსტილის კომპანია Kvadrat-თან. საკუთარი ნიმუშების წარმოსადგენად მან კაფეც კი გახსნა.

დრო
„ეს ძალიან უცნაური მოვლენაა. როცა ანტვერპენში ვმუშაობდი, წელიწადში მამაკაცის მხოლოდ ორ კოლექციას ვაკეთებდი და ვფიქრობდი, რომ ძალიან დაკავებული ვიყავი. ახლა მქონდა პერიოდები, როცა წელიწადში 6 კოლექცია უნდა გამომეშვა, თანაც სხვადასხვა ბრენდისთვის. დრო კი ისევ იმდენი მქონდა. ალბათ, იმიტომ ვასწრებ ყველაფერს, რომ მუდამ ვფიქრობ და აზროვნების პროცესი ჩემში არასოდეს ჩერდება. ყველაფრისგან გამოთიშვა ძალიან რთული მეჩვენება“.

თავისუფლება
„მკაცრ ჩარჩოებში დარჩენა ყოველთვის არ გამომდის. ზედიზედ რამდენიმე წელი მკაცრი, მინიმალისტური სამოსის შექმნა Jil Sander-სისთვის გაცილებით რთული აღმოჩნდა, ვიდრე „დიორისთვის“. იქ დიდ სტილისტურ თავისუფლებას ვგრძნობდი. მხატვრები განსხვავებული პრინციპით ცხოვრობენ. როცა სახელოსნოში რაღაცას ქმნიან და გრძნობენ, რომ მზად არიან სამყაროს აჩვენონ, აჩვენებენ. დიზაინერს ყოველთვის განსაზღვრული დრო აქვს, რომელშიც უნდა ჩაეტიოს. მხოლოდ ერთი დიზაინერი ცხოვრობდა ისე, როგორც მხატვარი. ეს იყო აზედინ ალაია. თავიდან მეც აუტსაიდერის როლით დავიწყე − არასოდეს მაინტერესებდა ხმაური და ფოტოგრაფები. საინტერესოა გავაანალიზოთ, როგორი უნდა იყოს დღევანდელ დღეს აუტსაიდერი დიზაინერი. ის ან მეინსტრიმს უნდა აჰყვეს ან საერთოდ არ ეთანხმებოდეს არსებულ სისტემას“.

ძიების ენერგია
„ადამიანები მხოლოდ მაშინ იწყებენ რაიმეს დაფასებას, როცა მისი ძებნა დიდხანს უწევთ. არ აქვს მნიშვნელობა, შთაბეჭდილებაა ეს თუ ნივთი. მე სოფელში ვიზრდებოდი, სადაც არ იყო არც ინტერნეტი, არც კლუბები, არც ჟურნალები. ჩემ გარშემო ვერაფერს ვუხამებდი საკუთარ მისწრაფებებს. ეს მხოლოდ რამდენიმეწლიანი ძიების შემდეგ შევძელი. ახლა საქმე სხვაგვარადაა, ძიების ენერგია გაქრა. შესაძლოა ეს ყველაფერთან ხელმისაწვდომობის ბრალია“.

ემოციები
„საკმაოდ ემოციური ადამიანი ვარ, საკუთარ თავს მგრძნობიარესაც კი ვუწოდებდი. ყველაფრის დიდხანს გაანალიზება მახასიათებს“.

რაფ საიმონსის როლი მოდაში ნამდვილად მასშტაბურია. ნიჭიერებასთან ერთად, ეს დიზაინერი იმდენად გულწრფელია, რომ კეთილი ადამიანობისთვისაც ძალიან უყვართ.

მან შეცვალა 2000-იანების მამაკაცის მოდა
მამაკაცის მოდა მუდამ კონსერვატიული იყო. 20 წლის წინ, მასში ისევ მეფობდა გასული საუკუნის 70-იანების სექსუალური სტილი, რომლის ტრანსლირებასაც ტომ ფორდი აგრძელებდა. რაფ საიმონსის გამოჩენით, მამაკაცის კოლექციებმა ახალი სიცოცხლე შეიძინა. ის ორიენტირებული გახდა არა ბიზნესმენებსა და კლუბების მოყვარულებზე, არამედ ახალგაზრდებზე ქუჩებიდან, რიგით ბიჭებზე ინდივიდუალური სტილით. აქედან წარმოიშვა მის სამოსზე პანკისა და ელექტროკულტურის ასეთი გავლენა. საიმონსის უდიდესი მიღწევაა მამაკაცის მოდაში ვიწრო სილუეტის კოსტიუმის დაბრუნება.

