გრემის ჯილდოს ორგზის მფლობელი ამერიკელი ჯაზ ვოკალისტი გრეგორი პორტერი, ევგენი მიქელაძის სახელობის საქართველოს ეროვნულ სიმფონიურ ორკესტრთან ერთად, საახალწლო კონცერტს 12 იანვარს, თბილისის საკონცერტო დარბაზში გამართავს. კონცერტის ორგანიზატორები SOLO და Eastern Promotions არიან. საქართველოს სიმფონიურ ორკესტრს ცნობილი ქართველი დირიჟორი ნიკოლოზ რაჭველი უხელმძღვანელებს.
ხავერდოვანი, აფრო-ამერიკული ტემბრის მქონე მუსიკოსი საკუთარ ნამუშევრებში აერთიანებს ჯაზს, ფანკს, R&B-ს, ბლუზსა და გოსპელს. გრეგორი პორტერის კარიერული წინსვლა 2010 წელს, პირველი ალბომით - Water დაიწყო, რომელიც რამდენიმე კვირის განმავლობაში, ამერიკის ჯაზ-ალბომების ათეულში მოწინავე ადგილებს იკავებდა. პირველი გრემის ჯილდო მუსიკოსმა „საუკეთესო ჯაზ-ვოკალის“ კატეგორიაში ალბომისთვის Liquid Spirit მოიპოვა. 2013 წელს კი ჯაზ-ვოკალისტი კიდევ ერთი გრემის მფლობელი გახდა დისკისთვის Take Me to the Alley.
გრეგორი პორტერი საკუთარ კვინტეტთან და საქართველოს ეროვნულ სიმფონიურ ორკესტრთან ერთად შეასრულებს სიმღერებს ბოლო ალბომიდან “Nat King Cole & Me”. ალბომი 2017 წლის 27 ოქტომბერს გამოვიდა და ის ლეგენდარულ ამერიკელ ვოკალისტსა და ჯაზ-პიანისტს ნეტ კინგ კოულს ეძღვნება. აღსანიშნავია, რომ ალბომში შესული სიმღერების არანჟირების ავტორი გრემის 6 ჯილდოს მფლობელი ვინს მენდოზაა. დისკი აერთიანებს გრეგორი პორტერის მიერ შესრულებულ ნეტ კინგ კოულის ისეთ ლეგენდარულ სიმღერებს, როგორებიცაა “Mona Lisa”, “L-O-V-E”, “Nature Boy”, “The Christmas Song”, “Smile” და სხვა.
საახალწლო კონცერტზე დასასწრები ბილეთების გაყიდვა, მხოლოდ SOLO-ს მომხმარებლებისთვის დღეს, 21 დეკემბერს, დაიწყო და მათი მინიმალური ღირებულება 50 ლარს შეადგენს. მათ კი, ვინც არ არის SOLO-ს მომხმარებელი ბილეთების შეძენა 28 დეკემბრიდან შეეძლებათ. ბილეთების ფასი 100 ლარიდან დაიწყება.