პროექტის „Check in Georgia“ ფარგლებში, შავი ზღვის სანაპიროზე ყველაზე მასშტაბური, შავი ზღვის რიგით X ჯაზ-ფესტივალი გრძელდება. დღეს, 17 ივლისს, ბათუმის ჩოგბურთის კლუბში მის ლორენ ჰილის კონცერტი გაიმართება. ბათუმის ჩოგბურთის კლუბი 20:00 საათიდან გაიხსნება.
მუსიკოსი შავი ზღვის ჯაზ-ფესტივალზე 17 კაციანი ბენდით წარდგება და შეასრულებს როგორც ახალ სიმღერებს, ასევე თავის ცნობილ ჰიტებს სხვადასხვა ალბომიდან.
მის ლორენ ჰილი (Ms. Lauryn Hill) - (დაბ. 26 მაისი, 1976 წ) - ამერიკელი მომღერალი, კომპოზიტორი, რეპერი, პროდიუსერი და მსახიობი; უფრო მეტად ცნობილია, როგორც ჯგუფ „Fugees“ -ის წევრი. ლორენ ჰილმა მნიშვნელოვანი გავლენა იქონია თანამედროვე მუსიკის განვითარებაზე. მისი პირველი სოლო ალბომი "Miseducation of Lauryn Hill" 1998 წელს გამოვიდა, ხუთი გრემი მოიპოვა და გაიყიდა მილიონობით ეგზემპლარი. განსაკუთრებით ცნობილია ლორინ ჰილის სიმღერები "Doo Wop“ „To Zion”.
ბათუმში, შავი ზღვის სანაპიროზე ყველაზე მასშტაბური, შავი ზღვის რიგით X ჯაზ-ფესტივალი 15 ივლისს 27 გრემის მფლობელის, მე-20 საუკუნის ერთ-ერთი ყველაზე მნიშვნელოვანი და გავლენიანი ჯაზის მუსიკოსის ქუინსი ჯონსის პროექტით - QUINCY JONES & THE GLOBAL GUMBO ALL STARS (feat. Richard Bona, Alfredo Rodriguez, Jacob Collier) გაიხსნა; 16 ივლისს ჯაზ-ფესტივალის ფარგლებში გაიმართა ფილმის „Miles Ahead“ პრემიერა და მაილს ელექტრიკ ბენდის კონცერტი. ჯაზ-ფესტივალი 24 ივლისს დაიხურება.
საიუბილეო, რიგით X ფესტივალში, ტრადიციულად, მსოფლიოში ცნობილი შემსრულებლები მონაწილოებენ. კონცერტები 10 დღის განმავლობაში, ყოველ საღამოს, ბათუმის ჩოგბურთის კლუბში და ქალაქის სხვადასხვა ლოკაციაზე ჩატარდება.
2016 წლის ჯაზ-ფესტივალის მონაწილე მუსიკოსები არიან: QUINCY JONES & THE GLOBAL GUMBO ALL STARS, JAMIE CULLUM, MACY GREY, THE PRODIGY, Ms. Lauryn Hill, MILES ELECTRIC BAND, NIK WEST და Chris Brown. ფესტივალის ფარგლებში, კლუბში „Take Five” შედგება MACY GRAY DJ SET; გაიმართება NIK WEST -ის, DJ LOGIC & Friends -ის და ასევე, ქართველი მუსიკოსების კონცერტები.
ბათუმელებსა და ბათუმის სტუმრებს, ფასიანი კონცერტების გარდა, საშუალება ექნებათ უფასოდ დაესწრონ „BRASS BAND“-ების კონცერტებს, რომელიც ბათუმის ბულვარში მთელი დღის განმავლობაში გაიმართება. ჯაზ-ფესტივალის ფარგლებში, უცხოელი შემსრულებლების გარდა, ბათუმის კოლონადებთან კონცერტებს ქართული ჯაზ-ბენდები გამართავენ.