მან გრაფიკული დიზაინი მოდასთან გააერთიანა
პიტერ სევილი ცნობილ ალბომ Unknown Pleasures Joy Division-ის გარეკანის ავტორი და გრაფიკული დიზაინის სამყაროში საკულტო ფიგურაა, მაგრამ კოლექციებში მის მონაწილეობას ვერავინ იფიქრებდა. რაფ საიმონსმა ყველა გააოცა, როდესაც 2003 წელს კოლექცია სევილის მიერ სპეციალურად შექმნილი ილუსტრაციებით გააფორმა.

მას არ ეშინია ამბოხისა და რევოლუციის
ბრენდი „რაფ საიმონსის“ შოუ, რომელიც დღემდე ახსოვთ, 2002 წლის გაზაფხული/ზაფხულის ჩვენებაა. პოდიუმზე მომხდარი მოვლენების საერთო ხასიათი ყველასთვის სულისშემძვრელი აღმოჩნდა. ფეხშიშველა მოდელებმა სამოსი დაფარული სახით და ანთებული ჩირაღდნებით წარმოადგინეს. „ვფიქრობდი, რომ ეს კოლექცია ჩემი კარიერის დასასრული იქნებოდა, მაგრამ რედაქტორებს, კრიტიკოსებსა და მთავარ პუბლიკას ის მოეწონათ!“ − იხსენებდა რაფი.

თამამად იყენებს ნათელ ფერს
რაფ საიმონსს მინიმალიზმზე ყოველთვის თავისი თვალსაზრისი ჰქონდა. Jil Sander-ში მისვლისას მან ეს სტილი თავიდან ბოლომდე შეცვალა. მკაცრ კოსტიუმებს ფორმები დაუმატა, სტერილურ პალიტრას კი ნათელი, ენერგიული ფერები.

არ რცხვენია ემოციების გამოხატვის
ყველას სჯერა, რომ საიმონსის კოლექციებში ყველაზე გულწრფელი ემოციები ცოცხლობს. შეიძლება კი ელოდო ადამიანისგან ნაკლებს, როცა მას საზოგადოების წინაშე ატირების არ რცხვენია და თავის მომხმარებლებს სიყვარულს უცხადებს? Jil Sander-ისთვის შექმნილ უკანასკნელი შოუს ფინალში რაფი აცრემლებული გამოვიდა.

მან ლუვრის შესასვლელი ყვავილებით გადაფარა
Dior-ის მოდის სახლისთვის უკანასკნელი კოლექციის წარდგენისას, შოუ იმით გამოირჩეოდა, რომ იგი დიზაინერის ისტორიაში ეპოქალური მნიშვნელობის გახდა. რაფმა ლუვრის შიდა შესასვლელი ყვავილებით დაფარულ გამოქვაბულად აქცია.

არტკოლაბორაციები მოდაში ახალ საფეხურზე აიყვანა
კალიფორნიელი მხატვარი სტერლინგ რუბი რაფის ერთ-ერთი საუკეთესო მეგობარი და უახლოესი ადამიანია. მათ ერთად შექმნეს „დიორის“ ცნობილი, საღებავებით მოსვრილი კაბა. რაფ საიმონსის 2017 წლის კოლექცია ბრენდის სარეკლამო კამპანიაში რუბის ფერწერული ნამუშევრების ფონზე იყო გადაღებული, მაგრამ მეგობრები უფრო შორს წავიდნენ და ნიუ-იორკში, მედისონ ავენიუზე Calvin Klein-ის მაღაზია გახსნეს. არა უბრალოდ ბუტიკი, არამედ სამუზეუმო გარემო, რომელშიც საწოლზე წამოწოლა, სამოსის ყიდვა და თანამედროვე ხელოვნების ნიმუშების თვალიერება ერთდროულადაა ხელმისაწვდომი.

მან „კელვინ კლაინი“ ყველას ხელახლა შეაყვარა
ეს ამერიკული ბრენდი საზოგადოებას აღარ უყვარდა. გარკვეულ მომენტში „კელვინ კლაინის“ „დნმ“-ი შეიცვალა და საფირმო სტილიც დაიკარგა. რაფის პირველმა კოლექციამ ამერიკული მოდის ამ გიგანტისთვის ყველანაირ მოლოდინს გადააჭარბა. შოუმ დევიდ ბოუის სიმღერის This is not America ფონზე ჩაიარა. მოდელები მინიმალიზმის სტილის აქტუალური სამოსით გამოდიოდნენ, ისევე, როგორც გასული საუკუნის 90-იან წლებში. თუმცა ამ მინიმალიზმს ადამიანური სახე ჰქონდა − ისეთი, როგორსაც სწორედ რაფ საიმონსს ვუმადლით.