რამდენიმე სეზონის წინ, სერ პოლ სმითმა გადაწყვიტა კურსი ახალგაზრდობისკენ აეღო. მიმართულების ცვლა წარმატებული ნაბიჯი გამოდგა.
ლონდონში წარმოდგენილი ახალი, გაზაფხული-ზაფხულის კოლექცია სავსეა პოლ სმითისეული ფერადოვნებით, გამოყენებულია პრინტი, ნაქარგი და აპლიკაციის ტექნიკა. დიზაინერი თავის საყვარელს ზოლებს არ ღალატობს. იგი ზოლებთან ერთად ყვავილის პრინტსაც გვთავაზობს, რომელიც მხატვარ ჰილმა აფ კლინტის ნამუშევრებიდან აიღო. ნაზი, პასტელური ფერები მუქ ფონზე ეფექტურად გამოიყურება.
ერთი წლის წინ დიზაინერმა საზოგადოებას ჩანთების ახალი მოდელი Concertina Bag წარუდგინა, რომელიც ძალიან სწრაფად გახდა პოპულარული. ახალ სეზონზე ჩანთის რამდენიმე მოდელი შემოგვთავაზა, მთავარი კი მათი ფერია: კრემისფერი, ვარდისფერი, ფორთოხლისფერი, რომლებიც მომენტალურად ზაფხულის განწყობას ქმნის.
