რომელია თქვენი საყვარელი ადგილები სვანეთში?

კეთილი იყოს თქვენი მობრძანება ცათა სასუფეველში − სწორედ ეს არის სვანეთი ჩემთვის. აქ უამრავი მოსანახულებელი ადგილია და მათ შორის ერთ-ერთი ყველაზე განსაკუთრებული და გამორჩეული უშგულია, რომელიც ყველაზე მაღალი დასახლებაა ევროპაში. უშგული იუნესკოს ძეგლთა შორის ერთ-ერთია და იგი შხარას ძირას, ენგურისა და შავწყალა-ქვიშარას შესართავთან მდებარეობს. ვფიქრობ, თითოეულმა ქართველმა და საქართველოში ჩამოსულმა ტურისტმა აუცილებლად უნდა მოინახულოს ეს ულამაზესი ადგილი.

რომელი ადგილების მონახულებას ურჩევდით დამსვენებლებს?

კიდევ უამრავი ადგილია, რომლების მონახულებასაც აუცილებლად ვურჩევდი დამსვენებლებს. მათ შორის სვანური კოშკებისას, რომლებიც თითქმის ყველა სოფელს ამშვენებს. კიდევ ჰაწვალის, ჰეშკილის, ხერგიანის სახლ-მუზეუმისა და ისტორიულ-ეთნოგრაფიული მუზეუმის, სადაც სხვა უნიკალურ ნივთებთან ერთად, ადიშის ოთხთავი ინახება და რომლის ასომთავრული ტექსტიც ოქროსფერი მელნითაა დაწერილი. მუზეუში აგრეთვე ნახავთ ოქრომჭედლობის კედელს, სადაც განთავსებულია მხატვრობისა და ხეზე კვეთის ნიმუშები. სვანეთში ასევე ზებუნებრივი სილამაზისაა ბეჩოს ხეობა, ბეჩოს უღელტეხილის ჩანჩქერი და მწვერვალები: უშბა და თეთნულდი. კიდევ მრავალი ადგილია, სადაც ფეხით მისვლა, ბუნებით დატკბობა, დასვენება და ყველაფრისგან განტვირთვაა შესაძლებელი.

რატომ უნდა ეწვიოს ტურისტი სვანეთს? თქვენი აზრით, რა არის მასში განსაკუთრებული?

გარდა უამრავი მოსანახულებელი ადგილისა, სვანეთში ასულს შეგრძნება გეუფლება, რომ დროში მოგზაურობ და მოულოდნელად აღმოჩნდები სხვა, ძველ საქართველოში. ამ კუთხეში ყველაფერი განსხვავებულია, თავისი განსაკუთრებული ბუნებითა და საოცარი კოშკებით.